OHUBWIIHULIRWA HWA YOWAANA 20

1Handi ndeecha ndaabona malaika wundi niyeeha aasi natula Mukulu, nakiingire olufunguyo lw'ekotero alala nende omunyororo musito muno mu muhono kwae. 2Malaika oyo yeecha mani yaakwa hu sisyuhira-banaabi sira, endemo hale yira ohuboola huti, Omusambwa wula oba Sitaani wula mani yaamala yamuboya nende omunyororo okwo hulw'emyaaka elifu ndala. 3Malaika wuno handi yeecha yaamusukuna mu kotero eyo, mani naamala naliikalao, handi naliwomera, esisyuhira-banaabi esyo hu sihaye ohunyala ohubachirisaanga ebyaalo handi daawe, ohwoola lu myaaka elifu ndala kirimala ohuwa. Lunyuma lw'esyo, esisyuhira-banaabi esyo sichia ohulehuulibwaho hulw'esiha sidiidi. 4Mani handi ndeecha ndaabona ebisaala by'obutuki, mani abandu bali nibabihaaleho nibeecha nibabeeresebwa obunyala bw'ohuheenga emisango. Handi ndeecha ndaabona emyooyo ch'abandu bali nibetibwanga hulw'ohunyalaanga obwadyeeri bu Yesu yaleeta handi nende emboosi ya Nasae. Abandu abo haba sibali nibanyala ohwiinamiraho esisolo sira, kata nende esifwaanani sy'asyo, kata busa ohukanya ohuteebwaho esilolero sy'asyo hu bweeni bwaabwe, oba hu mahono kaabwe. Abandu abo beecha baalamuha, mani bachaaka ohutuka koti abatuki alala nende Kristo hulw'embaka ya emyaaka elifu ndala. 5Abafu badong'ereo boosi, haba sibasyuuha baaba abalamu, ohwoola lu myaaka elifu ndala chino chawa. Huno nihwo ohusyuuhisibwa hutangira ohw'abafu. 6Beehoye, handi bali nende ehabi muno, abo ababalibwa mu husyuuha hw'abafu hutangira huno. Olwohuba ohufwa hwa habiri haba sihuchia hunyala ohuboolaho daawe. Bano bacha ohuba abalaamisi ba Nasae, handi aba Kristo, mani bacha ohutuka nae hulw'embaka ya emyaaka elifu ndala. 7Mani lunyuma lw'emyaaka elifu ndala eyo ohuwa, Sitaani achia ohulehuulibwa ohutula mu mboye yae, 8mani achia ohunyala ohutula handi ohuchia ohuchaaka ohubachaanga ebyaalo byasalaanira hu syaalo huno hwoosi, ohuboola mbwe, Googo nende Magoogo. Sitaani achia ohunyala ohubabuusa alala balwaane ebiita, abaangi bali koti emoni ch'omusenye kuli hu lwaasi lw'enyaanja. 9Ebyaalo bifwaana bityo, byeecha byaanyala ohubaambuha hu syaalo syoosi, mani byaanyala ohwebodoohania edaala ly'abandu ba Nasae, alala nende esiko siyaheera muno. Nae omuliro kweecha kweha nikutula Mukulu, mani nikunyala ohubisihirisa byoosi. 10Mani bulaanu, Omusambwa yali niyababachirisa, yeecha yaasukunwa mu nyaanja y'omuliro nende maratutu, yi sisolo sira alala nende omunabbi mubacha wula yibali nibamala ohusukunibwa hale. Mani omwo nimwo mu boosi bacha ohusaandisirwa esiro nende esideete, endaalo choosi pe. 11Mani bulaanu handi ndeecha ndaabona, esisaala sy'obutuki sihunuufu muno, alala nende oyo osihalaangaho. Esyaalo alala nende Ekulu byoosi byeecha byahamyuuha yiyali naali, mani byaahaya ohubonehanaho handi daawe. 12Mani ndeecha ndaabona abafu, abahongo nende abadiidi sidubaanie, nibeemere mu moni w'esisaala esyo. Ebitabo byeecha byabwihulibwa, mani handi esitabo siindi syosi syeecha syaabwihulibwa, esitabo sy'abalamu. Abafu beecha baahengerwa emisango ohweema hu biindu bibali nibaholaanga, koti lubyali byandiikibwa mu bitabo ebyo. 13Bulaanu, enyaanja yeecha yatusa abafu bali nibayirimo. Ohufwa nende emakoombe, byosi byeecha byaatusa abafu ba byali nibiri nabo. Mani boosi beecha baahengerwa emisango, ohweema hu biindu bibali nibaholaanga. 14Bulaanu, ohufwa alala nende emakoombe, byoosi byeecha byaasukunibwa mu nyaanja y'omuliro. Enyaanja y'omuliro yino, niyo ohufwa hwa habiri. 15Abo boosi ba meeta kaabwe kali nikatandiikibwa mu sitabo sy'abalamu, beecha baasukunibwa mu nyaanja y'omuliro eyo.

will be added

X\