OHUBWIIHULIRWA HWA YOWAANA 8

1Ekoondi doto nilyeecha lyaboolola ohwiikula esifuundiho sya hataanu-na-habiri, yeecha yaabawo esimiisi Mukulu esyamala embaka y'esituundu sy'esaa. 2Mani bulaanu ndeecha ndaabona bamalaika bataanu-na-babiri abamenya nibeema busa mu moni wa Nasae, nibeecha nibabeeresebwa eturumbeta chosi chitaanu-na-chibiri. 3Malaika wundi, owali ali nende esisaambiro sy'obubbaani esy'esaabbu, yeecha mani yeema hu alutaari. Malaika oyo yeecha yabeeresebwa obubbaani obubitiirifu ohumeeda hu masaayo k'abandu ba Nasae boosi, handi nende ohubutaayo hu alutaari y'esaabbu eyeemesebwa mu moni w'esisaala sy'obutuki. 4Mani omwoosi kw'obubbaani buli ohwaaduha kweecha kwachaaka ohudumuuha nikuniina akulu nende amasaayo k'abandu ba Nasae, nibitula mu mahono ka malaika oyo niyeemere mu moni wa Nasae. 5Handi malaika oyo yeecha yaabukula esisaambiro sy'obubbaani sira, mani niyeecha nasiichusamo omuliro kutula hu alutaari, mani naamala nasisukuna hu syaalo huno. Mani yeecha yabaawo ohutokoolehana alala nende ohwaduluhana hw'ekulu huloondehana, ohumesuhana hw'emesu, alala nende musisi. 6Bulaanu, bamalaika bataanu-na-babiri bala, beecha beetekeha ohuhubba eturumbeta chitaanu-na-chibiri chaabwe chira. 7Mani malaika otangira yeecha yoobba eturumbeta yae. Amakina k'efula alala nende omuliro, nibisasaanire nende amabaanga, nibyeemao nibichaaka ohubbwomooha aasi hu syaalo. Esituundu silala hu bidatu by'esyaalo syeecha syaaya syaawa pe, esituundu silala hu bidatu by'emisaala, syosi syeecha syaaya syaawa, handi nende buli saafu ly'obunyaasi bwa bunyaasi lyaya. 8Handi bulaanu, malaika wa habiri yesi yeecha yachaaka ohuubba eturumbeta yae. Mani esiindu siindi sifwaana koti olugulu lu hoongo muno oluli ohwaaduha omuliro, syeecha syasukunibwa syaweera mu nyaanja. Mani silala hu bituundu bidatu by'enyaanja syeecha syakaluuhanisibwa syaaba amabaanga mereere, 9silala hu bituundu bidatu by'ebiloonge bilamu biri mu nyaanja eyo syafwa syoosi, handi esituundu silala hu bituundu bidatu by'emeeri choosi syeecha syasihirisibwa. 10Mani handi, malaika wa hadatu yesi yeecha yoobba eturumbeta yae. Mani ening'ining'i hoongo muno, niyaaduha koti esikeenga, niyiicha niyaakuha ohutula akulu mu maleesi, mani niyiicha niyikwa hu situundu silala sy'ebituundu bidatu by'emyaalo handi nende hu sulo ch'amaachi. 11(Eliita ly'ening'ining'i eyo lyali mbwe “Ohuhahaata” ) Mani esituundu silala hu bituundu bidatu by'amaachi syeecha syalula syahahaata, mani abandu baangi muno beecha baafwa muno hulwohung'wechangaho hwaako maachi, olwohuba kali nikalulire. 12Bulaanu, malaika wa hane yesi yeecha yoobba eturumbeta yae. Esituundu silala hu bituundu bidatu by'elyuuba syeecha syaahubbwa, handi esituundu silala hu bituundu bidatu by'omwoosi byosi byeecha byaahubbwa, handi nende esituundu silala hu bituundu bidatu by'ening'ining'i byosi bityo, hu mani obulafu bwaabyo bweecha bwatusibwaho esituundu silala hu bituundu bidatu by'ohwaaduha hwaabyo. Obulafu bweecha bwaahaya ohubaao hu mbaka y'esituundu silala hu bituundu bidatu by'esideete, handi nende hu situundu silala hu bituundu bidatu by'esiro. 13Mani ndeemao ndatingaala, mani ndeecha ndawulira eswi yali niyibburuuhe niyibengeraanga akulu muno mu mboo, niyiboola mu kono hoongo yiti, “Eee amasira! Amasira! Nga chinyoolere abandu bamenya hu syaalo boosi, nikali mbwe handi bacha ohuwulira ekono ly'eturumbeta liindi, bamalaika bandi badatu bala nibanaba niboobba eturumbeta chaabwe!”

will be added

X\