OHUBWIIHULIRWA HWA YOWAANA 2

1“Eyiri malaika w'abafukiiriri bali mu Buwefeeso yandiika oti: ‘Yino niyo emboosi yitula eyiri oyo odiirire ening'ining'i chitaanu-na-chibiri mu muhono kwae muluungi, handi okeenda mu biteeni by'amataara by'esaabbu bitaanu-na-bibiri. 2“ ‘Manyire ebiindu byoosi biwahola. Manyire koti luwahola emirimo cha amaani, handi koti lu obeere omwesimiirisi. Manyire endi haba sonyala ohuleheramo abandu babi, handi endi okeraania abo ababoola bati bali abatume nihane haba sibali batyo daawe, handi endi wabona oti hane ni ababacha. 3Ewe oli omwesimiirisi muno, wamala ohusaanda muno hulwaange, nae handi haba osisiiri ohwoola ohwekaana daawe. 4Nae esiindu sino nisyo sy'ong'ene busa siindi ohuhwekanyiisaho. Ewe haba sooli hundaha koti lwamberi. 5Mani baasaho yiwachaakira ohudondobana! Kaluuhana olehane nende ebibi byao byoosi, mani onyale ohuchaaka ohuhola biwaholaanga mu hutangira. Nae notakaluuhana walehana nende ebibi byao, njia ohwiicha yooli, mani male mbukule esiteeni sy'etaara syao mani situse mu sifwo syaasyo. 6Nae sino nisyo esilai syooli ohuhola. Wasyuula ebiindu bi bandu ba Nikoleeta bahola koti busa lu syesi ndasyuula. 7Nimuli nende amatwi, mani tekeerese bi Mwooyo aboolera abafukiiriri! Abo boosi abayiingira njia ohubaba obunyala bw'ohulya esyaamo sy'omusaala kw'obulamu okwamera mu Ndalo ya Nasae.’ 8“Eyiri malaika w'abafukiiriri bali mu Simirina, yandiika oti, ‘chino nicho emboosi chitula eyiri oyo otangira handi oseembayo, owafwa handi yaaba omulamu. 9Ese manyire muno ebidinyu byao byoosi. Manyire endi oli omumananinae mubwadyeri bweene oli omugaga! Manyire ebiindu bibi biri ohuhulomalomwaho, nende abo ababoola bati mbwe bali Abayudaaya nihane haba sibali batyo daawe. Abo bali omukaanda kwa Sitaani busa! 10Otatya daawe, esiindu syoosi syochia ohusaandisibwamo. Tekeeresa! Sitaani achia ohuhuhema, naaba nanyalire ohuta abandi hw'eng'we mu mboye, mani ebidinyu by'eng'we bibeeo hu siha sy'endaalo ehumi. Mube abesikwa yindi, kata nende nibiri biti mucha ohwiitibwa busa, mani mba njia ohubabeeresa obulamu koti omuheemba kw'ohuyiingira. 11Nimuli nende amatwi, mani tekeerese bi Mwooyo aboolera abafukiiriri! Abo abayingira haba sibachia hunyala ohunyaalisibwa nende ohufwa hwa habiri.’ 12“Eyiri malaika w'abafukiiriri bali mu Perigamumu yandiika oti, ‘Chino nicho emboosi chitula eyiri oyo oli nende olugaanga lwooki, olw'obwooki hu maande choombi. 13“ ‘Ese manyire bulai bweene yiwamenya, eyo bweene yi Sitaani yehala hu sisaala sy'obutuki. Oli owadyeeri mweene yindi, handi haba siwalehana nende efukiirira yao mweese kata niwali mu siha si Atipa, omujulisi wange mwesikwa, niyetirwa ebweene eyo yi Sitaani yamenya. 