ABAROOMU 1

1Ebbarwa yino yitula eyiri ese Paulo omuhalaabani wa Kristo Yesu, handi owalaangwa ohuba omutume, yi Nasae yadoola handi ya laanga ohuyaala Emboosi yae Ndai. 2Nasae yasuubisa Emboosi Ndai hale muno nabitira mu banabbi bae koti lu syandiikwa mu byandiiko byolerefu. 3Emboosi Ndai yino yidiira hu Mwaana wae, Omwaami weefwe, Yesu Kristo. Koti omuundu, yebulwa koti omwichuhulu wa Daudi; 4nae koti obwolerefu bwa Nasae bwae, yeekeswa nende amaani maangi koti lwali Omwaana wa Nasae nasyuhisibwa ohutula mu hufwa. 5Ohubitira mu Kristo, Nasae yambeeresa oluyaali lw'ohuba omutume, hu nyale ohuyaalira abandu boosi banyale ohufukiirira handi ohuba abawulisi hulw'eliita lyae. 6Sino syosi sidiira hw'eng'we abali mu Roomu, ba Nasae yalaanga ohuba abandu ba Yesu Kristo. 7Mani sakira mbandiikira eng'we mweesi abali mu Roomu, ba Nasae yadaha mani yaalaanga ohuba abandu bae beene. Lehe Nasae Seefwe, nende Omwaami Yesu Kristo bababeerese ehabi nende emireembe. 8Ndangira ohwebasa Nasae wange nimbitira mu Yesu Kristo hulw'eng'we mweesi, olwohuba esyaalo siwulira ebidiira hu fukiirira y'eng'we. 9Nasae mweene niye omujulisi wange ati bimboola by'adyeeri-Nasae oyo yi halaabanira nende omwooyo kwaange kwoosi ni njaala Emboosi Ndai yi diira hu Mwaana wae. Nasae amanyire ati 10buli lu ndekongooya mbechulisaanga. Ndekongooya endi Nasae mu hudaha hwae, bulaanu yambereseho obweyaango bw'ohubakeniya. 11Olwohuba ndekoomba muno ohubabona, hu nyale ohukabanaho nang'we esiyaanwa sya Mwooyo ohubagumia. 12Amahulundu mbwe, eng'we alala naange hucha ohunyoola obuhoonyi hu siha silala, eng'we muhoonyibwe hulw'efukiirira yange, handi syesi hulw'efukiirira y'eng'we. 13Basyaange, muhoyeere mwichulise muti, ndahatekehaho amahabi maangi ohubakeniya, nae buli lu ngesaho siriwo esiindu singayiraanga ohwiicha. Ndaha nyooleho abafukiiriri mweng'we, koti lu ndanyoola mu Abateende bandi. 14Olwohuba ndi nende omulimo muhoongo muno okw'ohuhalaabanira abandu boosi, Abayonaani nende abakafwiiri, abakesi basoma alala nende abasiru batasomaho. 15Sakira ndi nende obwekoombi ohuyaala Emboosi Ndai eyiri eng'we mwesi abali mu Roomu. 16Ese siswalaangaho kata nabudiidi hulw'Emboosi Ndai; olwohuba Emboosi Ndai yino, niyo amaani ka Nasae ak'ohuwonia boosi abafukiiririra, ohutangira elalira hu Bayudaaya ohwolera elalira hu Abateende bosi. 17Olwohuba Emboosi Ndai yitumbula koti lu Nasae atuhola hwaaba abalungifu alala nae, ohubitira mu hufukiirira hwong'ene. Koti lu byandiiko byolerefu biboola biti, “Omuundu oholebwa yaaba omulungifu alala nende Nasae ohubitira mu fukiirira achia ohuba omulamu.” 18Nasae yamala ohwekesera elalira ati, etima lyae licha ohutula Mukulu mani lisihirise abaholi b'ebibi boosi, abakera obwadyeeri bwa Nasae buhaye ohumanyihana hulw'ebiholwa byaabwe bibi. 19Nasae achia ohuboneresa olwohuba abandu boosi bamanyire obwadyeeri budiira hu Nasae, olwohuba Nasae mweene niye oweekesera elalira obwadyeeri buno. 20Ohutulira elalira lu Nasae yaloonga esyaalo, amaani kae kataakama nende obwanasaae bwae, byahaba nibitaboneha, bwaboneha elalira; bubonehera mu biindu bi Nasae yaloonga. Mani sakira abandu abo haba sibaliho nende esiindu syoosi sibahediisa ohuhaya ohumumanya! 21Abandu bamanya Nasae, nae bahaya busa ohumubeeresa oluyaali lu muhoyera, kata busa nende ohumwebasa. Ohumalaho, besiruwasa, mani embaasa yaabwe yibulamo obuhoonyi yechula esiirima. 22Buli lu bemeeda ohwelaanga abakesi, nilwo lu bemeeda ohweekesa koti lu bataamanyire esiindu syoosi daawe; 23mu sifwo sy'ohwiinamira Nasae otafwa, beenamira ebifwaanani biholebwa byaafwaana koti abandu bafwa, oba amayoni, oba ebisolo, oba ebisolo byambaaka. 24Mani sakira Nasae nae yesi yabaleha baachiiririra nende ohuhola ebiindu bimayaanu bi myooyo chaabwe chekoomba, mani baaholana ebiindu bidiisa esoni. 25Baleha ohwadyeeri budiira hu Nasae mani bomiirira hu bubacha; beenamira handi baahalaabanira ebiindu bi Nasae yalonga mu sifwo sy'ohwiinamira Omuloongi mweene, ohoyeere ohufumisibwa endaalo choosi! Amiina. 26Sakira Nasae yabaleha bemeeda nende obwekoombi bw'esoni. Kata abahasi baabwe badondobania eholegana nende abasaacha koti lu Nasae yatekeha, bachaaka ohwehola ebitahoyera. 27Mu ngeri nasilala, abasaacha bosi baleha ohuholegana nende abahasi koti lu Nasae yatekeha, mani bachaaka ohwekombana abeene-na-beene. Abasacha baholana ebiindu by'esoni, mani esitulamo beleetera abeene ohusaandisibwa huchaana nende ebiholwa byaabwe bibi. 28Olwohuba abandu abo bahaya ohuta ebibaaso byaabwe hu makesi k'adyeeri kadiira hu Nasae, Nasae yabaleha ohwemeeda mu bibaaso byaabwe bidondobanu, mani bahola ebiindi bibatahoyera ohuhola. 29Mani beechula omufuto kw'abuli ngeri, obubi, omuluulu, nende ebiindu bitahoyera ohuhola; beechula ehiinda, obwiiti, ohulwaana, obubacha, nende ohubaasira abandi obubi. Bamoonya, 30handi balomalomanaho ebiindu bibi; sibadaha Nasae, banyekani, bepaaha, handi beniinia; bakoonyeresa engeri nyiingi ch'ohuholeramo ebibi; sibawulira abebusi baabwe; 31babulamo ebibaaso bilai; sibooseresa bibasuubisa, handi haba sibakwiira sisa, oba ohwesasira abasyaabwe. 32Bamanyire bati amalako ka Nasae kaboola kati, abandu bali mu bulamu bw'engeri yino, bahoyera ohufwa. Nae, esihiramo obubi, sibaakama ohuhola ebiindu byeene bino, nae basiima kata abandu bandi abahola ebiindu nasilala koti ebyo.

will be added

X\