OHUBWIIHULIRWA HWA YOWAANA 22

1Handi malaika wuno yeecha yanjekesa omwaalo kw'amaachi k'obulamu, akang'enang'ena koti amakina k'efula, handi nikahulukusa nikatula mu sisaala sy'obutuki sya Nasae handi esy'Ekoondi doto 2handi nikahulukusa nikeehera akati-kaati w'engira y'omusiko esyo. Handi buli hu ndulo w'omwaalo okwo, hwaliho omusaala kw'obulamu, okwaama ebyaamo amahabi ehumi-na-kabiri buli mwaaka, ehabi lala buli mwoosi mulala. Handi amasaafu k'akwo ni amaoso kaonia ebyaalo. 3Abulao esiindu syoosi esyaholimirwa nende Nasae esicha ohunyoolehana mu siko esyo. Esisaala sy'obutuki sya Nasae, handi esy'Ekoondi doto nisyo esicha ohubechaanga mu siko esyo, handi abahalaabani bae nibo abacha ohumwiinamiraanga. 4Abeene abo nibo abacha ohunyala ohubonaanga obweeni bwae, nihaandi eliita lyae licha ohubechaanga nilyandiikibwa hu bweeni bw'abwe. 5Siyichia hubaayo obulafu bwoosi daawe, handi abandu balibaayo, haba sibachia huba nibadaha ohuba nende amataara oba omubasu daawe, olwohuba Omwaami Nasae niye ochia ohuba obulafu bw'abwe, mani handi nibo abacha ohutuka endaalo choosi pe. 6Handi malaika yeecha yamboolera ati, “Emboosi chino ch'obwadyeeri, handi chesikihwa. Mani Omwaami Nasae, oberesaanga abanabbi Mwooyo wae, niye otumire malaika wae ohweekesa abahalaabani bae esiindu sichia ohubaao mu siha simbikiti muno.” 7Yesu aboola ati, “Tekeeresa!” “Njicha bwaangu! Mani beehoye abo abafunihira emboosi ch'abanabbi chiri mu sitabo sino!” 8Ese, Yowaana, ndawulira handi ndaabona ebiindu bino byoosi. Mani nindamala ohubiwulira, handi nende ohubibona, ndeecha ndaakwa aasi mu makulu ka malaika owali niyanjekeese ebiindu bino, mani ndaaba aambi ohuchaaka ohumwiinamira. 9Nae malaika oyo niyabona atyo, yeecha yamboolera ati, “Otahola otyo daawe! Ese ndi busa omuhalaabani w'asyo, handi alala nende abanabbi baana b'eng'we, alala nende abo boosi abafunihira emboosi chiri mu sitabo sino. Yinamiraanga Nasae!” 10Handi malaika oyo yeecha yamboolera ati, “Otakisa emboosi ch'obunabbi ch'esitabo sino koti esyaama daawe, olwohuba ebiha biri aambi, bi biindu bino bicha ohweholehaniramo. 11Omuundu yeesi omuholi w'ebibi ahoyeere yemeede busa ohuholaanga ebibi, handi oyo yeesi, omubi ahoyeere ohwemeeda busa ohuba omubi. Omuundu yeesi oli omulai, ahoyeere ohwemeeda busa ohuholaanga ebilai, handi oyo yeesi oli omwolerefu, ahoyeere ohwemeeda ohubechaanga omwolerefu busa.” 12Yesu aboola ati, “Tekeeresa!” “Njicha bwaangu muno! Njia ohwiicha nende ebisiimo byaange omweene, ohubeeresa buli muundu ohweema hw'ebyo biyaholaanga. 13Niise otangira handi oseembayo, ohuchaaka nende ohwaakama.” 14Beehoye abo aboosa ebyefwaalo by'abwe byaalaba, mani abali nende obunyala bw'ohulya ebyaamo bitula hu musaala kw'obulamu, handi nende ohwingirira mu biruwa mu siko esyo. 15Nae erwaanyi w'esiko esyo, yiriyo embwa, nende abalakusi, nende abacheke, nende abeeti, nende ab'emisaambwa, nende buli muundu yeesi owaheera obubacha handi omwebachirisi. 16“Ese, Yesu ndamala ohutuma malaika wange ohuchia ohubalaangirira ebiindu bino, buli yimwebuusira alala. Ese ndi omwichuhulu wa Daudi. Ese ndi esulwe, ening'ining'i y'echuli yaaduha muno.” 17Mwooyo alala nende Omugole musaacha baboola bati, “Mwiiche!” Handi buli muundu yeesi owuliraho sino yeesi ahoyeere ohuboola ati, “Mwiiche!” Oyo yeesi oli nende obuluwo, yeeche. Kanya ohung'wa amaachi k'obulamu akali koti esiyaanwa busa eyiri oyo yeesi osiidaha. 18Ese, Yowaana, ndabula butoli-toli buli muundu owulira emboosi ch'obunabbi ch'esitabo sino endi: omuundu yeesi nachimeedaho esiindu syoosi, Nasae achia ohumeeda endwaae chilomaloomweho mu sitabo sino hu husaandisibwa hwae. 19Nae omuundu yeesi natusaho esiindu syoosi hu mboosi ch'obunabbi ch'esitabo sino, Nasae achia ohubamalaho omukabo kw'abwe okw'esyaamo sy'omusaala kw'obulamu, nende esy'Esiko Syolerefu, ebilomaloomweho mu sitabo sino. 20Oyo yeesi onyala ohutusira esiindu sino obujulisi ahoyeere ohuboola ati, “Eee, mubwadyeri bweene, njicha bwaangu muno!” Amiina. Yicha Omwaami Yesu! 21Esisa sy'Omwaami Yesu sibe nende abandu ba Nasae boosi.

will be added

X\