14Nae aliwo ebiindu biindi ebidiidi bihwekanyiisaho. Aliwo abandu bandi mw'eng'we abali ohuloonda enjekesa ya Bbalamu, oweekesa Bbalaka engeri y'ohuyira abandu ba Yisirayiri mu sibi nabaserera ohulichaanga ebyohulya byalichingi nibimalire ohubeeresebwa emisaambwa handi nende ohuholaanga obuyirani bubi. 15Mani mu ngira nasilala eyo, mwesi muli nende abandu babalimo abalondekana nende enjekesa y'Abanikoleeta eyo. 16Nae bulaanu, kaluuhane mutule hu bibi by'eng'we! Nimutahola mutyo, ese njia ohwiicha yimuli bwaangu muno mani nwaane nende abandu abo nindehoonyera olugaanga luno olutula mu munwa kwaange. 17Nimuli nende amatwi, mani tekeerese bi Mwooyo aboolera abafukiiriri! “ ‘Abo abayingira njia ohubabeeresaho hu maanu yakisibwa. Handi njia ohubeeresa buli mulala hu beene abo, ekina lya rachaari elyandiikwaho eliita yaaha li muundu yeesi atamanyireho ohutusaho oyo olinyoola yeng'ene.’ 18“Eyiri malaika w'abafukiiriri bali mu Siyatiira yandiika oti, ‘chino nicho emboosi chitula eyiri Omwaana wa Nasae, yi moni chae chaaduha koti omuliro, yi makulu kae kamesamesana koti omugasa kuubbirwe bulai muno. 19Ese manyire ebiindu byoosi by'oholaanga. Manyire ohudaha hwao, obwesikwa bwao, obuhalaabani bwao, nende ohwesimiirisa hwao. Manyire endi esiha sino oli ohuholaanga muno ohuhiraho koti luwaholaanga mu hutangira. 20Nae sino syong'ene nisyo esiindu siindi ohuhwekanyiisaho. Mufukiiriraanga omuhasi Jesebbeeli oyo, owelaanganga omweene ati ali wamwaanda wa Nasae. Yehonyeraanga enjekesa yae eyo ohukosa-kosania abahalaabani bange, boole ohwingira mu huhola obuyirani bubi, handi nende ohulichaanga ebyohulya bibi nibimalire ohubeeresebwa emisaambwa. 21Ndamala ohumubeeresa ebiha bimala endi yefunake ebibi byae, nae haba saadaha ohukaluuhana ohuleha obucheke bwae daawe. 22Mani sakira njia ohumuubba hu sitaanda yi mweene nende abo boosi abayiranaanga nae bacha ohusaandira bubi muno. Njia ohuhola sino bulaanu buti, nibatefunaka mu biindu bibi bibaholaanga nae. 23Handi njia ohwiita nende abaloondi bae, mani hu bafukiiriri boosi beemeo bamanye bati, ese niise oyo omanyire ebibaaso bya buli muundu nende byahaba nimbaheera. Njia ohutuunga buli mulala hw'eng'we ohweema hu byooba niwahola. 24Nae eng'we abadoong'ereyo mweesi abali mu Siyatiira, haba simwaloondaho hu njekesa yino yiti. Haba simweekaho bi bandu bandi balaanga mbwe, ebyaama bya Sitaani byomukati bweene. Ndi ohubaboolera endi, ese haba siinjia hubataaho esidinyu siindi syoosi daawe. 25Nae muhoyeere ohwomiirira hw'ebyo bimuli nabyo ohwoola lundirikobola. 26Abo boosi abayingira, handi abemeeda ohuholaanga bindaha ohwoolera elalira hu njakamo, njia ohubabeeresa obunyala buyiingira ebyaalo byoosi. 27Mani baba bacha ohunyala ohubitukaanga nende endabuhi y'esichuma, handi mu baate koti endamu ch'eloba, koti lu syesi omweene ndabeeresebwa amaani ohutula eyiri Laata yange. 28Haandi mba njia ohubabeeresa esulwe (ening'ining'i y'echuli). 29Nimuli nende amatwi, mani tekeerese bi Mwooyo aboolera abafukiiriri!’

will be added

X\