ABAROOMU 4

1Bulaanu hunaboole siina hu Yibbulaimu kuuka yeefwe mu mubiri? Obulamu bwae bwali butye mu moni wa Nasae? 2Yibbulaimu aaba niyali omulungifu mu moni wa Nasae ohweema hu biindu biyahola, yahanyalire ohuba nende ohwefumia omweene, nae saanyala ohwefumia mu moni wa Nasae. 3Ebyandiiko byolerefu biboola biti, “Yibbulaimu yafukiirira mu Nasae, mani ohweema hu fukiirira yae, Nasae yamubala koti omuundu mulungifu.” 4Olwohuba omuhosi atuungwa omuheemba kwae, nae haba sikuyirwa koti esiyaanwa; nae kuba ku muundu ahalaabaniire. 5Nae owesika efukiirira, oteesika ebiholwa byae, mani yaafukiirira mu Nasae omala hu bandu emisango chaabwe, efukiirira y'engeri yino niyo yi Nasae abala eyimuhola ohuba omulungifu ni nae. 6Sino nisyo si Daudi yesi yaboola naalomaloma hu sangaalo ly'omuundu yi Nasae yakaanira koti omulungifu, ataali ohweema hu biindu bi muundu ahola: 7“Bali nende ehabi abo ba bibi byaabwe bireherwamo, ba bibi byaabwe bimalibwao! 8Ali nende ehabi omuundu oyo yi Mwaami atacha ohubala ebibi byae!” 9Ehabi yino yi Daudi yalomalomaho y'abandu bahebwa bong'ene? Haba bbe! Y'abandu batahebwa bosi. Olwohuba huboolere huti ebyandiiko byolerefu biboola biti, “Yibbulaimu yafukiirira mu Nasae, mani ohweema hu fukiirira yae, Nasae yamubala koti omuundu mulungifu.” 10Nae sino sy'ehola liina? Syehola Yibbulaimu nasisiiri ohuhebwa, kose naamalire ohuhebwa? Syehola nasisiiri ohuhebwa, ataali naamalire ohuhebwa. 11Yibbulaimu yahebwa luunyuma, mani ohuhebwa hwae hwaaba ahalolero heekesa efukiirira yi yali nayo nasisiiri ohuhebwa, sakira Nasae yamubala ohuba koti omuundu mulungifu. Esyo nisyo esikera Yibbulaimu yaaba kuuka w'omwooyo waabo abafukiirira Nasae, ba Nasae abala koti abalungifu kata baahaba nibatahebwa. 12Yibbulaimu yesi niye laatang'ene w'abandu bahebwa bosi, esyeekesa siti, ohumeeda hu huhebwa, abo bosi abali nende efukiirira yiri koti yi Yibbulaimu yali nayo nasisiiri ohuhebwa. 13Nasae niyasuubisa Yibbulaimu nende abechuhulu bae ati, esyaalo sichia ohuba esyae, haba siyahola atyo olwohuba Yibbulaimu yoseresa amalako ka Musa, nae olwohuba Yibbulaimu yafukiirira mani Nasae yaamubala koti omuundu mulungifu. 14Nae nikali mbwe abo abooseresa amalako ka Musa bong'ene nibo abacha ohunyoola si Nasae yasuubisa, esyo syekesa siti, omuundu oba nende efukiirira abula obuhoonyi, handi esisuubise sya Nasae syosi sibula obuhoonyi. 15Elako lileeta etima lya Nasae; nae yi lako litaali, awo yibulawo ohuhalaka amalako. 16Mani sakira esisuubise esyo syeema hu fukiirira, hu sisuubise sinyale ohwomiisibwa koti esiyaanwa sya Nasae sya bwereere eyiri abechuhulu ba Yibbulaimu boosi, ataali eyiri abooseresa amalako ka Musa bong'ene, nae eyiri abo abafukiirira koti Yibbulaimu hale yafukiirira. Olwohuba Yibbulaimu niye laata weefwe fweesi w'omwooyo; 17koti lu byandiiko byoolerefu biboola biti, “Ndahuhola laatang'ene abandu boosi.” Mani esisuubise esyo silayi mu moni wa Nasae yi Yibbulaimu yafukiiriramo-Nasae oyo osyuhisa abafu baaba abalamu, handi yi hulagira hwae hutaawo esiindu sitaliwo syeecha syabaao. 18Yibbulaimu yafukiirira handi yasuubira, kata nende niyitaaliwo esifune sy'ohusuubira, mani sakira yehola “laatang'ene abandu boosi.” Koti busa lu byandiiko byolerefu biboola biti, “Abechuhulu bao bacha ohuba abaangi muno koti ening'ining'i.” 19Yibbulaimu yaba aambi ow'emyaaka emia ndala ech'obuhuluundu; nae efukiirira yae haba siyawaamo maani niyabaasa hu mubiri kwae okwali, koti okwamala ohufwa, oba niyabona ati Saara yali natanyala ohunyoola omwaana ohweema hu myaka chae. 20Yibbulaimu haba siyaakama ohufukiirira, handi haba siyakanakanaho esisuubise sya Nasae; efukiirira yae yamwiichusa amaani mani yaafumia Nasae. 21Yibbulaimu yali yamaliirira ati bi Nasae yasuubisa achia ohubyoseresa. 22Mani sakira, hulw'efukiirira ya Yibbulaimu, esyo nisyo esyakera “Nasae yaabala Yibbulaimu koti omuundu mulungifu”. 23Emboosi chiboola chiti, “yamubala koti omuundu mulungifu” haba sichandiikwa hulwa Yibbulaimu yeng'ene. 24Chandiikwa hulw'efwe fwesi abacha ohubalwa koti bandu balungifu, efwe abafukiiririra mu oyo owasyuuhisa Yesu Omwaami weefwe ohutula mu bafu. 25Ebibi byeefwe nibyo ebyakera Yesu yaweebwayo afwe, mani yasyuhiswa hwaanyale ohutuhola abalungifu nende Nasae.

will be added

X\