ABAROOMU 8

1Mani bulaanu, abandu bali mu Kristo Yesu babulaho omusango. 2Olwohuba elako lya Mwooyo, elituleetera obulamu efwe abali mu Kristo Yesu, lyamboolola ohutula mu lako ly'esibi nende ohufwa. 3Bi lako litanyala ohuhola, hulw'obukata bw'omubiri, Nasae nae yabihola. Yaheengera esibi siri mu mubiri kwaange omusango kwasihira, natuma Omwaana wae yeng'ene, oweecha nende efwaani y'omuundu muholi w'ebibi, hwaanyale ohusihirisa esibi. 4Nasae yahola sino, hu bulungifu bu lako lidaha, bunyale ohwosereswa elalira mweefwe, abamenya ohulondakana nende Mwooyo, ataali ohulondakana nende obulamu bw'omubiri. 5Abo abamenya koti emibiri chaabwe chidaha, bamalira ebibaaso byaabwe hu biindu by'omubiri. Nae abo abamenya koti Mwooyo lwadaha, bamalira ebibaaso byaabwe hu biindu bi Mwooyo adaha. 6Ohutukibwa nende omubiri huleeta ohufwa; nae ohutukibwa nende Mwooyo huleeta obulamu nende emireembe. 7Sakira abandu batukibwa nende obwekoombi bw'omubiri beehola abasuku ba Nasae; olwohuba haba sibawulira amalako ka Nasae, handi mubwadyeri bweene haba sibakawulira. 8Abandu abahola ebiindu bi mibiri chaabwe chidaha, haba sibanyala ohusangaasa Nasae. 9Nae eng'we, obulamu bweeng'we haba sibuloondakana nende bi mibiri cheeng'we chidaha; nae obulamu bweeng'we buli koti lu Mwooyo adaha nibiri biti, Mwooyo wa Nasae abalimo. Omuundu otaali nende Mwooyo wa Kristo mu bulamu bwae, oyo haba saaba ali owa Kristo. 10Nae Kristo naali mu bulamu bwao, awo Mwooyo aba ali obulamu bwao; olwohuba mwamala ohuholwa ohuba abalungifu nende Nasae, kata syahaba siti, emibiri cheeng'we chicha ohufwa hulw'esibi. 11Oba Mwooyo wa Nasae, owasyuuhisa Yesu ohutula mu bafu ali mweng'we, mani Nasae wasyuuhisa Yesu ohutula mu bafu, achia ohubeeresa emibiri cheeng'we chifwa obulamu ohweema hu Mwooyo obalimo. 12Sakira basyaange huli nende ekobi, elitaali ohuhola koti emibiri cheefwe chidaha huhole. 13Olwohuba nimumenya ohulondakana nende bi mibiri cheeng'we chidaha, mucha ohufwa; nae nimumenya koti lu Mwooyo adaha, awo, mucha ohwiita ebiholwa by'eng'we bibi, mani mube abalamu. 14Abo abeemererwa nende Mwooyo wa Nasae, baana ba Nasae. 15Olwohuba Mwooyo yi Nasae yababeeresa, saabahola ohuba ababoye mani yaakera mwaaba abati, ohutusaho Mwooyo oyo, abahola abaana ba Nasae, handi amaani ka Mwooyo oyo, kakera mwalaanga Nasae muti, “Abba! Laata!” 16Mwooyo wa Nasae yeyambaania hu myooyo cheefwe, ohweekesa ati huli abaana ba Nasae. 17Mani koti lu huli abaana ba Nasae, hucha ohunyoola ehabi chiyabiihira abandu bae, mani fwesi hucha ohunyoola alala nende Kristo, esyo si Nasae yamubiihira. Olwohuba efwe nihukabana hu husaanda hwa Kristo, awo fwesi hucha ohukabana hu luyaali lwae. 18Mbona endi, ohusaanda hweefwe hw'esiha sino, haba sihunyala ohukeraanisibwa daawe nende oluyaali lu hucha ohwekeswa. 19Ebiloonge byoosi biri nende amawofu ohubona koti lu Nasae achia ohweekesa abaana bae. 20Olwohuba ebiloonge byaheengerwa omusango ohufwiirwa esichiiririrwa syaabyo, ataali ohwedahisa hwabyo byeene, nae olwohuba Nasae yadaha sibe sityo. Kata katyo, esuubi liriwo 21liti, oludaalo lucha ohwoola ebiloonge byeene biboololwe ohutula mu buboye bw'ohubola, mani bikabane hu luyaali lw'obuboolole bw'abaana ba Nasae. 