OHUBWIIHULIRWA HWA YOWAANA 3

1“Eyiri malaika w'abafukiiriri bali mu Saradiisi, yandiika oti, ‘chino nicho emboosi chitula eyiri oyo oli nende mwooyo chitaanu-na-chibiri cha Nasae, nende ening'ining'i chitaanu-na-chibiri. Ese manyire bulai muno ebiindu byoosi byoosi ohuholaanga. Manyire endi oli nende eliita ly'ohuba omulamu, kata nende niwamala ohufwa! 2Mani siingira, mani odinye esyo syosisiiri nasyo nisiri esilamu, syosi nisitoola ohufwiira elalira. Olwohuba manyire endi, bimwahola haba sibyolerefu mu moni wa Nasae wange. 3Mani yichuliseho ebiindu bimweekeswaho nende bimwawuliraho. Mubifunihire, mani mumale mukaluuhane mutule mu bibi by'eng'we ebyo. Nae nimuhaya ohusimuha, njia ohwiicha yimuli koti omwiibi, mani haba simuchia hunyala ohumanya esiha siimba ninjia ohwiichiramo. 4Nae abandu badiidi hw'eng'we abali mu Saradiisi mwanyala ohuliinda engubo ch'eng'we nichiri endafu. Niing'we abacha ohukeenda naange, nimufwaalire echa rachaari, olwohuba niing'we abahoyera ohuhola mutyo. 5Abo boosi abayiingira bacha ohufwaalibwa echa rachaari mu ngeri yino, haandi siinjia husaangula ameeta kaabwe ohutula mu sitabo sy'abalamu. Njia ohulaangirira aalafu mu moni wa Laata yange, nende mu moni wa bamalaika endi nibo abandu bange. 6Nimuli nende amatwi, mani tekeerese bi Mwooyo aboolera abafukiiriri!’ 7“Eyiri malaika w'abafukiiriri bali mu Filadeefia, yandiika oti, ‘Chino nicho emboosi chitula eyiri oyo oli omwolerefu handi ow'adyeeri mweene. Niye oli nende olufunguyo lwali lwa Daudi, mani niyekula olwiiki lwoosi, abulao owuundi onyala ohulwiikala, handi nalwiikula, abulao owundi onyala ohulwiikala. 8Ese manyire bulai bweene ebiindu byoosi bimuhola. Manyire endi, muli nende amaani amadiidi muno. Mwaloonda enjekesa yange, handi mubereenge abeesikwa bange. Mani mbao mbekuliire olwiiki mu moni w'eng'we bweene, lu muundu yeesi abulao owahalwiikala daawe. 9Mani tekeerese! Omukaanda kwa Sitaani okwo, ababacha abo abelaanga mbwe ni Abayudaaya nibo nihane sibali batyo, njia ohubahola beeche mani basigame aasi mu makulu k'eng'we. Boosi bacha ohubonera elalira bati hane ese mbadaha muno. 10Olwohuba eng'we mwoseresa abweene elako lyaange ly'ohwesimiirisa, mani syesi njia ohubaliinda bulai ebiha by'ebidinyu ebiri ohwiicha hu syaalo huno, ohuhema abandu boosi abali hu syaalo huno, bihaye ohuboolaho. 11Mbao njicha bwaangu muno. Liinde bulai ebyo byoosi bi muli nabyo, omuundu yeesi ahaye ohunyala ohubeebaho omuheemba kw'obuyiingiri bw'eng'we. 12Ese njia ohuhola abo boosi abaliyiingira ohuba emisiiro mu nyumba ya Nasae wange, mani sibachia ohunyala ohutulamo daawe. Njia ohubandiikaho eliita lya Nasae wange, handi nende eliita ly'esiko sya Nasae wange, Yerusaalemu njiaha, esicha ohwiiha aasi nisitula Mukulu nisitula eyiri Nasae. Njia handi ohubandiikaho eliita lyaange yaaha. 13Nimuli nende amatwi, mani tekeerese bi Mwooyo aboolera abafukiiriri!’ 14“Eyiri malaika w'abafukiiriri bali mu Laodesia, yandiika oti. “Chino nicho emboosi chitula eyiri Amiina, omwesikwa handi omujulisi w'adyeeri, owatulwamo ebiindu byoosi bi Nasae yaloonga. 15“ ‘Ese manyire bulai bweene ebyo byoosi bimuholaanga. Manyire endi eng'we simuli kata abanyifu handi ababafu daawe. Nga ndahire muno mani nimwahabeere busa silala, hubibiri bino! 16Nae olwohuba mbwe muli busa abadunduumu, nga haba simuli ababafu oba abanyifu, mani bulaanu njia ohubafuucha busa mutule mu munwa wange! 17Muboola mbwe, Ese ndi omugaga mani ndi bulai muno. Ngandi ndi nende ebiindu byoosi bindaha. Nae haba simumanyireho koti lumuli abeelalihirirwa handi abasaasirwa! Muli abamanani, syekenye, handi abawofu. 18Mani ndi ohubakerakira ohungulaho esaabbu, esaabbu yitaalihoomo ahakoha daawe, hu munyale ohuba abagaga. Handi mukule nende engubo charachaari ohwefwalaanga abeene mani munyala ohubwiiha hu syekenye sy'esoni sy'eng'we esyo. Handi kuleho amafuta k'ohubahaho hu moni ch'eng'we echo, hu munyale ohubona bulai. 19Ese nyekaanga handi mboneresaanga abo boosi ba ndaha. Mani becheenge busa mu bwadyeeri, mani mukaluuhana mutula mu bibi by'eng'we. 20Mani tekeerese! Mbao nyemere hu lwiiki handi hong'oonda. Omuundu yeesi nawulira ekono lyaange, mani yeecha yekulawo olwiiki, njia ohwingira, mani nyale ohulya nabo, handi bosi banyale ohulya naange. 21Abo abayingira, njia ohubaba obunyala bw'ohwihala aambi naange hu sisaala syaange sy'obutuki, koti busa syesi ndayiingira mani bulaanu njihala aambi nende Laata, hu sisaala syae sy'obutuki. 22Nimuli nende amatwi, mani mutekeerese bi Mwooyo aboolera abafukiiriri!’ ”

will be added

X\