ABAROOMU 7

1Basayange manyire bulai bweene endi mucha ohumanya siinjia ohulomalomaho, olwohuba eng'we mweesi mumanyire amalako ka Musa. Elako lituka abandu nibasisiiri abalamu. 2Esy'ohuboneraho, omuhasi wadeeha, elako limutuka ohumenya nende wamwe nasisiiri omulamu; nae wamwe naamala yaafwa, awo omuhasi oyo elako haba siriba nilisiimutuka ohumenya nende wamwe. 3Mani sakira omuhasi naaba nende omusaacha wundi wamwe nasisiiri omulamu, aba achia ohulaangibwa omucheke; nae, omusaacha naafwa, aba omuhasi mulehuule mani saaba naahola obucheke, niwichuhana yadeehera omusaacha wundi. 4Basyaange, mwesi muli mutyo. Ebidiirana nende amalako, mwesi muli abafu, olwohuba muli esituundu sy'omubiri kwa Kristo; mani bulaanu muli abandu ba oyo, owasyuuhiswa ohutula mu bafu, humunyale ohuba ab'obuhoonyi mu huhalaabanira Nasae. 5Olwohuba nihwali nihusitukibwa nende obunyala bw'omubiri kweefwe, obwekoombi bubi obwasingiswa nende amalako, nibwo obwali nibuhola mu mibiri cheefwe, mani buli siindu sihwaholaanga syali nisituyiraanga mu hufwa. 6Mani bulaanu, efwe huli abalehuule ohutula hu malako, olwohuba hwafwa eyiri esyo esyali nisyatuhola ababoye. Haba sihusihalaabanira nihuloondakana nende engeri hale, ey'elako lyandiikwa, nae huhalaabana mu ngeri njiaha ey'Omwooyo. 7Bulaanu hunaboole huti, elako lyeene nilyo esibi? Haba bbe! Nae elako nilyo elyakera ndaamanya esibi. Elako liba nilitaboola liti, “Otekombaanga esiindu sy'omuundu wundi,” haba sindahamanyire obwekoombi buno. 8Nae esibi syehoonyera elako elyo ohunyoola ehabi y'ohunjakulusamo obwekoombi bubi bwa buli ngeri. Abula elako, esibi siba esiindu syafwa. 9Ese syesi ndali niindi omulamu amalako nikabulao; nae elako nilyeecha, esibi syeecha syaalamuha, 10mani ndamala ndaafwa. Mani awo, elako elyali ly'ohuleeta obulamu, nae ese lyeecha lyandeetera ohufwa. 11Esibi syeecha syanyoola ehabi mani syehoonyera elako, syambachirisa mani syamala syaanjita. 12Mani sakira, elako koti elako, elyeene lyolerefu, handi esilagiro syosi syolerefu, lungifu, handi silayi. 13Nae sino syekesa siti esyali esilai nisyo esyandeetera ohufwa? Haba bbe! Nae esibi nisyo esyahola sityo nisyehoonyera esiindu silayi, mani esibi syandeetera ohufwa, hu bubi bw'esibi bunyale ohumanyihana alafu. Mani sakira ohweema hu malako, esibi syeyekesera elalira ohuba esibi muno. 14Efwe humanyire huti amalako kaliwo hulw'obulamu bw'omwooyo; nae ese siindi ow'obulamu bw'omwooyo, owakusibwa ohuba omuhalaabani w'esibi. 15Haba siimanyire esiindu siindi ohuhola; olwohuba haba siihola esiindu sindahekoombere ohuhola ohumalaho, hola esiindu sitahadahire ohuhola. 16Mani koti esiindu siindi ohuhola nisyo sitahadahire ohuhola, sino syekesa siti, fukiirira endi elako lungifu nilyo. 17Mani haba si neese mweene oli ohuholaanga esiindu sino; ohumalaho esibi syaamenyamo nisyo esiri ohuholaanga. 18Ese manyire endi esilai haba sisindimo esyeekesa mbwe, mu bulamu bwaange koti omuundu. Olwohuba kata ndahabaamo obwekoombi bw'ohuhola esiindu silayi, ese haba sinyala ohusihola. 19Haba siihola esilai sindahadahire ohuhola; ohutusaho, hola esibi sitahadahire ohuhola. 20Mani niihola esiindu sitahadahire ohuhola, sino syekesa siti, haba si neese mweene oli ohusihola, nae esibi syaamenyamo nisyo esiri ohusiholaanga. 21Mani Nindaha ohuhola esiindu silayi, ndyeyakaana endi elako lino nilyo eliri ohuhola. 22Obulamu bwaange bweene busangaalira mu malako ka Nasae. 23Nae mbona endi elako liindi nilikabuhaane nilyo eliri ohuhola mu mubiri kwaange-elako lilwaanisa elako li bibaaso byaange biseemba. Mani sino sikera ndaaba omuboye w'elako ly'esibi eliholera mu mubiri kwaange. 24Mani ngandi omuundu mwelalihirifu! Wiina mweene ochia ohununula ohundusa mu mubiri kuno okuli ohunjira mu hufwa? 25Nasae yebasibwe, owununula ohubitira mu Mwaami weefwe Yesu Kristo! Mani endyo nilwo lu ndi: hu lwaange omweene, ese nyala ohuhalaabanira amalako ka Nasae mu bibaaso byaange, nae obulamu bw'omubiri kwaange buhalaabanira elako ly'esibi.

will be added

X\