ABAROOMU 5

1Bulaanu koti lu hwamala ohuholebwa abalungifu nende Nasae ohubitira mu fukiirira, hwamala ohunyoola emireembe nende Nasae ohubitira mu Mwaami weefwe, Yesu Kristo. 2Ohubitira mu fukiirira, Omwaami weefwe Yesu Kristo yatuleeta hwaaba mu esisa sya Nasae sino, si humenyeremo bulaanu. 3Lehe fwesi handi hwefumie hulw'ebidinyu by'efwe, olwohuba humanyire huti ebidinyu bileeta ohwesimiirisa, 4handi ohwesimiirisa hukera Nasae yaatusiima, handi Nasae natusiima hunyoola esuubi. 5Esuubi lino haba siritumalamo omwooyo, olwohuba Nasae yamala ohuchuha mu myooyo cheefwe ohudaha hwae ohubitira mu Mwooyo Mwolerefu, oyo niye esiyaanwa syeefwe esitula eyiri Nasae. 6Olwohuba nihwali nihubula obuhoonyi bwoosi, Kristo yafwiira abaholi b'ebibi mu biha bi Nasae yatekeha. 7Lwasiina yahola atyo? Sidinyu muno omuundu ohufwiira omuundu mulungifu. Awundi sinyaliha omuundu ohwewaayo ohufwiira omuundu mulai. 8Nae Nasae yamala ohutweekesa koti lwatudaha olwohuba nihwali nihusisiiri ababi, Kristo yatufwiira! 9Koti ohufwa hwae hwatuleetera obuluungifu nende Nasae, bulaanu yatuwonisirya elalira etima lya Nasae. 10Hale hwaaba abasuku ba Nasae, nae Nasae yatuhola hwaaba abeecha bae ohubitira mu hufwa hw'Omwaana wae. Koti lu huli abeecha ba Nasae, bulaanu obulamu bwa Kristo bucha ohutuwonisiria elalira. 11Nae esyo sinisyo syong'ene; huli abasangaafu hulw'ebyo bi Nasae yatuholera ohubitira mu Mwaami weefwe Yesu Kristo, oyo owatuhola hwaaba abeecha ba Nasae. 12Esibi syeecha mu syaalo nisibitira mu muundu mulala, handi esibi syae syaleeta ohufwa. Esyatulamo, ohufwa hwasalaana hwoola hu buli muundu, olwohuba abandu boosi bahola esibi. 13Esibi syali nisiri mu syaalo amalako nikasisiiri obubao; nae yi lako litaali, yibulawo omuundu onenyesebwa hulw'ohuhola esibi. 14Nae ohutula mu ndaalo cha Adamu ohwoola mu ndaalo cha Musa, ohufwa hwali nihufuka abandu boosi, kata nende abo abatahola esibi koti lu Adamu yahola naahaya ohuwulira amalako ka Nasae. Adamu yali efwaani y'oyo owali niyaliindwa ohwiicha. 15Nae bano bombi haba sibali nasilala, olwohuba esiyaanwa sya Nasae sya bwereere haba sisifwaanana nende esibi sya Adamu. Nisiri mbwe abandu baangi bafwa ohweema hu sibi sya Adamu omuundu mulala oyo, nae esisa sya Nasae nende esiyaanwa syae sya bwereere eyiri abandu bangi muno sibanyoola ohubitira mu muundu mulala Yesu Kristo siba sichia ohuhirira elalira. 16Handi aliwo engabuhana akati-kaati w'esiyaanwa sya Nasae nende esibi sy'omuundu mulala. Lunyuma lw'esibi silala, wechao ohuheenga omusango, “Omusaango kubahira”; nae lunyuma lw'ebibi biingi muno, yiichawo esiyaanwa sihwali nihutahoyera siti, “Babula omusango!” 17Syadyeeri siti, ohubitira mu sibi sy'omuundu mulala, ohufwa hwachaaka ohutuka abandu. Nae esitula mu siholwa sy'omuundu mulala Yesu Kristo sihirira elalira! Mani abo boosi abanyoola esisa sya Nasae siingi muno, mani baaholebwa ohuba abalungifu nende Nasae bwereere, bacha ohutuka mu bulamu ohubitira mu muundu mulala Yesu Kristo. 18Mani sakira, lu sibi silala syadiisa abandu boosi omusango, mu ngeri nasilala eyo, esiholwa siluungifu silala sichia ohulehuula abandu boosi, mani syababeeresa obulamu. 19Handi koti lu butawulira bw'omuundu mulala bwaleetera abandu bangi muno ohuba abaholi b'ebibi, mu ngeri nasilala niyo yi huwulira hw'omuundu mulala hucha ohukera abandu bangi muno babe abalungifu nende Nasae. 20Elako nilyeecha, lyoongera abandu ohuhola ebibi; nae koti lu sibi syemeeda, nilwo lwosi lu sisa sya Nasae syosi syemeeda ohuhirira elalira. 21Mani sakira, koti esibi syatuka omuundu ohubitira mu hufwa, nilwo nasilala lu sisa sya Nasae situka ohubitira mu bulungifu, nisituyira mu bulamu butaakama ohubitira mu Yesu Kristo Omwaami weefwe.

will be added

X\