22Olwohuba humanyire huti, ohwolera elalira hu biha bino, ebiloonge byoosi byekanyiisa nende obuchuuni, koti obuchuuni bw'omuhasi olumwa nadaha ohwiibula. 23Nae haba si biloonge byong'ene ebiri ohwekanyiisa; kata efwe abali nende Mwooyo koti ebiyaanwa bitaangira bya Nasae, hwekanyiisa mu myooyo cheefwe abeene, nihulindiriire Nasae atuhole abaana bae handi, mani anunule obulamu bweefwe bwoosi. 24Olwohuba esuubi nilyo elyakera hwaonisibwa; nae nihubona bihusuubira, bulaanu elyo haba siriba esuubi lyeene. Olwohuba wiina mweene hweefwe obona esiindu syasuubira? 25Nae nihusuubira esiindu sihutabona, awo huba hucha ohusiriinda nihwesimiirise. 26Mu ngeri nasilala eyo, Mwooyo yesi yeecha ohutuhoonya mu bukata bweefwe. Olwohuba haba sihumanyire engeri yihuhoyeere ohwekongooyeramo; Mwooyo mweene atwekongooyera nende Nasae mu hwekanyiisa hutanyala ohutuumbulwa mu mboosi. 27Nae Nasae obona mu myooyo cheefwe, amanyire ebibaaso bya Mwooyo koti lu biri; olwohuba Mwooyo yekongooyera abandu bae eyiri Nasae ohuchaanakana nende ohudaha hwae. 28Humanyire huti mu biindu byoosi bi Nasae ahola, achiiririra esilai sy'abandu bamudaha, abo bayalaanga ohweema hu sichiiririrwa syae. 29Abo ba Nasae yamala ohudoola, bosi yabaawula beehole koti Omwaana wae, awo hu Mwaana wae anyale ohuba omwikula-nda w'abaana ba Nasae bangi. 30Mani sakira abo ba Nasae yaawula, bosi yabalaanga; handi abo ba yalaanga, yabahola ohuba abalungifu nae, mani yaakabana nabo oluyaali lwae. 31Hunaboole siina hu biindu bino byoosi? Nasae naali hu lwaande lweefwe, naanu mweene onyala ohutuyingania? 32Haba saanyala ohuba Nasae, kata otahayira hu Mwaana wae mulala yeng'ene, nae owamuwaayo hu lweefwe fweesi! Yatubeeresa Omwaana wae, - mani haba saaba achia ohutubeeresa ebiindu byoosi bwereere? 33Naanu ochia ohuwabira omusango abandu ba Nasae yadoola? Nasae mweene aboola ati babula omusango! 34Nae wiina mweene ochia ohubaabira omusango? Saanyala ohuba Kristo Yesu owafwa, oba owasyuuhiswa mu bulamu buyaaha, mani owihaale hu muhono muluungi kwa Nasae, natwekongooyera nende Nasae! 35Mani wiina onyala ohutwawuhania nende ohudaha hwa Kristo? Husaanda nihwo, oba budinyu nibwo, oba hwiitibwa nihwo, oba njala niyo, oba buwati nibwo, oba masira niko, oba hufwa nihwo? 36Koti lu byandiiko byolerefu biboola, “Hulwao, buli siha huli mu bidinyu by'ohufwa; huyiribwa koti amakoondi kacha ohusiinjwa.” 37Nae mu biindu bino byoosi hwamala ohuyiingira ohubitira mu oyo owatudaha! 38Olwohuba manyire bwadyeeri bweene endi abulao esiindu syoosi esinyala ohutwawuhania ohutula hu hudaha hwa Kristo: Kata hwahaba ohufwa oba obulamu, kata bahaba bamalaika oba abatuki bandi bo Mukulu oba amaani ko Mukulu, kata ebiindu by'esiha sino oba eby'esiha siicha, 39kata syahaba esyaalo sya akulu, oba esya aasia, abulao esiindu syoosi mu biloonge, esicha ohunyala ohutwawuhania syaatutusa hu hudaha hwa Nasae hu hwanyoola ohubitira mu Kristo Yesu Omwaami weefwe.

will be added

X\