OHUBWIIHULIRWA HWA YOWAANA 16

1Handi ndeecha ndawulira ekono hoongo nililomalomera mu nyumba ya Nasae eyiri malaika bataanu-na-babiri bala liti, “Muche mubbwomoole ebbakuli chitaanu-na-chibiri ch'etima lya Nasae choosi hu syaalo!” 2Malaika otangira niyeecha naachia nabbwomoola namalira ebbakuli yae hu syaalo. Mani amabubuuto mabi keene, handi akachuuna muno nikeecha nikakwa hu bandu boosi abali nibali nende esilolero sy'esolo, handi abo boosi abali nibenamiraanga esifwaanani syaasyo. 3Mani malaika wa habiri niyeecha nabbwomoola ebbakuli yae nayimalira hu nyaanja. Amaachi koosi nikakaluuhana nikaba koti amalika k'omuundu ofwiire, mani buli siloonge silamu esyali mu nyaanja syaafwa. 4Mani malaika wa hadatu yesi niyeecha nabbwomoola namalira ebbakuli yae hu myaalo choosi nende esulo ch'amaachi choosi, mani nichiicha nichikaluuhana nichiba amabaanga. 5Awo ndeecha ndawulira malaika wali naali nende obunyala hu maachi koosi naboola ati, “Hane eheenga yao yoosi yoholere yiri busa abweene, Aaa, Ewe Omwoolerefu, ewe oliwo handi owabaao! 6Abandu abo beedisaanga amabaanga k'abandu ba Nasae, handi nende ak'abanabbi, mani sakira obabeerese amabaanga ohung'wa. Bali busa ohunyoola esibahoyera syeene!” 7Handi ndeemao ndaawulira ekono liindi nilitulira ena alutaari niriboola liti, “Omwaami Nasae Owobunyala bwoosi! Hane eheengao yao yoosi n'eyadyeeri, handi niyo eyihoyera yeene!” 8Bulaanu, malaika wa hane yesi yeecha mani yabbwomoola yaamalira ebbakuli yae hu lyuuba, mani lyeecha lyaafukiirirwa ohusaamba abandu boosi nende obumemu bwaalaba bwaalyo. 9Abandu boosi beecha basaambwa nende obumemu bwaalaba obwo, mani abandu abo bachaaka ohuholimira eliita lya Nasae, oli nende obunyala hu nyiimbe chino choosi. Nae haba sibanyala ohukaluuhana ohutula hu bibi byaabwe baanyala ohufumia obuhunuufu bwa Nasae daawe. 10Mani handi malaika wa hataanu niyeecha nabbwomoola namalira ebbakuli yae hu sisaala sy'ohutuki sy'esisolo sira. Mani esiirima nisiicha nisikwa hu bwaami bw'esisolo bwoosi, mani abandu nibachaaka ohweluma enimi ohweema hu buchuuni bu bali nabwo, 11mani nibeecha nibachaaka ohuholimira Nasae wo Mukulu, ohweema hu buchuuni bwali nibubachuuna, alala nende amabubuuto keene. Nae haba sibanyala hukaluuhana baatula hu ngira chaabwe mbi. 12Mani handi malaika wa hasaasaba niyeecha nabbwomoola namalira ebbakuli yae hu Yufuraate omwaalo muhuluundu. Omwaalo kuno nikwiicha nikwomerera, ohutaawo engira yi batuki bacha ohutuiraanga ebutula-lyuuba. 13Mani handi ndeecha ndaabona emisaambwa mibi kidatu ekiali nichifwaanana nende amahere. Emisaambwa chino chali nichitula mu munwa kw'esisyuuhira-banaabi sira, omunwa kw'esisolo, handi nende omunwa kw'omunabbi mubacha. 14Emisaambwa chino, nicho echali emyooyo cha badayimooni baholaanga ebyaamayia. Emisaambwa kino kyoosi, kyali nikitula nikicha mu batuki boosi abohusyaalo huno, ohubabuusa alala beetekehere ebiita hu Ludaalo luhunuufu lwa Nasae Wobunyala bwoosi. 15“Tekeerese! Mbao njicha koti omwiibi! Yeehoye oyo omenya naamoka busa, handi oliinda engubo chae, hwaanyale ohutanyala ohukendaanga naali syekenye, mani anyale ohuswaala mu lwichuule lw'abandu!” 16Mani emyooyo echo cheemawo chaanyala ohubuusa alala abatuki abo mu sifwo silala, mu Luyibbulaniya esilaangwa mbwe Arumagedoni. 17Mani malaika wa hataanu-na-habiri yesi yeecha mani yabbwomoola yaamalira ebbakuli yae mu mboo busa. Mani ekono hoongo muno niliicha nilitula hu sisaala sy'obutuki syali mu nyumba ya Nasae, niliboola liti, “Simalire ohuholehana!” 18Mani yeecha yabaawo enjeserye ch'ohumyeesuha, ohududuma, alala nende ohwaduluhana hw'ehubba huloondehana, mani handi nende musisi mbi muno. Haba siyibechaangao musisi yaaka yityo ohutula hu huloongwa hw'abandu. Musisi yino niyo eyali niyihira obubi mu choosi! 19Esiko sihunuufu esyo syeecha syaakabuhanamo ebituundu bidatu, nae ebiko by'ebyaalo byoosi byasihirisibwa. Nae Nasae yeecha yechulisa Bbabbilooni sihunuufu mani yeecha yaasihola syaang'wa amalwa kali mu sikoombe syae amalwa k'etima lyae lulu muno. 20Ebisiinga by'omunyaanja byoosi byeecha byahamyuuhao, handi engulu chosi chaakotawo. 21Mani emikina ch'efula mitabaafu muno, buli kutula nikuli nende obusito bwa kiloguraamu 50, cheecha chakwichaanga nichitula akulu mu bbaanga, nichikwa hu bandu, bali nibaholimireenge Nasae ohweema hu nyiimbe chitulana hu makina k'efula, mbwe olwohuba yali endwaae yiteengya muno.

will be added

X\