ABAROOMU 9

1Ese ndi ohulomaloma obwadyeeri; ndi omuundu wa Kristo handi siindi hubacha. Ebibaaso byaange, nibimiriirwe nende Mwooyo Mwolerefu, byosi binyomiisa biti siindi hubacha. 2Mboola endi, ndi omwelalihirifu muno, handi ndi nende obuchuuni bwaange bw'omwooyo butaakama, 3hulw'abandu bange, ab'olwiibulo lwaange lweene, handi aba amabaanga kange keene. Hu lwaabwe, ndahekombere endi ese mweene mba ndaholimirwa nende Nasae mani ndawuhana ohutula hu Kristo. 4Bano nibo abandu ba Nasae beene; bayahola ohuba abaana bae mani yaabekesa oluyaali lwae. Yahola nabo embuliirisania mani yaababeeresa amalako. Bali nende engeri yaadyeri y'ohwiinamira Nasae. Banyoola ebisuubiso bya Nasae. 5Beechuhulu batula hu kuuka yaabwe Bayudaaya bamanyihana; handi Kristo koti omuundu mwibulanwa waabwe. Lehe Nasae otuka byoosi akinisibwe endaalo choosi. Amiina. 6Siindi huboola endi ebiindu bi Nasae yasuubisa haba sibyolerera; olwohuba Abayisirayiri boosi haba sibali abandu ba Nasae. 7Kata sisiri mbwe abechuhulu ba Yibbulaimu boosi baana ba Nasae. Nasae yaboolera Yibbulaimu ati, “Ochia ohunyoola abechuhulu ba ndahusuubisa ohubitira mu Yisaka.” 8Sino syekesa siti abana beebulwa mu ngeri ya buli ludaalo, haba si baana ba Nasae; ohumalaho, abaana beebulwa ohweema hu sisuubise sya Nasae nibo abalaangwa koti abechuhulu b'adyeeri. 9Olwohuba Nasae yahola esisuubise naboola emboosi chino: “Mu biha bihoyeerwe, njia ohukobola, mani Saara achia ohwibula omwaana musyaani.” 10Handi sino sinisyo syong'ene. Olwohuba abaana ba Rebbeka babiri bali nende saabwe mulala, Yisaka kuuka yeefwe. 11Kata nibaba nibasisiiri ohwibulwa, handi nibasisiiri ohuholaho esiindu silayi oba esibi, ohweekesa huti esichiiririrwa nisyo ohudoola hwa Nasae, ohuteema hu biholwa, nae ohweema hu hulaanga hwae. 12Nasae yaboolera Rebbeka ati, “Omwaana muhuluundu achia ohuhalaabanira omwaana muyere.” 13Koti lu byandiiko byolerefu biboola biti, “Ndaheera Yakobbo nae ndaasyula Esau.” 14Mani hunaboole huti Nasae akwiira abandu bandi? Haba bbe! 15“Njia ohukwiira esisa omuundu yeesi yindaha; handi njia ohusaasira omuundu yeesi yindaha.” 16Mani sakira, buli siindu syeema hu sisa sya Nasae syong'ene ataali ohweema hu muundu adaha oba bi muundu ahola. 17Olwohuba ebyandiiko byolerefu biboolera omutuki wa Misiri biti, “Ndahuhola omutuki, hu nyale ohuhwehoonyera ohweekesa obunyala bwaange nende ohusasaania efuma yange hu syaalo syoosi.” 18Mani sakira, Nasae akwiira esisa buli muundu yaaba nadaha, handi yoomya emitwe cha buli bandu baaba nadaha. 19Owundi hweeng'we achia ohumboolera ati, “Nibiri bityo, Nasae ahengera atye omuundu omusango? Wiina mweene onyala ohuyingania si Nasae adaha?” 20Nae wasyaange, niiwe wiina omuundu busa onyala ohukaluha mu Nasae? Endamu yosi yinyala ohuteeba omuundu wayiloonga yiti, “Lwasiina wanoonga oti?” 21Ngandi omuundu oloonga endamu ali nende obunyala bw'ohwehoonyera eloba koti lu mweene adaha. Handi anyala ohuloonga endamu chibiri ohutula mu loba nasilala, anyala ohuloonga endamu ndala eyohwehoonyerwa hu miholo mihuluundu nae eyiindi eyohwehoonyera mu ngeri ya buli ludaalo. 22Nasae yesi yahola esiindu nasilala atyo. Yadaha ohweekesa etima lyae, handi nende ohukera obunyala bwae bumanyihane. Sakira yesimiirisira muno abo abamudiisa etima, abali ab'ohusihiriswa. 23Handi Nasae yadaha ohweekesa oluyaali lwae lubitiirifu, luyatubeeresa efwe abandu bayakwiira esisa, abandu ba yali yatekeha ohwakaanira oluyaali lwae. 24Olwohuba neefwe abandu ba Nasae yalaanga, ataali ohutula mu bandu Bayudaaya bong'ene, nae ohutula mu Abateende bosi. 25Sino nisyo syaboola mu sitabo sya Hoseya: “Abataali abandu bange njia ohubalaanga 'Abandu bange.' Esyaalo sindali nitaheera Njia ohusilaanga 'Esiheerwa syaange.' 26Handi mu sifwo bweene mubaboolerwa bati, 'Eng'we haba simuli abandu bange,' awo niwo yibacha ohulaangirwa abaana ba Nasae mulamu.” 27Handi Yisaaya alomaloma hu Yisirayiri ati: “Kata nende abandu Bayisirayiri bahaba abangi koti omusenye kwo hu nyaanja, nae abadiidi bong'ene nibo abacha ohuwonisibwa; 28olwohuba Omwaami achia ohuheengera esyaalo omusango bwaangu muno.” 29Biri koti lu Yisaaya yaboola hale ati, “Omwaami w'Obunyala aaba naatatuleheraho abechuhulu bandi, huba hwehola koti Sodomu, hwahabeere koti Gomora.” 30Sakira huboola huti Abateende, abataali nibakesaho abeene ohuba abalungifu nende Nasae, baholwa baaba abalungifu ohubitira mu fukiirira; 31nae abandu ba Nasae, abali nibakonyaanga elako libahola ohuba abalungifu nende Nasae, haba sibalinyoola. 32Nae siina syeene esyakera baahaya ohulinyoola? Olwohuba bibahola haba sibyeema hu fukiirira, nae byeema hu biholwa byaabwe bilai byong'ene. Mani beegumula hu “Kina ly'ohwegumulaho” 33li byandiiko byolerefu bilomalomaho biti: “Bone, mbawo nda mu Siyooni ekina elicha ohukera abandu beegumule, olwaanda lucha ohukera bakwe. Nae oyo yeesi omufukiiriramo, haba saacha hudiirwa esoni.”

will be added

X\