ABAROOMU 11

1Bulaanu teeba endi: Nasae yahaya abandu bae beene? Mubwadyeeri bweene haba! Ese mweene ndi Omuyisirayiri, omwichuhulu wa Yibbulaimu, mulala hu b'oluyia lwa Bbenjamini. 2Nasae haba siyahaya bandu bae, bayadoola ohutula mu huchaaka. Mumanyire bi byandiiko byolerefu biboola mu situundu si Elija yekwederamo Nasae hulw'Abayisirayiri ati: 3“Omwaami, beeta abanabbi bao, handi bagemula alutaari chao; Niise syeng'ene odoong'ere, handi bangiiya ohunjita hwosi.” 4Nasae yamukobolamo atye? Yamukobolamo ati, “Ndamala ohwebiihira abandu boola aambi elifu chitaanu-na-chibiri abatenamiraho nasaye otaali owadyeeri, olaangwa ati, Bbaali.” 5Sakira ohwoola bulaanu mu engeri nasilala eyo: basidoong'ereo abandu badiidi mu bandu ba Nasae yedooleramo hulw'esisa syae. 6Ohudoola hwae hweema hu sisa syae, ataali ohweema hu biindu bilai bi muundu ahola, olwohuba biba byeema hu bilai bi muundu ahola, esisa syae esyo haba sisyahabeere esisa syadyeeri. 7Bulaanu siina syeene? Abandu Bayisirayiri haba sibanyoola esiindu sibaba nibakoonya. Kwali omukaanda mudiidi busa, ku Nasae yadoola okwanyala ohusinyoola; abandi nabo beehola abadiimbe eyiri omulaanga kwa Nasae. 8Koti lu byandiiko byolerefu biboola biti, “Nasae yasiruwasa emyooyo chaabwe nende ebibaaso byaabwe; ohwolera elalira hu ludaalo luno lweene, haba sibanyala hubona oba ohuwulira.” 9Handi Daudi yaboola ati, “Ebidyaalo byaabwe bihoya byehola emiteego chibateka, chaabadiira; bahoya baakwa, bahoya basaandisibwa! 10Emoni chaabwe chihoya chawofula, baahaya ohubona; handi bahoye bewunamire mu bidinyu byaabwe ebiha byoosi.” 11Sakira teeba endi: Abayudaaya nibegumula baakwa basihirira elalira? Haba daawe! Olwohuba bahola ebibi, obuwonia bwiichire eyiri Abateende, ohukera Abayudaaya badiirire Abateende ehali-hali. 12Ebibi by'Abayudaaya byaleetera esyaalo syoosi esisa siingi handi ohukwa hwaabwe, hwaleetera Abateende esisa siingi. Mani bulaanu esisa syae syahaake yena obuungi Abayudaaya boosi nibahabalirwemo! 13Bulaanu nomaloma n'ang'we Abateende: Nisisiiri omutume w'Abateende, njia ohwefumia mu mulimo kwaange. 14Awundi nyala ohukera abandu b'oluyia lwaange ohuba nende ehali-hali, hu nyale ohuwonia hoomo abaandi. 15Olwohuba nibasukunwa erwaanyi, abandu bandi boosi bakaluhanisibwa baahaya ohuba abasuku ba Nasae beehola abeecha bae. Syahabe sitye nibafukiriirwe? Bwahabe obulamu eyiri abafwa! 16Bulaanu esituundu sy'omugaati sitaangira nisibeeresebwa Nasae, esyo syekesa siti omugaati kwoosi kwae kwosi; handi emisi ch'omusaala nichibeereswa Nasae, amasaga kae kosi. 17Amasaga kandi k'omutuli kwataakwa nikahalakwaho, esaga ly'omutuli kw'omusiino lyamala lyongwaho. Eng'we Abateende muli koti omutuli kw'omusiino okwo, mani bulaanu mukabana hu bulamu bw'omwooyo bungi bw'Abayudaaya. 