OHUBWIIHULIRWA HWA YOWAANA 9

1Bulaanu malaika wa hataanu yesi yeecha yoobba eturumbeta yae. Mani ndeecha ndaabona ening'ining'i yira yali niyikwiire hu syaalo, niyiberesebwa olufunguyo lw'ekotero. (Sino nisyo esifwo siri aasi muno mu loba yi misaambwa chali nichabooyerwa ohwoola lu chiriheengerwa omusango kumaliirihayo.) 2Ening'ining'i eyo mani yeecha yekulawo ekotero elyo, mani omwoosi nikwiicha nikubbwomooha erwaanyi nikuyituliramo, okufwaanana nende omwoosi kutula hu syoosyo sihoongo muno. Obulafu bw'elyuuba alala nende emboo byeecha byaamaliyisibwa nende omwoosi kwali nikutula mu kotero elyo. 3Esike enyiingi chosi cheemawo chachaaka ohwiiha aasi hu syaalo nichitula akulu mu mwoosi okwo. Chosi cheecha chabeeresebwa amaani kali nasilala nende ak'engoberanyaanja. 4Esike echo cheecha chaabolerwa chitalumaho kata hu lunyaasi lwoosi, oba hu musaala kwoosi, oba hu simera syoosi. Chali chitekeheebwe ohuluma abandu bong'ene, abali nibataali nende omuhuuri kwa Nasae hu bweeni bwaabwe. 5Nae esike chino haba sichafukiirirwa ohwiita abandu bano daawe. Nae chali nichiboleerwe ohuboneresa busa abandu bano hulw'embaka y'emyoosi chitaanu chong'ene. Nae obuchuuni bwali nibweema hu huboneresa hw'esike echo, hwali nihwakana nende obuchuuni bweema hu huluma hw'engoberanyaanja. 6Mu myoosi chitaanu echo abandu abo bacha ohuba nibekombaanga ohufwa, nae ohufwa haba sihuchia hwiichiraho yibali daawe. Bacha ohwekombaanga bati bafwe, nae ohufwa hucha ohubeeruhaanga busa nihubatulaho. 7Esike chira chali nichifwaanana nende esuhiri chitekeheebwe ohuchaaka ohulwaana ebiita. Hu mitwe chaacho hwaliho ebiindu byafwanaanga koti ekofya ch'obutuki ech'esaabbu, nae obweeni bwaabwe bwafwananaanga koti obweene bw'abandu. 8Amafwiiri kaacho kali nikafwaanana nende amafwiiri k'abahasi, nae ameeno kaacho kali nikafwaanana nende ameeno k'edalang'i. 9Ebirifu byaacho byali nibibwihiibweho ebiindu bifwaana koti ehuumba ch'ohubirifu ch'echuma, nae esiyooka syali nisiholebwa nende embaya chaacho, syali koti esiyoka siholebwaanga nende ebigaali biingi bihwesebwanga esuhiri nibiiruha nibicha ohulwaana ebiita. 10Chalichiingi nende emihira nende eminwa ebifwaanana nende eby'engoberanyaanja, mani chali nichicha ohwehoonyeraanga emihira chaacho echalimo amaani k'ohuboniabonia abandu abo hulw'emyoosi chitaanu emilaamba. 11Chali chiri nende omutuki wali nachituka, owali niye malaika owali naali nende obunyala bwoosi mu kotero elyo. Eliita lyae mu lulimi Luyibbulaniya nilyo, Abadooni. Nae mu lulimi Luyonaani, nilyo, Apolyooni (esyeekesa mbwe, “Omusihirisi” ) 12Esinyaaso sitaangira siweere. Lunyuma lwasino, handi yiriyo ebinyaaso biindi bibiri ebicha ohwiicha. 13Mani bulaanu malaika wa hasaasaba yesi yemawo yoobba eturumbeta yae. Mani ndeecha bulaanu ndaawulira ekono litulira mu bw'ekoona chine obw'alutaari y'esaabbu yali niyiri mu moni wa Nasae. 14Ekono elyo lyali niliboolera malaika wa hasaasaba wula liti, “Lehuula bamalaika bane bala ababoyerwa hu Yufureete omwaalo muhunuufu!” 15Mani, bamalaika bane bala beecha balehuulibwa. Handi esaa yeene yino, ey'oludaalo lweene luno, olw'omwoosi kweene kuno, nende omwaaka kweene kuno, bali nibamala ohutekehebwa ohwiita esituundu silala hu bituundu bidatu sy'abandu boosi. 16Mani ndeecha ndaboolerwa obuungi bw'abamaye balwaani. Boosi alala bali emilioni emia chibiri enaamba. 17Nae mu huboneherwa hwange, ese ndeecha ndaabona esuhiri echo, nende abeerusi bacho. Bali nibefwaalire, ehuumba ch'ohubirifu ch'amabbaati echa ranjaayi koti omuliro, bbulu koti Safira, handi namuki koti elyuuba. Emitwe ch'esuhiri chalichiingi nichifwaana nende emitwe ch'edalang'i, nae handi mu minwa chaacho mwali nimutulaangamo omuliro, omwoosi, nende maratutu. 18Mani esituundu silala hu bituundu bidatu by'abandu byetibwa nende enyiimbe sihirisi chidatu chira. Omuliro, omwoosi, nende maratutu nibyo ebyali nibitulaanga mu minwa ch'esuhiri chira. 19Olwohuba amaani k'esuhiri chira kali nikali mu minwa chaacho nende mu mihira chaacho. Emihira chaacho chali nichifwaanana nende enjuha chiriho emitwe, mani esuhiri chino, cheehoonyera emihira chino ohunyaala abandu. 20Abandu boosi abali basikaaleo, abali nibatetiibwe nende enyiimbe chino, handi abatakaluuhana baatula hu biindu bibeene bali nibeholera. Haba sibaakama ohwiinamiraanga emisaambwa, oba ebiindu byaholebwa mu saabbu, mu feesa, mu mugasa, mu makina, nende mu mbaao, ebiindu bitanyala hubona, huwulira, oba ohukeenda daawe. 21Kata nende abahaya ohweyolobya obwiiti bwaabwe, obuholi bw'amaya bwaabwe, obucheke bubi, oba obwiibi bwaabwe.

will be added

X\