OHUBWIIHULIRWA HWA YOWAANA 4

1Abweene ano, handi ndeecha ndanyoola ohuboneherwa hundi mani ndaabona olwiiki lwikuuhe Mukulu. Mani handi ekono elyali nilyuubba koti eturumbeta, nihaandi nimalire ohuliwuliraho nililomaloma naange hale, lyeecha lyaboola liti, “Niina wiicha akulu ano, mani hu hweekese esicha ohubaao luunyuma lwa sino.” 2Abweene awo, Mwooyo yeecha handi yaniinia. Ebweene eyo Mukulu, yaliyo esisaala sy'obutuki omuundu wundi nasihaaleho. 3Obweeni bwae bweecha bwamwemwenda koti amakina kakuswa ebbeyi hoongo muno, koti jasipa nende karineliya, handi ebiindu byoosi ebyali nibyebodoohanie esisaala sy'obutuki esyo, yaliyo oluyiingi luli nende eraangi yifwaana koti ekina liindi lilaangwa mbwe “emeraldi”. 4Nae ohwehuyungirisa esisaala sy'obutuki, yaliyo ebisaala by'obutuki biindi amahumi kabiri-na-bine, nibiihaalweho abahuluundu amahumi kabiri-na-bane, nibafwaalire echa rachaari handi nibefwaalire ekofya ch'obutuki ech'esaabbu. 5Nae ohutulira mu sisaala sy'obutuki esyo, mwatuliramo enjeserye ch'olumesu, ohududuma, alala nende ohwaduluhana huloondana. Nae mu moni w'esisaala sy'obutuki, yaliwo amataara kataanu-na-kabiri nikaaduha, ako niko emyooyo chitaanu-na-chibiri echa Nasae. 6Handi mu moni w'esisaala sy'obutuki, yaliyo esiindu sifwaana koti enyaanja y'egilaasi, niyimesamesana koti amakina k'efula. Ohwebodoohania esisaala sy'obutuki hu buli luwaande, yaliyo ebiloonge biindi nibyabwiihwa nende emoni, mu moni nende emukoongo bweene. 7Esitaangira syeene syali esifwaana koti edalang'i. Esya habiri syali sifwaanana nende esurusi. Esya hadatu nasyo syali nende obweeni bufwaanana nende obw'omuundu. Nae handi esya hane nasyo syali sifwaana nende eeswi yibburuuhe. 8Buli silala hu biloonge bine bira, syali nende embaya chisaasaba, nihaandi nga chabwiihibwaho nende emoni, erwaanyi nende mukati wacho. Esideete nende esiro, haba sibyaleheraangaho ohweemba biti, “Omwolerefu, omwolerefu, omwolerefu, niye Omwaami Nasae w'Obunyala bwoosi, owaliwo, oliwo, handi ow'ohubaao.” 9Ebiloonge bilamu bine ebyo, byeemba enyembo ch'oluyaali, esitiibwa alala nende ohwebasaanga, nibyeembera oyo owihaale hu sisaala sy'obutuki, olibaao omulamu endaalo choosi. Nae nibiri ohuholaanga bityo, 10abahuluundu amahumi kabiri-na-bane bala bakwa aasi mu moni w'oyo owihaale hu sisaala sy'obutuki, nibamwiinamira, oyo ochia ohubaao endaalo choosi. Basukuna ekofya chaabwe ch'obutuki aasi mu moni w'esisaala sy'obutuki esyo nibaboola bati, 11“Omwaami weefwe, handi Nasae weefwe! Ohoyera ohunyoola oluyaali, esitiibwa, nende obunyala. Olwohuba niiwe owaloonga ebiindu byoosi, nihaandi ohweema hu hudaha hwao, nilwo lubyeecha byaberesebwa obunyala bw'ohubaao handi nende ohuba abalamu.”

will be added

X\