ABAROOMU 15

1Efwe ab'amaani mu fukiirira huhoyeere ohuhoonya abakata ohukiinga emikuku chaabwe. Haba sihuhoyeere ohwesangaasa abeene. 2Ohutusaho, huhoyeere ohusangaasa abafukiiriri bandi hulw'obulayi bwaabwe abeene, huhunyale ohuboombaha mu fukiirira. 3Olwohuba Kristo haba siyesangaasa omweene. Ohutusaho, koti byandiiko byolerefu biboola biti, “Amanyeko kahunyekwa, kakwa hweese.” 4Buli siindu syoosi esyandiikwa mu byandiiko byolerefu, syandiikwa ohutwekesa, huhunyale ohunyoola esuubi ohubitira mu hwesimiirisa nende ohugumia emyooyo koti lu byandiiko byolerefu bitubeeresa. 5Mani lehe Nasae, yi hwesimiirisa nende ohugumia emyooyo byoosi bitulaho, ababeerese amaani munyale ohuba nende ebibaaso nasilala nimuloondakana nende esyohuboneraho sya Kristo Yesu, 6handi hweeng'we mweesi alala munyale ohufumia nende ekono lala Nasae handi Laatang'ene omwaami weefwe, Yesu Kristo. 7Sakira mwaakananireenge abeene-na-beene, koti lu Kristo yabakaanira hulw'oluyaali lwa Nasae. 8Olwohuba mbaboolera endi, obulamu bwa Kristo bw'ohuhalaabana eyiri Abayudaaya, bwali obw'ohweekesa buti Nasae mwesikwa niye, hwaanyale ohwoseresa abweene ebisuubise bi yasuubisa bakuuka yaabwe. 9Handi yahola atyo, hu Abateende banyale ohubeeresa Nasae oluyaali hulw'esisa syae. Koti lu byandiiko byolerefu biboola biti, “Sakira njia ohuhufumia mu Abateende; njia ohuhwemba nihufumia.” 10Handi biboola biti, “Eng'we Abateende musangaale, alala nende abandu ba Nasae!” 11Handi biboola biti, “Eng'we Abateende mweesi mufumie Omwaami; abandu boosi mumufumie!” 12Handi, Yisaaya yesi aboola ati, “Omwichuhulu wa Yese achia ohwiicha; achia ohwiicha ohutuka Abateende, mani achia ohuba esuubi lyaabwe.” 13Lehe Nasae yi suubi litulamo, abechuse nende esangaalo lyoosi nende emireembe ohubitira mu humufukiiriramo hweeng'we, hu suubi lyeeng'we linyale ohwemeeda ohuhula hulw'amaani ka Mwooyo Mwolerefu. 14Basyaange: ese syesi manyire bulai bweene endi, mwechulamo ebiholwa bilai, muli nende amakesi kamala koosi, handi endi munyala ohukerakanira abeene-na-beene. 15Nae mu bbarwa yino, nyandiikire nende obugumu bwoosi ebidiira hu biindu biindi bimbechuliise. Mbeere nende obugumu ohweema hu habi yi Nasae yambeeresa 16ey'ohuba omuhalaabani wa Kristo Yesu ohuholera Abateende. Halaabana koti omulaamisi ninjaala Emboosi Ndai eyitula eyiri Nasae hu Abateende banyale ohuba esiyaanwa sifukiirirwa eyiri Nasae, esimubeereswa nende Mwooyo Mwolerefu. 17Mani alala nende Kristo Yesu, nyala ohuba nende esichiiririrwa sy'ohwefumia mu mulimo kwaange eyiri Nasae. 18Njia ohuba omwomiifu, mani nomalome hu bi Kristo yahola ohumbitiramo byong'ene ohukera Abateende bawulire Nasae. Yahola sino ohubitira mu mboosi nende ebiholwa, 19ohubitira mu maani k'ebyaamayia nende ebiwukisa, handi nende ohubitira mu maani ka Mwooyo wa Nasae. Mani sakira mu hukeenda hwange hwoosi ohutula elalira Yerusaalemu ohwoola Yiliriiko, ndayaalira elalira mu bwiichufu Emboosi Ndai yidiira hu Kristo. 20Sindekombaanga buli ludaalo syali ohuyaala Emboosi Ndai mu bituundu bitawuliraho ebidiira hu Kristo, hu haye ohwombaha hu musiingi ku muundu wundi yachaaka. 21Koti ebyandiiko byolerefu biboola biti, “Abo abali nibataboolerwaho ebimudiiraho, bacha ohubona, handi abo abatawuliraho bacha ohumanya.” 22Ohuyaala Emboosi Ndai mu bituundu bitawuliraho hu Kristo nisyo esyangayira amahabi maangi ohwiicha yimuli. 23Nae bulamu koti lu malire omulimo kwaange mu bituundu ebyo, handi koti lumbeere nindekombaanga emyaaka emiingi ohwiicha ohubabona, 24bulaanu buti suubira ohwiicha ohubabona. Ndaha ohubabona niindi hu lukeendo lwaange lw'ohuchia mu Sipeini. Nimalire ohusangaalira alala nang'we, ndaha muhoonye engeri y'ohwoola e Sipeini. 25Nae bulaanu buti ndi ohuchia e Yerusaalemu ohuhalaabanira abandu ba Nasae bali eyo. 26Olwohuba abafukiiriri bali mu Makedonia, nende abe Akaia, baheengerewo abeene ohuhoonya abamanani bali mu bandu ba Nasae abali mu Yerusaalemu. 27Abeene baheengawo ohuhola batyo; nae mu bwadyeeri bweene, bali nende omulimo kw'ohubahoonya. Olwohuba Abayudaaya bakabana ehabi chaabwe ch'omwooyo nende Abateende, Abateende bosi bahoyeere ohwehoonyera ehabi chaabwe echoby'omubiri ohuhoonya Abayudaaya. 28Mani nimba nimalire omulimo kuno, handi nimalire ohubayirira eseende choosi chindababuusira, awo niwo yinja ohubakeniyira nindiirire olukeendo lwaange lucha Sipeini. 29Niinjicha yimuli, manyire endi, njia ohwiicha nende ehabi cha Kristo mu bwiichufu. 30Basyaange mbekweeda hulw'Omwaami weefwe Yesu Kristo nende hulw'ohudaha hwa Mwooyo Mwolerefu: mundeyambaanieho mu husabira nende amaani koosi eyiri Nasae. 31Muusabire muti, abandu babula efukiirira abali mu Buyudaaya bahaye ohuholaho esibi, handi muti abandu ba Nasae bali mu Yerusaalemu, banyale ohufukiirira ohuhalaabana hwange. 32Mani sakira, nihuli ohudaha hwa Nasae, njia ohwiicha yimuli ninjichuule esangaalo, mani olukeendo lw'ohwejong'oloseramo eyiri eng'we lunyale ohusangaasa. 33Lehe Nasae yi mireembe choosi chitulaho, abe nang'we mweesi. Amiina.

will be added

X\