ABAROOMU 3

1Aliwo esiindu si Bayudaaya bahira Abateende? Oba, mugaso siina okuli mu huhebwa? 2Bahira muno, mu ngeri choosi! Mu huchaaka, Nasae yadiisa Abayudaaya emboosi yae. 3Nae hu siina abandi hw'abo haba sibali abesikwa? Sino syekesa siti Nasae siyahabe omwesikwa? 4Kata nabudiidi! Nasae ahoyeere ohuba owadyeeri kata nende buli muundu yaahaba omubacha. Koti lu byandiiko byolerefu biboola biti, “Ohoyeere weyekese ohuba omulungifu nolomaloma; ohoyeere ohuhira omusango kwao noyaasibwa.” 5Nae ohuhola bubi hw'efwe nihuba nihweekesa elalira bweene obwadyeeri bwa Nasae, hunyala hwaboola huti Nasae ahola bubi natusaandya? (Sino nisyo esiteebo sihoyeerwe ohuteebwa koti omuundu.) 6Haba bbe! Haba sisinyalihana kata nabudiidi! Nasae nataba nende obwadyeeri, anyala atye ohuheengera esyaalo omusango? 7Nae obubacha bwaange nibwemeeda ohweekesa koti lu Nasae ali ow'obwadyeeri, mani yaabereswa oluyaali, lwasiina mba nisiheengerwa omusango ohuhira koti omuholi w'ebibi? 8Lwasiina sihuboola busa huti, “Lehe busa huhole ebibi, hu silayi sinyale ohutulamo”? Mu bwadyeeri bweene abandu bandi bamala ohunyeka nibaanenya bati ndaboola esiindu sino! Bahaheengerwe omusango ohubahira koti lubahoyera. 9Mani efwe Abayudaaya huliho nende engeri yoosi yihuhiriramo Abateende obulayi? Kata nabudiidi! Malire ohweekesa endi Abayudaaya nende Abateende boosi nasilala, bali mu bunyala bw'esibi. 10Koti ebyandiiko byolerefu biboola biti: “Abulao omuundu mulungifu kata namulala, 11abulao omuundu mukesi oba owiinamira Nasae. 12Boosi batula hu Nasae; boosi badondobana; boosi alala abulao ohola esilungifu, kata namulala yeng'ene. 13Emboosi chaabwe cheechula obubacha bw'ohufwa; enimi chaabwe chihulukusa obubacha bubi, eminwa chaabwe chitulamo ohutiisa-tiisa hubi huli koti obusiba bw'enjuha; 14enomanoma yaabwe yechula ebiholimo bilulu byong'ene. 15Baangu muno ohunyaala nende ohwiita; 16buli yi bachiira balehayo ohunyaasa nende ohusihirisa. 17Haba sibamanyireho engira yireeta emireembe, 18kata sibadeeba ohuta mu Nasae oluyaali.” 19Bulaanu humanya huti ebyo byoosi ebiri mu malako ka Musa bidiira hw'abo abatukibwa nende amalako ako, hu muundu abulewo owewosaho mani yaakayira Nasae yaahengera esyaalo syoosi omusango. 20Olwohuba abulao omuundu yeesi oli omulungifu mu moni wa Nasae hulw'ohwoseresa bi malako ka Musa bi kadaha; bi malako kahola nibyo ohweekesa abandu kati bahola ebibi. 21Nae bulaanu engeri yi Nasae aholeramo abandu ohuba abalungifu alala nae yamala ohumanyihana. Engeri yino haba siyilondakanaho nende amalako ka Musa, kata syahaba siti amalako ka Musa nende abanabbi byatusa obujulisi buyidiiraho. 22Olwohuba Nasae ahola abandu ohuba abalungifu ohubitira mu fukiirira yaabwe mu Yesu Kristo. Nasae ahola sino eyiri abo boosi abafukiiririra mu Kristo, olwohuba abulao engabuhana yoosi: 23olwohuba abandu boosi bamala ohuhola esibi, mani bali eyale muno nende oluyaali lwa Nasae. 24Nae ohubitira mu siyaanwa sy'esisa sya Nasae sihwabereswa buhaya busa, abandu boosi baholwa abalungifu nende Nasae ohubitira mu Kristo Yesu, obanunula mu bibi byaabwe. 25Kristo Yesu niye yi Nasae yataawo ohuba esiyaanwa simalao esibi ohubitira mu hufwa hwae, eyiri abo boosi abamufukiiriramo. Nasae yahola atyo ohweekesa obuluungifu bwae, olwohuba hale, mu hwesimiirisa hwae koti Nasae, haba siyadeeba hu bibi byaabwe. 26Nae mu biha bya bulaanu, yehaliirisa ebibi byaabwe, mani hwaanyale ohweekesa obuluungifu bwae. Mu ngeri yino Nasae yeyekesa omweene koti lwali omulungifu handi koti lwahola buli muundu yeesi ofukiirira mu Kristo yaaba omulungifu. 27Mani bulaanu siindu siina esinyala syaakera hwefumia? Ngandi sibulao. Handi siina syeene esikera byaaba bityo? Hwoseresa amalako ka Musa hw'efwe? Haba bbe, nae olwohuba huli nende efukiirira busa. 28Mani humaliirisa nihuboola huti, omuundu aholebwa yaaba omulungifu nende Nasae ohubitira mu hufukiirira hwong'ene, nae ataali ohwoseresa bi malako ka Musa kadaha. 29Kose huboole huti Nasae wuno ali Nasae w'Abayudaaya bong'ene? Haba saali Nasae w'Abateende bosi? Ngandi ali Nasae waabwe. 30Nasae ali mulala yeng'ene, mani achia ohuhola Abayudaaya ohuba abalungifu alala nae ohweema hu fukiirira yaabwe, handi achia ohuhola Abateende ohuba abalungifu ohubitira mu fukiirira yaabwe. 31Nae sino syekesa siti hulehane nende amalako ka Musa olwohubeera efukiirira yino? Haba bbe! Ohumalaho efwe hwomiise amalako kosi.

will be added

X\