ABAROOMU 6

1Bulaanu hunaboole siina? Hwemeeda ohumenya mu sibi, hu habi cha Nasae chinyale ohwemeeda? 2Haba daawe! Hwamala ohufwa eyiri esibi, mani hunyala hutye ohwemeeda ohusimenyamo? 3Mubwadyeeri bweene mumanyire sino muti, nihwabatiisibwa mu bulala nende Kristo Yesu, hwabatiisibwa mu bulala nende mu hufwa hwae. 4Sakira mani mu hubatiisibwa hweefwe, hwasiihwa nende Kristo, mani hwakabana hu hufwa hwae hu hunyale ohusyuuha koti lu Kristo yasyuuha ohutula mu bafu hulw'amaani ka Laatang'ene maangi, mani awo fwesi hu hunyale ohumenya mu bulamu buyaaha busangaasa Nasae. 5Mani koti lu hweyambaania nende Kristo mu hufwa hwae koti luyafwa, nilwo lwosi lu hucha ohweyambaania nae nihusyuhisibwa mu bulamu koti lu yasyuuha. 6Handi humanyire huti, obulamu bweefwe buhale bwamala ohwiitibwa nende Kristo hu musalabba kwae, hu maani kakera omubiri nikuhola esibi kanyale ohusihiriswa, handi hu huhaye ohukobola ohuba ababoye b'esibi. 7Olwohuba abandu nibafwa, baba baboloolwe ohutula mu maani k'esibi. 8Mani koti lu hwafwa nende Kristo, hufukiirira huti fwesi hucha ohuba abalamu alala nae. 9Olwohuba humanyire huti koti lu Kristo yasyuhiswa ohutula mu bafu, handi saachia hukobolamo ohufwa ehabi liindi ohufwa haba sihuchia hunyala ohumufuka handi. 10Mani sakira, koti lu yamala ohufwa, esibi simubulaho obunyala; handi bulaanu obulamu bwali ninabwo, buli alala nende Nasae. 11Mu ngeri nasilala, mwesi muhoyeere ohwebaasaho koti abamala ohufwa hu bidiirana nende esibi, nae abalamu mu bulala nende Nasae ohubitira mu Kristo Yesu. 12Mutakanya esibi handi ohutuka emibiri ch'eng'we chifwa, mwanyala ohuhola obwekoombi bwaacho bubi. 13Handi mutakanyaanga ohubeeresa esituundu syoosi sy'emibiri ch'eng'we eyiri esibi, syasyehoonyera ohuhola ebichiiririrwa byasyo bibi. Ohutusaho, mwewechengeyo eyiri Nasae, koti abo abamala ohutusibwa mu hufwa baleetwa mu bulamu, handi mwewechengeyo mweesi eyiri Nasae, abehonyere hulw'ebichiiririrwa bilungifu. 14Esibi sisihoyeere ohubatuka handi, olwohuba simuli mu bunyala bw'amalako, nae muli mu bunyala bw'esisa sya Nasae. 15Bulaanu hunaahole siina? Huhole busa ebibi olwohuba sihuli mu bunyala bw'amalako, nae huli mu bunyala bw'esisa sya Nasae? Haba bbe! 16Obwadyeeri mumanyire muti, nimwewaayo abeene ohuba abahalaabani bawulira omuundu, muba muli abahalaabani b'omuundu yi muwulira oba abahalaabani b'esibi, esileeta ohufwa, oba aba obuwulisi, obukera mwaaba abalungifu nende Nasae. 17Nae hwebase Nasae! Olwohuba eng'we hale abali ababoye b'esibi, mwawulira obwadyeeri buli mu njekesa yi mwanyoola, nende omwooyo kw'eng'we kwoosi. 18Mwaboololwa ohutula mu sibi, mani mwehola abahalaabani b'obuluungifu. 19(Ndehoonyera enomanoma ya buli ludaalo, hulw'obukata bw'eng'we koti abandu lu bamanyiramo.) Hale mwali nimweweerayo abeene elalira ohuba abahalaabani b'obucheke nende mu huhola ebibi, hulw'ebichiiririrwa bibi. Mu ngeri nasilala, bulaanu muhoyeerwe ohwewerayo abeene elalira ohuba abahalaabani b'obuluungifu hulw'ebichiiririrwa byolerefu. 20Nimwali nimuli abahalaabani b'esibi, mwali nimwalehuulwa ohutula mu bulungifu. 21Mani ngaanga siina yimwanyoola olw'ohuholaanga ebiindu bibadiisa esoni esiha sino? Ebitula mu biindu ebyo, hufwa hwereere. 22Nae bulaanu, mwaboololwa ohutula mu sibi, mani muli abahalaabani ba Nasae! Engaanga yeng'we niyo obulamu bw'ohweweerayo elalira eyiri Nasae, mani esitulamo nisyo obulamu butaakama. 23Olwohuba omuheemba kw'esibi nikwo ohufwa; nae esiyaanwa sya Nasae sya bwereere nibwo obulamu butaakama alala nende Kristo Yesu Omwaami weefwe.

will be added

X\