OHUBWIIHULIRWA HWA YOWAANA 17

1Bulaanu, mulala hu malaika bataanu-na-babiri bali nende ebbakuli chitaanu-na-chibiri chira, yemao yeecha yiindi mani yamala yaboola ati, “Ewe yicha, mani hweekeseho koti lu muhasi muyirani wamanyihana achia ohuboneresebwa, esiko sihunuufu esyo, esyombahwa aambi nende emyaalo miingi. 2Abatuki b'esyaalo sino boosi bayiranaanga nae, nae abandu bo husyaalo huno boosi, beecha bameera ohweema hu hung'wechaanga amalwa k'obuyirani hwae.” 3Bulaanu, Mwooyo yeecha yambukulira elalira, mani malaika yeecha yangiinga yanjira mu siparara. Nindali ebweene eyo, ndeecha ndaabona omuhasi wundi niyehaale hu sisolo sya ranjaayi syaliho ameeta kanyeka Nasae nikaandiikwa hu mubiri kwaayo kwoosi. Esisolo esyo syali nende emitwe kitaanu-na-kibiri, nende enjika ehumi. 4Omuhasi oyo yali niyefwaalire ebifwaalo bifwaana koti omudoba kwa bbulu nende ranjaayi, handi niyesyaaya omubiri kwoosi nende amabbangili k'esaabbu,neende amakina k'ebbeyi kakabuhaane. Nae yali nadiirire mu muhono kwae, esikoombe sy'esaabbu ni sichuulemo ebiindu by'obuyemu nende eby'obuhwe, bitula mu bucheke bwae. 5Nae hu bweeni bwae, hwali nihwandiikwaho eliita liri nende amahulundu kali mu syaama mbwe: “Bbabbilooni Sihunuufu, ng'ina w'abayirani boosi, nende abakosoobania enjirana boosi mu syaalo muno.” 6Handi ndeecha ndaabona endi hane, omuhasi oyo yali nameerere amabaanga k'abandu ba Nasae, handi nende amabaanga k'abo abali nibeetibwa ohweema hu huba nibali abawulisi ba Yesu. Mani nindeecha ndaamubona, ndeecha ndesiinduhira elalira. 7Nae malaika yeecha yandeeba ati, “Lwasiina ewe wesinduha otyo? Njia ohuhutuumbulira amahulundu kali mu syaama ak'omuhasi wuno, nende ak'esisolo simukiingire sino, esisolo siri nende emitwe kitaanu-na-kibiri, nende enjika ehumi. 8Esisolo esyo, syaliho esilamu hale, nae haba sisisisiiri esilamu daawe. Siri aambi ohutula mu kotero, mani simale sichiire elalira mu husihirisibwa. Mani abandu bamenya hu syaalo huno, ba meeta kaabwe katandiikibwa ohuloongebwa hw'esyaalo nihutabaao, mu sitabo sy'abalamu, boosi bacha ohwesiinduha muno nibatingaala hu sisolo esyo. Esisolo esyo syaliho esilamu hale. Nae bulaanu haba sisisisiiri esilamu daawe, nae sichia ohubonehana handi. 9Bulaanu, esiindu sino sibaanja abandu ohuba nende amakesi alala nende ohumanya. Emitwe chitaanu-na-chibiri chino, nicho ebigulu bitaanu-na-bibiri, hu muhasi wuno yeehala. Emitwe chino handi nicho abatuki bataanu-na-babiri. 10Nae bataanu hu beene bano, bamala ohukwa, nae mulala asituka, nae owuundi oyo asisiiri ohubaao, nae niyaheeche ohubaao, achia ohutukaho busa hu siha sidiidi muno. 11Nae handi esisolo esyo esyaliho esilamu hale, nae haba sisisisiiri esilamu, esyeene nisyo omutuki wa hataanu-na-hadatu, oli mulala hu bataanu-na-babiri bala, nae ochia ohubakabuhaho ache asihirisibwe. 12Enjika ehumi chobweene echo, nicho abatuki ehumi abatachaaka ohutuka, nae abacha ohubeeresebwa obunyala bw'ohutukaho koti abatuki hulw'embaka y'esaa ndala yong'ene alala nende esolo eyo. 13Nae abatuki ehumi bano boosi, bali nende esichiiririrwa nasilala, handi babeeresa esisolo esyo, amaani kaabwe, alala nende obunyala bwaabwe. 14Abeene bano bacha ohulwanakania Ekoondi doto, nae Ekoondi doto elyo, alala nende abalaange bae, abadoole bae, handi nende abaloondi beesikwa bae, bacha ohubayiingira, olwohuba oyo niye Omwaami w'abaami, handi Omutuki w'abatuki.” 15Malaika oyo yesi yeecha yamboolera ati, “Amaachi ako k'obweene, k'omuhasi muyirani oyo kabeere niyehaaleho, niko ebyaalo, abandu, embya, handi nende enimi. 16Enjika ehumi chobweene echo, handi nende esisolo esyo, boosi bacha ohusyuula omuhasi muyirani oyo. Bacha ohumung'uula buli siindu syali nasyo syoosi, mani bamale bamulehe naali syekenye syeene. Bacha ohulya omubiri kwae, mani bamale bamusihirise nende omuliro. 17Olwohuba Nasae yamala ohuta mu myooyo chaabwe ohudaha hw'ohuhola by'adaha, mu huholera alala, handi nende mu hubeeresa esisolo esyo amaani kaabwe, atuke ohwoolera elalira lu mboosi cha Nasae chiribonehera ohuba ech'adyeeri. 18Nae omuhasi oyo yobweene, niye esiko sihunuufu situka abatuki boosi ab'ohusyaalo huno.”

will be added

X\