ABAROOMU 12

1Mani sakira basyaange, ohweema hu sisa siingi si Nasae yatudiirira, mbekongooya nimboola endi: Muweeyo emibiri cheeng'we eyiri Nasae chibe koti esiyaanwa silamu, esyolerefu, handi esisangaasa Nasae. Ohwo nihwo ohwinamira Nasae hw'omwooyo hu muhoyeere ohumubeeresa. 2Mutalondakana nende esaambo ch'omusyaalo sino, nae lehe Nasae abakaluhanie mu myooyo mani muchuusire elalira ebibaaso byeeng'we. Mani hu munyale ohumanya bi Nasae adaha ebilai bimusangaasa handi ebyolerefu elalira. 3Nae ohweema hu sisa si Nasae yaamberesa koti esiyaanwa, mboolera buli muundu hweeng'we endi: Otabasaangaho oti oli akulu ohuhira koti lwooli. Ohutusaho, ba omuyenjeefu mu bibaaso byao, handi buli muundu hweeng'we yeyire koti ohoyera efukiirira yi Nasae yamubeeresa. 4Huli nende ebituundu bikabuhaane hu mubiri mulala, handi buli situundu siri nende omulimo kwaasyo. 5Mu ngeri nasilala, kata hwahaba nihuli abaangi, huli omubiri mulala mu Kristo, handi fwesi hwambaanisibwa alala koti ebituundu bikabuhaane by'omubiri mulala. 6Mani sakira huhoyeere ohwehoonyera ebiyaanwa bitaali nasilala ohweema hu sisa si Nasae yatubeeresa. Esiyaanwa syeefwe nisiri esy'ohulomaloma emboosi ya Nasae, lehe husyehoonyere ohweema hu fukiirira yihuli nayo; 7nisiri esy'ohuhalaabana, leha huhalaabane; nisiri esy'ohweekesa leha hweekese, 8nisiri esy'ohugumia abandu bandi, leha hugumie. Oyo yeesi okaba leha akabe nende omwooyo mulala; oyo yeesi oli nende obunyala leha ahole nende amaani; oyo yeesi okwiira abandu esisa leha ahole atyo nende esangaalo. 9Ohudaha hweeng'we huhoyeere ohuba ohwadyeeri hweene. Muhaye esibi, nae mwomiirire hu silayi. 10Dahaneenge nende emyooyo misangaafu koti abebulanwa mu Kristo, handi mube abetekefu ohwiisaniamo oluyaali. 11Muhole emirimo nende amaani, handi mutaba abakata. Muhalaabanire Omwaami nende emyooyo cheeng'we choosi. 12Lehe esuubi lyeeng'we libabeerese esangaalo, mube abandu besimiirisa mu bidinyu byeeng'we, handi mwekongooye buli siha. 13Kabaneenge ebiindu byeeng'we nende Abakurisito bamanani basyeeng'we, handi bukaanireenge abakeni mu madaala keeng'we. 14Mwekongooye Nasae abeerese emikisa abo ababalwaania. Mu bwadyeeri bweene, mu mwekongooye aberese abandu abo emikisa ataali ohubabeeresa ebiholimo. 15Musangaalireenge alala nende abo abali mu sangaalo, handi mulire nende abo abali ohulira. 16Muchuunirweenge buli muundu ataali ohukwiira abandi. Mutewuliraanga, ohutusaho mufukiirireenge emirimo choosi kata chahaba echa aasi. 17Omuundu yeesi nabahola ebibi, mutamutungaanga nimumuholera esibi mwesi. Mukeseho koti lu munyala ohuhola esiindu si buli muundu abona ati silayi. 18Mukeseho koti lu sinyalihana, ohubona muti, muli nende emireembe nende buli muundu. 19Basyaange, omuundu yeesi nabaholera esibi, mutetungaanga nimumuholera esibi mwesi, ohutusaho lehe etima lya Nasae lyeene limutuunge. Olwohuba ebyandiiko byolerefu biboola biti, “Omwaami aboola ati, njia ohuholera bubi oyo owuholera bubi, njia ohwetuunga.” 20Ohutusaho, koti lu byandiiko byolerefu biboola biti: “Enjala niyiluma abasuku beeng'we, mubabereseenge esy'ohulya; obuluwo nibubaluma, mubabereseenge esy'ohung'wa; olwohuba nimuhola mutyo, awo mucha ohukera esoni nyiingi chibadiire.” 21Mutakanya esibi ohubafuka; ohutusaho, muyiingireenge esibi nimuhola ebiindu bilai.

will be added

X\