OHUBWIIHULIRWA HWA YOWAANA 5

1Ese ndabona esitabo siikale mu muhono muluungi kw'oyo owihaale hu sisaala sy'obutuki. Olupapula olwo, niluliho obwandiike hu nyaande choombi, handi lwali niluli syaboywa nende ebifuundiho bitaanu-na-bibiri. 2Handi ndeecha ndatingaala ndaabona malaika muhunuufu mweene, oweecha yalaangirira mu kono hoongo ati, “Naanu mweene ohoyera ohuhalaka ebifundiho bino, mani yabwiihula olupapula luno?” 3Nae yabulao omuundu yeesi, kata Mukulu, oba hu syaalo, oba mu syaalo sy'aasi, owali nanyala ohutuumbulula olupapula olwo yewuunja mukati waalwo. 4Ndeecha ndaalira ng'ofwa, olwohuba abulao omuundu wali anyala ohunyoolehana owali nahoyera ohutuumbulula olupapula olwo, handi kata nende ohutingaala mukati waalwo. 5Mani mulala hu bahuluundu yeecha yamboolera ati, “Otalira daawe. Bona! Edalang'i ohutula mu luyia lwa Yuda, omwichuhulu muhunuufu mweene wa Daudi, amalire ohuyiingira, mani niye onyala ohuhalaka ebifuundiho bino bitaanu-na-bibiri, handi yaamala yatumbulula nende olupapula luno.” 6Mani ndeecha ndatingaala mani ndaabona Ekoondi doto nilyeemere akati w'esisaala sy'obutuki, nilibodohanisiibwa nende ebiloonge bilamu bine bira, alala nende abahuluundu bala bosi. Ekoondi doto lira lyabonehana koti elyali nilimalire ohwiitwa. Lyaliho enjika chitaanu-na-chibiri, nende emoni chosi chitaanu-na-chibiri echiri nicho myooyo chitaanu-na-chibiri cha Nasae, echatumibwa ohusalaanira mu syaalo sino syoosi. 7Ekoondi doto lyeecha lyasiingira lyaacha lyaabukula olupapula ohutula mu muhono muluungi kw'oyo owali niyehaale hu sisaala sy'obutuki. 8Mani koti lulyali naahola atyo, ebiloonge bilamu bira bine, alala nende abahuluundu amahumi-kabiri-nende-bane bala, beecha haakwa aasi mu moni w'Ekoondi doto elyo. Buli otula yali nende obuhana nende ebbakuli ch'esaabbu nichichuule obubbaane, obuli nibwo amasaayo k'abandu ba Nasae. 9Beecha bachaaka ohweemba olweembo luyaaha bati, “Niiwe ohoyera ohubukula olupapula olwo handi nende ohuhalaka waamalaho ebifuundiho by'alwo. Olwohuba weetibwa, mani ohubitira hu hufwa hwao hw'ohwewaayo, wanyala ohukulira Nasae abandu batula mu buli luyia, lulimi, syaalo, handi nende ekabbila. 10Wabahola ohuba obwaami bw'abalaamisi ohuhalaabanira Nasae weefwe, handi nibo abacha ohutuka hu syaalo huno.” 11Mani handi ndeecha ndatingaala, mani handi ndawulira bamalaika, nibali mu malifu nende mu mamilioni! Boosi bali nibeemere nibebodohaanie esisaala sy'obutuki, nende ebiloonge bilamu bine bira alala nende abahuluundu bala bosi, 12mani beemba mu kono hoongo bati, “Ekoondi doto lyeetibwa nilyo elihoyera ohunyoola obunyala, obunyali, amakesi, nende amaani, esitiibwa, oluyaali, nende efuma!” 13Mani handi ndeecha ndawulira buli siloonge siri Mukulu, hu syaalo, mu syaalo siri aasi, nende mu nyaanja ebiindu bilamu byoosi, mu buloonge bwoosi, - mani bali nibeemba bati, “Eyiri oyo owihaale hu sisaala sy'obutuki, handi nende eyiri Ekoondi doto, abe nende efuma nende esitiibwa, oluyaali nende obunyala bwoosi, endaalo choosi pe!” 14Mani ebiloonge bilamu bine bira nibiicha nibikobolamo biti, “Amiina!” Mani abahuluundu nibeecha nibakwa aasi nibenamira Nasae.

will be added

X\