18Mani sakira, simuhoyeere ohulekeresa abo abahalakwaho koti amasaga. Munyala mutye ohwewulira? Muli esaga busa; haba sineeng'we abasiira emisi, nae emisi nicho echibasiira. 19Nae eng'we mucha ohuboola muti, “Eee, nae amasaga kandi kahalakibwaho hu katwikulire obweyaango.” 20Esyo syadyeeri. Kahalakwaho olwohuba sikali nikafukiirira, nae eng'we mudoong'a mu sifwo esyo olwohuba mufukiirira. Nae esyo sitakera mwewulira; ohutusaho, mube abatiiririrwa. 21Nasae otasaasira Abayudaaya, abali koti amasaga keene; mubaasa muti neeng'we baacha ohusaasira busa? 22Ano hubona koti Nasae ali ow'esisa, handi koti ali omwaalaba. Mwaalaba eyiri abo abakwa, nae w'esisa eyiri eng'we, nimwemeeda ohuba mu sisa syae. Nae nimuhaya, mwesi mucha ohuhalakwaho. 23Nae Abayudaaya nibalehana nende obutafukiirira bwaabwe, bacha ohukalusibwa mu sifwo sibalimo hale; olwohuba Nasae ali nende obunyala bw'ohubakalusa. 24Eng'we Abateende muli koti esaga ly'omutuli kw'omusiino elyahalakwa mani lyoongwa hu mutuli mutaake, koti lusitabechaanga. Abayudaaya nabo bali koti omutuli kwataakwa kuno; mani sichia ohwanguyira Nasae muno, ohuwambaania amasaga kahalakwaho kano hu musaala kwaako kweene. 25Basyaange, aliwo obwadyeeri bw'esyaama bundaha mumanye, hu muhaye ohubaasa muti muli abakesi. Obwadyeeri obwo buli buti, esyeejo sy'abandu Bayisirayiri haba sisichia hubaao endaalo choosi, nae sichia ohubaao ohwoola lu bandu Abateende boosi bacha ohwiicha eyiri Nasae. 26Handi yino niyo engeri yi Yisirayiri yoosi yicha ohuwonisibwamo. Koti lu byandiiko byolerefu biboola biti, “Omuwonia achia ohutula mu Siyooni handi atuse ebibi byoosi mu beechuhulu ba Yakobbo.” 27“Njia ohuhola elakano lino nabo nimalao ebibi byaabwe.” 28Olwohuba Abayudaaya bahaya Emboosi Ndai, beehola abasuku ba Nasae hulw'obulayi bwa Abateende eng'we. Nae ohweema hu hudoola hwa Nasae, beecha bae, hulw'obulayi bwa bakuuka yaabwe. 29Olwohuba Nasae haba saakaluuhania ebibaaso byae bidiira hu muundu yiya doola, handi yaaberesa ehabi. 30Nae eng'we Abateende, mwali mwahaya hale ohuwulira Nasae; nae bulaanu, mwanyoola esisa sya Nasae olwohuba Abayudaaya bahaya ohuwulira Nasae. 31Mu ngeri nasilala eyo, ohweema hu sisa sya Nasae simwanyoola, Abayudaaya bulaanu sibawulira Nasae, hu bulaanu bosi banyale ohunyoola esisa sya Nasae. 32Olwohuba Nasae yahola abandu boosi ohuba ababoye b'obutawulira, hwaanyale ohukwiira boosi esisa. 33Engaanga ya Nasae nga nyiingi muno! Amakesi kae nende ohumanya hwae nga bibitiirifu! Wiina mweene onyala ohunyonyola eheengao yae? Wiina mweene onyala ohumanya engeri chae? 34Koti lu byandiiko byolerefu biboola, “Wiina omanyire ebibaaso by'Omwaami? Wiina onyala ohumukerakira?” 35“Wiina owali niyamubaaho esiindu syoosi, hwaanyale ohuba nahoyeere ohusituunga?” 36Olwohuba ebiindu byoosi byalongebwa nae, handi ebiindu byoosi bibaao ohumubitiramo handi biriwo hulwae. Nasae anyoole oluyaali endaalo choosi! Amiina.

will be added

X\