OHUBWIIHULIRWA HWA YOWAANA 7

1Luunyuma lwa bino, ndeecha handi ndaabona bamalaika bane nibeemere hu nyaande chine ch'esyaalo sino, nibehaliire emboo chine, hu abulewo emboo yoosi eyinyala ohuwuucha hu syaalo, oba hu nyaanja, oba ohuubbaho hu musaala kwoosi. 2Handi ndeecha ndaabona malaika wundi niyeecha natulira ebutula-lyuuba nakiingire omuhuuri kwa Nasae mulamu. Malaika oyo yemawo yalaanga mu kono hoongo bamalaika bane bala, ba Nasae yali naamalire ohubeeresa obunyala ohusihirisa esyaalo nende enyaanja. 3Malaika wuno yemawo yaboola ati, “Mutanyaalaho esyaalo, enyaanja, oba emisaala, ohwoola lu huba nihumalire ohuta ahalolero hu bweeni bw'abahalaabani ba Nasae weefwe, nende omuhuuri kwa Nasae.” 4Mani ndeecha ndaboolerwa mbwe, obuungi bw'abandu bateebwaho ahalolero nende omuhuuri kwa Nasae hu bweeni bwaabwe, bali (Elifu emia ndala nende amahumi kane nende chine 144000.) Bali abandu batula mu njia ehumi-na-chibiri cha Yisirayiri, 5abandu 12000 bali batula mu luyia lwa Yuda, abandu 12000, mu luyia lwa Rewubeeni, abandu 12000, mu luyia lwa Gaadi, 6abandu 12000, mu luyia lwa Asheri, abandu 12000, mu luyia lwa Nafutaali, abandu 12000, mu luyia lwa Manaase, 7abandu 12000, mu luyia lwa Simioni, abandu 12000, mu luyia lwa Leefi, abandu 12000, mu luyia lwa Yisakari, 8abandu 12000, mu luyia lwa Sebbulooni, abandu 12000, mu luyia lwa Yosefu, abandu 12000, mu luyia lwa Bbenjamini 9Lunyuma lwa bino byoosi, mani yeecha yabaawo okudiiyiha kubitiirifu nga abulao omuundu yeesi onyala ohubala abandu abo boosi daawe! Bali abandu batula mu buli bwibulanwa, luyia, syaalo, nende olulimi, mani beecha beema mu moni w'esisaala sy'obutuki nende ow'Ekoondi doto, nibafwaalire amaganjuula ka rachaari, handi nibadiirire amasaafu k'esaasa mu mahono kaabwe. 10Beecha behuuma mu kono hoongo nibaboola bati, “Obuwonia butula eyiri Nasae, owihaale hu sisaala sy'obutuki, handi nende hu Koondi doto!” 11Bamalayika boosi beecha beema bebodoohania esisaala sy'obutuki, kata nende abahuluundu boosi, handi nende ebiloonge bilamu bine bira. Mani beecha boosi alala baakwiira obweeni aasi, mu moni w'esisaala sy'obutuki mani baamala beenamira Nasae, 12nibaboola bati, “Amiina, efuma, oluyaali, amakesi, ohwebasa, esitiibwa, obunyala nende obuhunuufu, byoosi bya Nasae weefwe, endaalo choosi! Amiina!” 13Mulala hu bandu bahuluundu yeecha yandeeba ati, “Bano bandu siina nibo abafwaalire amaganjuula ka rachaari, handi batula yena bweene?” 14Naange ndeecha ndamukobolamo endi, “Omuhuluundu, ese haba siimanyire daawe. Ngandi niiwe omanyire,” Nae yeecha yamboolera ati, “Bano nibo abandu banyala ohubita bulai bweene mu hu saandisibwa. Boosa amaganjuula kaabwe, mani baakahola kaaba rachaari nibehoonyera amabaanga k'Ekoondi doto. 15Esyo nisyo esikera nibanyala ohwiicha beema mu moni w'esisaala sy'obutuki sya Nasae, ohumuhalaabanira esideete nende esiro, mu nyumba yae. Mani oyo owihaale hu sisaala sy'obutuki, niye ochia ohubechaanga nabo naabaliinda. 16Haba saaliwo ehabi liindi daawe, nibacha handi ohulumwaho enjala, kata nende obuluwo. Kata busa elyuuba, oba obubafu bwoosi obusaamba, haba sibicha hunyala ohubasaambaho daawe, 17olwohuba Ekoondi doto, oli akati-kaati w'esisaala sy'obutuki, niye ochia ohuba omwaayi waabwe, mani achia ohubayiriraanga eyiri esulo ch'amaachi kaleeta obulamu. Handi Nasae mweene niye ochia ohubeeyaho amasika koosi, hu moni chaabwe.”

will be added

X\