OHUBWIIHULIRWA HWA YOWAANA 15

1Handi ndeecha ndatingaala mani ndaabona mu kulu mu bbaanga esifwaanani siindi sisindusa, esihunuufu handi esiwukisa. Ndabona malaika bataanu-na-babiri, nibali nende enyiimbe chitaanu-na-chibiri, echali nicho echiseembayo, olwohuba nicho echali echimaliirisa ohweekesa etima lya Nasae. 2Mani ndeecha ndaabona esiindu syali nisifwaanana nende enyaanja y'egilaasi chisasaanire nende omuliro. Handi ndeecha ndaabona abo boosi abali nibanyala ohuyiingira esolo yira alala nende esifwaanani syaayo sira, handi abayiingira oyo yi liita lyae nilihiihirwa nende enaamba yira. Abandu bano bali nibeemere aambi nende enyaanja y'egilaasi, nibadiirire obuhana bu Nasae mweene yali nababereese 3mani nibali ohwembaanga olweembo lwa Musa, omuhalaabani wa Nasae, handi nende olweembo lw'Ekoondi doto bati: “Omwaami Nasae w'Obunyala bwoosi, ebiholwa byao nga bihunuufu handi nga biwukisa! Omutuki w'ebyaalo byoosi, engira chao nga njoleerefu handi nga nungifu! 4Wiina mweene otanyala ohuhukwiiraho eng'ang'a, ewe Omwaami? Wiina mweene ochia ohuhaya ohulaangirira obuhunuufu bwao? Ewe weng'ene niiwe omwolerefu. Ebyaalo byoosi bicha ohwiichaanga mani nibihwiinamira, olwohuba abo boosi babonaanga ebiholwa byao bihoyera.” 5Lunyuma lwa bino, ndeecha ndaabona enyumba ya Nasae yiri Mukulu niyikuuhe, nimulimo Eyeema Lyolerefu niliri mukati. 6Malaika bataanu-na-babiri bala abali nende enyiimbe chitaanu-na-chibiri chira, beecha baatula mu nyumba ya Nasae eyo, nibefwaalire engubo ch'elaasi endafu chimilamilana, handi nibaboyere esibiro ch'esaabbu nichebodohaanie ebirifu byaabwe. 7Mani mulala hu biloonge bilamu bine bira, niyeecha nabeeresa malaika bataanu-na-babiri bala ebbakuli ch'esaabbu echichuule etima lya Nasae, oliwo omulamu endaalo choosi. 8Awo, enyuumba ya Nasae yira yeecha yechula omwoosi kutula hu luyaali lwa Nasae alala nende amaani kae, mani yaabulawo omuundu yeesi owali nanyala ohuchia yengira mu nyumba ya Nasae eyo, ohwoola lu nyiimbe chitaanu-na-chibiri chira, echaleetebwa nende malaika bataanu-na-babiri bala cheecha chaawa.

will be added

X\