OHUBWIIHULIRWA HWA YOWAANA 12

1Bulaanu, esifwaanani sihunuufu sitiisa muno syeecha syabonehana akulu mu bbaanga. Syali esy'omuhasi wali niyefwaalire esitetei syali elyuuba, handi yali ali nende omwoosi nikumuli mu makulu, handi niyefwaalire ekofya y'obutuki yiriho ening'ining'i ehumi nende chibiri hu mutwe. 2Omuhasi wuno yali naali aambi ohwiibula, mani obuchuuni alala nende ohulumwa hw'ohwibula nibiicha nibikera naalira niyoobba wuuwi. 3Handi esifwaanani siindi sihunuufu sitiisa muno syeecha syabonehana nisiri akulu mu bbaanga. Sino syalimo esisyuuhira-banaabi sihoongo syeene, esifwaana ranjaayi, esiriho emitwe kitaanu-na-kibiri nende enjika ehumi, handi nende ekofya y'obutuki niyiri hu buli mutwe kwae. 4Mani niyehoonyera omuhira kwae okwo, yeecha yanyala ohweeya esituundu silala hu bituundu bidatu by'ening'ining'i, yaasimala akulu mu bbaanga, mani yaamala yaachisukuna chaakwa aasi hu syaalo huno. Omuundu wuno, yeecha mani yeema mu moni w'omuhasi wula, naliindiriire ohulya omwaana w'omuhasi wuno naaba niyaheebulwa busa ati. 5Mani omuhasi oyo yemao yeebula omwaana musyaani, owali naacha ohutuka ebyaalo byoosi nende olwaayiro lw'esichuma. Nae omwaana oyo yeecha yaasihulwa yaabukulibwa bwaangu, mani yaamala yaayiribwa eyiri Nasae alala nende esisaala syae sy'obutuki. 6Mani omuhasi oyo yemawo yeyiruhira yaacha mu siparara, eyiri esifwo si Nasae mweene yamutekeherayo, yiyali naacha ohuliindirwa bulai ohumala embaka y'endaalo 1260. 7Mani bulaanu ebiita byeecha byakwao Mukulu. Mikaayiri alala nende bamalaika bae bali nibalwaanisa esisyuuhira-banaabi esyo, owali yesi nalwaanisa nende bamalaika bae. 8Nae esisyuuhira-banaabi esyo syeecha syayiingirwa, mani omweene oyo alala neende bamalaika bae boosi beecha baakayirwa ohumenya handi Mukulu. 9Esisyuuhira-banaabi sihoongo muno esyo, syeecha syasukunibwa ohutula Mukulu-owali niye endemu hale yira, owali nalaangwa mbwe Omusambwa, oba Sitaani, owabachirisa esyaalo syoosi. Yeecha yaasukunwa yaakwa hu syaalo, alala nende bamalaika bae boosi. 10Bulaanu ndeecha ndaawulira ekono hoongo Mukulu niliboola liti, “Era mbawo, bulaanu obuwonia bwa Nasae bumalire ohwiicha! Bulaanu, Nasae amalire ohweekesa obunyala bwae koti Omutuki! Bulaanu, Masiiya wae amalire ohweekesa obunyala bwae! Olwohuba oyo owali niyeemere mu moni wa Nasae, naabiraanga abaasyeefwe esideete nende esiro, amalire ohusukunibwa ohutula Mukulu. 11Abasyeefwe abo hane bamala ohumuyiingira mu biita nibehoonyera amabaanga k'Ekoondi doto, handi nende obwadyeeri bu bayalaanga. Handi bali nibafukiirira ohuwaayo obulamu bwaabwe mani baafwa. 12Mani sakira eng'we mwehoye busa, ewe Mukulu, alala nende eng'we mweesi abamenyamo! Nae nga chaakaanire esyaalo alala nende enyaanja! Olwohuba Omusambwa amalire ohwiiha eyo yi muli, mani yechuule etima, olwohuba amanyire bulai bweene ati, adoong'iisie busa esiha sidiidi muno.” 13Mani esisyuuhira-banaabi nisyeecha syaamanya siti hane simalire ohusukunibwa aasi hu syaalo, yemao yachaaka ohukiiya omuhasi wula owebula omwaana musyaani. 14Nae omuhasi oyo yeecha yaabereswa embaya chibiri ech'okuswi ku hoongo muno, hwaanyale ohubburuha ache mu sifwo syae siri mu siparara, yiyali naacha ohuliindirwa bulai, hulw'embaka y'emyaaka chidatu nende esituundu, yi sisyuuhira-banaabi atanyala ohumuseeta yamwoolaho. 15Mani, esisyuuhira-banaabi oyo yeecha yaasala amaachi k'ofwomboole nikatulira mu munwa kwae, nikaloonda omuhasi oyo, mbwe kanyale ohuchia ohumukiinga kamuyire. 16Nae esyaalo syeecha syahoonya omuhasi oyo. Syeecha syaasama omunwa kwaasyo, mani syaamala syanyala ohumira amaachi ako koosi akali nikatulire mu munwa kw'esisyuuhira-banaabi oyo. 17Esisyuuhira-banaabi oyo mani yeecha yanyoleerera muno omuhasi oyo, mani yaatula awo yaacha yachaaka ohulwaanisaanga abeechulu bae boosi, abo boosi abafunihira amalako ka Nasae, handi abeesikwa b'obwadyeeri bwaleetebwa nende Yesu. 18Mani esisyuuhira-banaabi oyo yeecha bulaanu yeema busa hu lwaasi lw'enyaanja mani yaateng'eng'ala.

will be added

X\