ABAROOMU 13

1Buli omuundu ahoyeere ohuwulira abatuki b'esyaalo, olwohuba abulao obunyala bw'obutuki bwoosi obutatula eyiri Nasae, handi abatuki baliwo boosi Nasae niye owabataao. 2Buli muundu oyiingania obutuki buliwo, aba ali ohuyingania esiindu si Nasae yataao; handi buli muundu ohola atyo, achia ohweleetera omusango omweene. 3Olwohuba abandu bahola ebiindu bilai, haba sibatya batuki, ohumalaho abaholi b'ebibi nibo ababatya. Odaha ohuba omuundu otatya abatuki? Mani hola ebilai, mani bacha ohuhufumia, 4olwohuba abatuki abo, bahalaabani ba Nasae, hulw'obulayi bweeng'we. Nae nimuhola ebibi, mani mubatye, olwohuba bali nende obunyala bw'ohusaandya abahola ebibi. Abatuki abo bahalaabani ba Nasae, mani booseresa ohusaandya hwa Nasae eyiri abaholi b'ebibi. 5Hulw'esifune sino, buli muundu ahoyeere ohuwulira abatuki ataali ohutya ohusaandisibwa hwa Nasae busa, nae koti ebibaaso by'omwooyo kwae bimweekesa. 6Esyo syosi nisyo esikera nimutooya emisolo olwohuba abatuki bahalaabanira Nasae, nibaba nibooseresa emirimo chaabwe. 7Mani mutuunge bimuhoyeere ohubatuunga; mubatunge emisolo ch'eng'we abeene nende emisolo chibata hu biindu byeeng'we, handi mubatye handi mubeesemo boosi oluyaali. 8Mutabechaanga nende ekobi eyiri omuundu yeesi ekobi limuhoyeere ohuba nalyo nilyo ely'ohudahanaanga. Omuundu yeesi odaha owaasye, oyo aba yoseresa amalako. 9Amalako kaboola kati, “Otahola obucheke; otetaanga; oteebanga; otekombaanga ebiindu by'omuundu wundi” - amalako kano koosi, nende akandi kadoong'ereyo, kabuusibwa mu lako lala liti, “Dahaanga owaasyo koti lu wedaha omweene.” 10Omuundu yeesi odaha owaasye, haba saachia humuholera esibi. Sakira ohudahana nihwo ohwoseresa amalako koosi. 11Muhoyeere ohuhola sino, olwohuba mumanyire muti ebiha byeeng'we by'ohusimuha byoolere. Olwohuba ebiha bi huhoyeere ohuwonisibwamo, bisudire aambi ohuhira koti lu hwachaaka ohufukiirira. 12Esiro siri aambi ohuwa, handi obwiire buli aambi ohuhya. Sakira lehe hulehe ohuhola ebiindu by'omusiirima, mani hubukule ebilwaaniro by'obulafu. 13Lehe hube nende esaambo ndayi, echihoyera abandu bamenya mu bulafu bw'esideete, ataali ohusangaasa emibiri, oba ohumeera, ataali obucheke oba obuyirani, ataali ohulwaana oba ehali-hali. 14Ohumalaho, mwefwaale Omwaami Yesu Kristo, mani mutabeeresa emibiri cheeng'we obweyaango bw'ohuhola ebibi bi chekoomba.

will be added

X\