OHUBWIIHULIRWA HWA YOWAANA 21

1Handi ndeecha ndaabona Ekulu yaaha handi nende esyaalo siyaaha. Ekulu lyataangira, nende esyaalo syataangira, byeecha byaahamyuuhao, handi nende enyaanja yosi yeecha yaakotawo. 2Mani ndeecha ndaabona Esiko Syolerefu, Yerusaalemu njiaha, nisyamala ohutekehebwa mani nisyawa, koti omugole muhasi naamalire ohwefwaala yeendibwe nende omusaacha wae. 3Bulaanu, ndeecha ndaawulira ekono hoongo muno nililomaloma nilitula hu sisaala sy'obutuki niliboola liti: “Bulaanu, edaala lya Nasae liri mu bandu! Achia ohumenya alala nabo, mani babe abandu bae. Nasae mweene achia ohubechaanga alala nabo, handi achia ohuba Nasae w'abwe. 4Nasae achia ohweeya amale hu moni ch'abwe amasika koosi. Ohufwa sihuchia ohubaao handi, esibeera syosi haba sisiicha hubaao daawe, oba ohuliraanga hwoosi, oba amachuuni koosi. Ebiindu bihale byoosi bimalire ohuhamyuuhao.” 5Bulaanu, oyo owali niyehaale hu sisaala sy'obutuki yeecha yaboola ati, “Mani bulaanu, mbawo ndi ohuhola ebiindu byoosi ohuba ebiyaaha!” Handi omweene oyo yeecha yamboolera ati, “Yandiika sino, olwohuba emboosi chino ch'adyeeri, handi chesikibwa.” 6Handi yeecha yaboola ati, “Simalire ohuholebwa! Ese niise otangira handi omaliiriha, enjaaka handi nende enjakamo. Oyo yeesi olumwa obuluwo, njia ohumuba obunyala bw'ohung'wa mu sulo y'amaachi k'obulamu natatuungiire daawe. 7Abo boosi abacha ohunyala ohuyiingira, bacha ohunyoola ohutula yiindi esiindu sino: Ese njia ohuba Nasae w'abwe, nabo bacha ohuba abaana bange. 8Nae abati, abahobi, abahyamia ohuhola obudya, abeeti, abacheke, abaholi b'amayia, abenamira emisaambwa, alala nende ababacha boosi, esifwo sy'abwe, nisyo enyaanja yaaduha omuliro nende maratutu, eyiri niyo ohufwa hwa habiri.” 9Bulaanu, mulala hu bamalaika bataanu-na-babiri bala, abali nibakiingire ebbakuli chitaanu-na-chibiri chichuule endwaae chimaliirihayo chitaanu-na-chibiri chira, yeecha yeecha yiindi mani yaamala yaboola ati, “Ewe yicha, mani njie hweekeseho Omugole muhasi mweene, omuhasi w'Ekoondi doto.” 10Mani Mwooyo yeecha yaambukula, mani malaika oyo yeecha yangiinga yaanjira yaanda hu lugulu luleeyi muno. Malaika oyo yemao yanjekesa Yerusaalemu, Esiko Syolerefu esyo, nisiiha aasi, nisitula Mukulu, eyiri Nasae 11nisimesamesana hulw'oluyaali lwa Nasae. Esiko esyo syali nisimesamesana koti amakina k'ebbeyi hoongo muno, koti jasipa nende amakina machwenufu keene. 12Esiko esyo syali siri nende esida sihoongo handi esireeyi syeene, esiriho ebiruwa ehumi-na-bibiri. Handi hu biruwa ebyo hwali nihwandiikibwaangaho ameeta k'enjia ehumi-na-chibiri ech'abandu ba Yisirayiri. 13Buli luwaande lw'esida lwalichiingiho ebiruwa bidatu-bidatu biti: Bidatu ebutula-lyuuba, bidatu emwaalo, bidatu emu Kulu, handi bidatu ebukwa-lyuuba. 14Esida sy'esiko sino syali nisyombahirwa hu misiingi ehumi-na-chibiri ech'amakina, akali kaandiikibwaho ameeta k'abatume ehumi-na-babiri bala ab'Ekoondi doto. 15Malaika wula owali alomaloome naange hale, yali naali nende esikerero siri koti olusaala esyaholebwa mu saabbu, ohukerera esiko esyo, ebiruwa by'asyo, alala nende esida sy'asyo syoosi. 