OHUBWIIHULIRWA HWA YOWAANA 14

1Handi ndeemao ndatingaala, mani ndaabona endi Eee, hu Lugulu Siyooni hwali hweemereho Ekoondi doto, handi abandu 144000 bali nae, abo abali nende eliita lyae, nende eliita lya Simwaana nibyaandiikibwa hu bweeni bwaabwe. 2Mani ndeecha ndawulira ekono litula Mukulu niliwoola koti amaachi maangi, handi koti ohwaduluhana hw'ehubba hu hoongo muno. Ekono lindawulira elyo, lyali nilifwaanana koti ohuubba hw'aboobbi b'obuhana baandi nibali ohuubba obuhana bwaabwe. 3Mani bali nibali ohwembaanga olweembo luyaaha mu moni w'esisaala sy'obutuki, handi nende mu moni w'ebiloonge bilamu bine bira, handi nende mu moni w'abahuluundu bala. Abulao omuundu yeesi owali nanyala ohweeka olweembo olwo, ohutusaho abandu 144000 bala bong'ene abali nibanunulibwa ohutula mu syaalo. 4Bano nibo abandu bali nibatanyala ohwenyaasaho nende abahasi oba abasaacha kata budiidi, olwohuba bali nibali abatayiranaanga. Bano nibo abo abali nibalondaanga Ekoondi doto elyo buli yirichiira. Bano nibo abo abali nibamala ohununulibwa ohutula mu bandu koti ebyaamo bitaangira bya Nasae nende Ekoondi doto. 5Handi mu minwa chaabwe, haba simwalimo obubacha bwoosi, olwohuba bali nibataaliho esibi syoosi daawe. 6Handi ndeecha ndaabona malaika wundi naali ohubburuhira akulu muno mu mboo, naali nende emboosi chitaakama ch'Emboosi Ndai naacha ohulaangirira eyiri abandu b'ohusyaalo huno, eyiri buli bwibulaane, oluyia, olulimi, nende esyaalo. 7Malaika oyo yeecha yaalomaloma nende ekono hoongo naboola ati, “Beerese Nasae oluyaali, mani mufumie obuhunuufu bwae! Olwohuba ebiha byae by' ohuheengeramo emisango bimalire ohwoola. Yinamire oyo owahola Ekulu, esyaalo, enyaanja, alala nende emyaalo chirimo amaachi choosi!” 8Malaika wa habiri yesi yeecha yaloonda hw'otangiire wula, naboola ati, “Simalire ohukwa! Bbabbilooni Sihunuufu simalire ohukwa! Syakera abandu boosi baang'wa amalwa kaasyo, - amalwa malulu keene ak'obucheke bwaasyo!” 9Malaika wa hadatu yesi yeecha yaloonda hu wa habiri wula, naboola mu kono ly'akulu ati, “Oyo yeesi owiinamira esisolo esyo, handi nende esifwaanani sy'asyo esyo, handi okanya ohuteebwa esilolero hu bweeni bwae, oba hu muhono kwae 10baba abeene abo abacha ohung'wa handi hu malwa ka Nasae mweene, amalwa k'etima lyae, kayamala ohuchuha nende amaani kae koosi, mu sikoombe sy'obunyoolefu bwae! Abo boosi abahola sino batyo, bacha ohusaandisirwa mu muliro handi nende mu maratutu, mu moni wa bamalaika boolerefu nende Ekoondi doto. 11Omwoosi kw'omuliro kubasaandia kunioha endaalo choosi pe. Yibulayo obuwuluuhiro bwoosi, esiro nende esideete eyiri abo abeenamira esolo nende esifwaanani syaayo, eyiri oyo yeesi oli nende esilolero sy'eliita lyaasyo.” 12Sino situbanjisa abandu ba Nasae ohuba nende ohuguma, abo abafunihira amalako ka Nasae, handi abali abeesikwa eyiri Yesu. 13Handi ndeecha ndawulira ekono liindi litula Mukulu niliboola liti, “Yandiika sino: beehoye abo ohutula olwaleero ohwemeeda mu moni, bafwiira mu buhalaabani bw'Omwaami!” Mwooyo nae yaakobolamo ati, “Eee, mu bwadyeeri bweene!” “Baba bacha ohunyoola obuwuluuhiro ohutula hu mirimo chaabwe midinyu, olwohuba ebitula mu buhalaabani bwaabwe, bucha nabo.” 14Handi ndeemao ndatingaala, mani awo ndaabona esireesi sya rachaari, nihaandi esiindu syali nisihaale hu sireesi ohwo, syali nisifwaana koti omuundu, naali nende ekofya y'obutuki ey'esaabbu hu mutwe kwae, nende oluhaayiro lwooki muno mu muhono kwae. 15Bulaanu, malaika wundi yeecha yaatulira mu nyumba ya Nasae, mani yaamala yoobba wuuwi naalira mu kono hoongo eyiri oyo owali niyehaale hu sireesi ati, “Wehoonyere oluhaayiro lwao olwo, mani omale okese ekesa, olwohuba esiha simalire ohwoola. Esyaalo syoosi syeengere sihoyera ekesa!” 16Mani omuundu wali niyehaale hu sireesi, yeecha yaahuyuunga oluhaayiro lwae naalubisa hu syaalo, mani ekesa ly'esyaalo syoosi lyamala ohukeswa. 17Handi ndeecha ndaabona malaika wundi natulira mu nyumba ya Nasae y'omu Kulu, handi yesi yali ali nende oluhaayiro lwooki muno. 18Mani malaika wundi oli nende obunyala eyiri omuliro, yeecha yaatula eyiri alutaari. Yahuumula nende ekono hoongo eyiri malaika wali naali nende oluhaayiro lwooki ati, “Wehoonyere oluhaayiro lwao olwo, mani oheenge emisabbiibbu naatusa hu misaala chaacho ch'esyaalo, olwohuba emisabbiibu cheengere!” 19Mani malaika oyo yeecha yaahuyuunga oluhaayiro lwae olwo hu syaalo, yaheenga emisabbiibbu ohutula hu misaala chaacho, mani naamala nachisukuna mu hunyiro ly'etima lya Nasae. 20Emisabbiibu cheecha chaanyuhuulirwa mu hunyiro lyali erwaanyi w'esiko, mani amabaanga keecha kaatula mu hunyiro elyo akali koti amaachi k'ofwomboole mani kaahulukusa kilomiita 300 obuleeyi, nae emiita chibiri ohuchia aasi.

will be added

X\