ABAROOMU 14

1Mwakaanireenge abaasyeng'we baakata mu fukiirira, handi mutayinganaanga nabo ebidiira hu mbaasa chaabwe. 2Abandu bandi, efukiirira yaabwe yibafukiirira ohulya buli siindu, nae abandu b'efukiirira ngata bafukiirirwa ohulya elyaani lyong'ene. 3Omuundu olya buli siindu syoosi sahoyeere ohulekeresa omuundu otahola atyo; handi omuundu olya elyaani lyong'ene yesi haba sahoyeere ohuheengera omusango omuundu olya buli siindu olwohuba Nasae yamala ohumufukiirira. 4Ewe niiwe naanu oheengera omuhalaabani w'omuundu wundi omusango? Omwaami wae mweene niye onyala ohuheengao koti omuundu oyo ahola bilai, oba ahola ebitahoyera. Handi achia ohuhola ebilai, olwohuba Omwaami ali nende obunyala bukera naahola bilai. 5Abandu bandi babaasa bati oludaalo lundi luhira endaalo chiindi obulayi, nae abandi babaasa bati endaalo choosi chakanaakana. Buli muundu hweefwe ahoyeere ohwomiisa ebibaaso byae byeene. 6Abandu babaasa bati oludaalo lundi luhira endaalo chiindi, bahola batyo hulw'ohubeeresa Omwaami oluyaali; abandu balya buli siindu, bahola batyo hulw'ohubeeresa Omwaami oluyaali, olwohuba beebasa Nasae hulw'ebyohulya ebyo. Abandu bahaya ohulya ebyohulya biindi, bosi bahola batyo hulw'ohubeeresa Omwaami oluyaali, handi beebasa Nasae. 7Abulao omuundu yeesi hweefwe oliwo hulwae yeng'ene, handi abulao omuundu yeesi ofwa hulwae yeng'ene. 8Nihuli abalamu, huliwo hulw'Omwaami, handi nihufwa, hufwa hulw'Omwaami. Sakira oba huli abalamu oba hufwa, fweesi huli ab'Omwaami. 9Olwohuba Kristo yafwa handi yaasyuuha hwaanyale ohuba Omwaami w'abandu balamu, nende abafwa. 10Bulaanu eng'we abalya elyaani lyong'ene lwasiina muheengera abaasyeng'we omusango? Handi eng'we abalya buli siindu lwasiina mulekeresa abafukiiriri bandi? Olwohuba efwe fweesi hucha ohweema mu moni wa Nasae atuhengere omusango. 11Olwohuba ebyandiiko byolerefu biboola biti, “Omwaami aboola ati, koti lu ndi Nasae mulamu, buli muundu achia ohusigama mu moni wange, handi buli muundu achia ohutuumbula ati niise Nasae.” 12Sakira buli muundu yeesi hweefwe, achia ohwewosaho eyiri Nasae ebidiira hu bulamu bwae. 13Mani sakira lehe hwakame ohuheengeraanga abaasyeefwe omusango. Ohutusaho, huhoyeere ohutaholaanga esiindu syoosi esinyala ohukera abaasyeefwe beegumula oba baakwa mu sibi. 14Nindeyambaniisye alala nende Omwaami Yesu, sino sikera nimanya elalira obwadyeeri endi, abulao esy'ohulya koti esy'ohulya esiba esibi esyeene; nae omuundu nabaasa ati, aliwo eby'ohulya bibi, awo mani nisyehola esibi yaali. 15Niwelalihirisa abaasyo hulw'ebyohulya byoolya, awo haba sooba nosiisihola ohweema hu hudahana. Otakeraanga ebyohulya byoolya binyaasa omuundu yi Kristo yafwiira! 16Otakeraanga esiindu sy'obukula ohuba esilai syanyoola eliita libi. 17Olwohuba Obwaami bwa Nasae haba sibuli busa hu by'ohulya oba eby'ohung'wa, nae buli hu bulungifu, emireembe, nende esangaalo li Mwooyo Mwolerefu aberesa. 18Mani nohalaabanira Kristo mu ngeri yino, osangaasa Nasae handi abandu bandi bosi bahusiima. 19Sakira buli siha huhoyeere ohuchiiririra ebiindu bileeta emireembe, handi ebituhoonya efwe abeene ohugumisania. 20Mutanyaasa omulimo kwa Nasae hulw'ebiindu bidiira hubyohulya. Eby'ohulya byoosi binyala ohuliibwa, nae sisihoyera ohulya esiindu sinyala syaakera omuundu wundi yaakwa mu sibi. 21Esiindu sihoyera ohuholwa nisyo, ohulehena nende ohulya enyama, ohung'wa amalwa oba ohuhola esiindu syoosi esinyala syaakera abafukiiriri bandi baakwa. 22Mani ewe diira efukiirira yao eyo koti lu mweene womiisa mu moni wa Nasae. Bali nende ehabi abo abetehengera mu mwooyo omusango nibahola esiindu sibamanyire bati sihoyera. 23Nae nibali nende ohukana-kana ebidiira hu biindu bibalya, Nasae achia ohubaheengera omusango nibalya ebiindu ebyo, olwohuba esiholwa syaabwe haba sisiba nisyeema hu fukiirira. Handi esiindu syoosi esiteema hu fukiirira sibi nisyo.

will be added

X\