16Esiko sino syali nisyakanirira enyaande choosi, mu bubambali nende mu buleeyi bweene. Mani malaika oyo yemao yachaaka ohukera esiko esyo niyehoonyera esikerero esyo yaabona ati: Syali emiita 2,400 mu buleeyi, nae handi syali nende obubaambali bwaakanirira nende obuleeyi bwohuuloba, nende obuleeyi bw'ohuchia akulu. 17Malaika oyo handi yeecha yaakera esida esyo, mani yeecha yaabona ati syali nisiri emiita amahumi kasasaba obukinu ohweema hu hubala hwafukiirirwa huyali niyehoonyera. (Mu nyiriri 16, nende 17, Oluyonaani lwehoonyera embala mbwe “Ebifuruloongo 12,000” handi nende “Echubbiti 144” obuungi bunyala ohuba nibwali nende esiindu sihuluundu sibweekesa.) 18Esida sino syali syaholebwa mu makina k'ebbeyi hoongo kalaangwa mbwe “jasipa” nae esiko syeene syali nisyaholebwa mu saabbu njereere, endafu yiri koti echupa. 19Amakina k'omusiingi kw'esiko esida sy'esiko esyo, kali nikasaasibwamo nende enjia choosi ech'amakina k'ebbeyi hoongo muno. Omusiingi kutaangira kwali okw'amakina kalaangibwa mbwe “jasiperi,” okwa habiri kwali okw'amakina kalaangibwa mbwe, “sapire,” okwa hadatu kwali okwa, “agate,” nae okwa hane kwali okwa, “emeralidi”, 20okwa hataanu kwali okwa, “onikisi”, okwa hasaasaba kwaaba okwa, “carneliani”, okwa hataanu-na-habiri kwaaba okwa, “yelo kuarisi”, okwa hataanu-na-hadatu, “berili”, okwa hataanu-na-hane, “topasi”, okw'ehumi, “chalisedoni”, okw'ehumi-na-halala, “turquoise”, nae okw'ehumi-na-habiri kwaaba okwa, “amesisiti”. 21Ebiruwa ehumi-na-bibiri byali nibyo “parili” ehumi-na-chibiri. Buli siruwa syali nisyaholebwa mu “parili” ndala. Engira hoongo chali mu siko esyo chali chaholebwa mu saabbu njereere, eyiboneherwamo koti echupa. 22Haba sindabonaho enyumba ya Nasae niyiri mu siko esyo daawe, olwohuba enyumba ya Nasae y'esiko esyo, yali niyo Omwaami Nasae w'Obunyala bwoosi, nende Ekoondi doto. 23Esiko esyo haba sisidaha ohuba nisiri nende elyuuba, oba omwoosi ohuba nibikwaduhira daawe, olwohuba oluyaali lwa Nasae nilwo olusyaduhira, nae Ekoondi doto nilyo etaara ly'asyo. 24Abandu b'ohusyaalo huno, bacha ohukenderaanga obulafu bw'asyo, handi abatuki b'esyaalo sino boosi, bacha ohuletaanga obugaga bwaabwe bwoosi mu syeene esyo. 25Ebiruwa by'esiko esyo bicha ohudong'aanga busa nibyahaaha oludaalo lwoosi. Haba sibicha hwikalibwa daawe, olwohuba eyo siyichia hubaayo esiro daawe. 26Obuhunuufu, alala nende obugaga bwoosi obw'ebyaalo byoosi bicha ohuleetebwaanga mu siko esyo. 27Nae abulao esiindu syoosi esiriho obubi bwoosi esicha ohunyala ohwingira mu siko esyo, kata busa nende omuundu yeesi omuholi w'ebiindu biswaasa, oba omubacha yeesi. Ohutusaho abo boosi, ba meeta k'abwe kaandiikibwa mu sitabo sy'Ekoondi doto, esy'abandu balamu, bong'ene nibo abacha ohunyala ohwingira mu siko esyo.

will be added

X\