ABAROOMU 2

1Wasyaange, niiwe oheengera abaasyo omusango? Kata nende waahaba niiwe wiina, obula esy'ohwediisa. Olwohuba nohengera abaasyo omusango, nae ohola ebiindu nasilala koti bibahola, oba omweene oli ohweheengera omusango. 2Efwe humanyire huti, Nasae w'adyeeri naheengera abandu bahola ebiindu bifwaana biti omusango. 3Nae ewe wasyaange, oheengera abaasyo omusango ohubahira, nae ewe weesi ohola ebiindu nasilala ebyo, obaasa oti ochia ohwebalula eheenga y'omusango ya Nasae? 4Kose awundi oli ohulekeresa esisa syae siingi, nende ohudiira kaala, alala nende ohwesimiirisa hwae. Mu bwadyeeri, omanyire oti Nasae w'esisa, olwohuba ateemaho ohubona ati weyolobya. 5Nae ewe oli nende omwooyo mwomeranu handi okutawulira, mani sakira omweene oli ohweleetera ohusaandisibwa huhirao hu Ludaalo lu tima lya Nasae nende eheenga yae nungifu bicha ohweyekesera. 6Olwohuba Nasae achia ohubeeresa buli muundu omukabo ohweema hu buli siindu siyahola. 7Abandu bandi bomiirira ohuhola ebiindu bilai, handi bakoonya oluyaali nende efuma, nende obulamu butaakama; abo Nasae yahababeerese obulamu butaakama. 8Nae abandu bandi beemani handi bahaya obwadyeeri, mani baloondakana nende obutaali obwadyeeri; abo Nasae achia ohubanyoolerera handi ohubaalabira. 9Abandu boosi abahola ebibi bacha ohusaandisibwa handi bachunisibwe, ohuchaaka nende Abayudaaya ohwolera elalira hu Abateende bosi. 10Nae abo boosi abahola bulai, Nasae achia ohubabeeresa oluyaali, efuma, nende emireembe, ohuchaaka nende Abayudaaya, ohwolera elalira hu Abateende bosi. 11Olwohuba Nasae saakwiira muundu yeesi naheenga omusango. 12Abateende haba sibali nende amalako ka Musa; mani bahola ebibi bamala baakota ataali ohulondekana nende amalako ka Musa. Nae Abayudaaya bali nende amalako ka Musa; mani bahola ebibi, mani baahengerwa omusango nende amalako ka Musa. 13Olwohuba ohuba omulungifu alala nende Nasae haba sisitula hu bandu ohuwulira amalako ka Musa nae bitula hu bandu ohuhola bi malako ka Musa kadaha. 14Abateende haba sibali nende amalako ka Musa; nae buli siha sibahola bi malako ka Musa kadaha ohweema hu hudaha hw'emyooyo chaabwe cheene, baba beholere amalako kaabwe abeene akabafuka, kata nende nibabula amalako ka Musa. 15Esaambo chaabwe, cheekesa chiti, bi malako ka Musa kadaha, byandiikwa mu myooyo chaabwe. Ebibaaso by'emyooyo chaabwe, byeekesa biti, sino syadyeeri, olwohuba ebibaaso byaabwe, ebiha biindi bibanenya, handi ebiha biindi bibakwiira. 16Nae ohweema hu Mboosi Ndai yi njaala, sino nilwo lusicha ohuba hu Ludaalo lu Nasae ohubitira mu Yesu Kristo achia ohuheengera omusango ebyaama by'ebibaaso by'abandu boosi. 17Nae ewe naawe? Welaanga Omuyudaaya; wesika amalako handi wefumia hulwa Nasae; 18omanyire bulai bweene bi Nasae adaha ohole, handi wekesebwa mu malako ohudoola esiindu sihira obulayi; 19ewe wehahasa koti lwooli omwemeresi w'abawofu, obulafu bw'abo abali mu siirima, 20omweekesa w'abandu bataali nende amakesi, handi omweekesa w'abandu bataamanyire. Omanyire bulai oti mu malako onyoolamo amakesi koosi nende obwadyeeri. 21Nae omweekesa w'abandi lwasiina haba siweyekesa omweene? Oyaala oti, “Oteebanga” - nae ewe omweene wiiba. 22Oboola oti, “Otayiranaanga” - nae ewe omweene oyirana. Wekaana emisaambwa, nae ewe wiiba mu masabo. 23Wefumisira mu malako ka Nasae, - nae oswaasa Nasae nohalaka amalako kae. 24Ebyandiiko byolerefu biboola biti, “Eng'we Abayudaaya ning'we abakera Abateende nibalomaloma bubi hu Nasae.” 25Nimuloondakana nende amalako ka Musa, awo ohuhebebwa hweeng'we hulimo omugaso; nae nimutaloondakana nende amalako ka Musa, byahahiriire busa mwadoong'a nimutahebeebwe. 26Omuteende otahebwa nanyala yaloondakana nende amalako ka Musa, mubaasa muti, Nasae haba siyahamuyire yaaba koti owahebwa? 27Mani sakira eng'we Abayudaaya, Abateende bacha ohubaheengera omusango kubahire, olwohuba muhalaka amalako ka Musa, kata nende nimuli nako mu bwandiike, handi mwahebebwa; nae Abateende baloondakana nende amalako ka Musa, kata bahaba nibatahebwa nende ohuhebwa hw'omubiri. 28Nae bulaanu, Omuyudaaya mweene, owahebebwa elalira, niye oli atye? Oyo haba siniye Omuyudaaya w'ohumukulu, owahebwa nende ohuhebwa hw'omubiri busa. 29Ohumalaho, Omuyudaaya mweene, niye omuundu Muyudaaya ow'omukati, nihwo ohuboola oti, oyo yi mwooyo kwae kwahebwa, mani kuno mulimo kwa Mwooyo wa Nasae, ataali okw'amalako kaandiikwa. Omuundu ofwaana ati, anyoola efuma ohutula eyiri Nasae ataali ohutula hu bandu busa.

will be added

X\