OHUBWIIHULIRWA HWA YOWAANA 11

1Bulaanu, ndeecha ndabeeresebwa olusaala lwali nilufwaanana nende ekada libakereraanga obuleeyi, mani ndaboolerwa endi, “Ewe cha mani okere enyuumba ya Nasae alala nende alutaari, mani handi omale obale abandu bali ohwiinamiraangamo Nasae. 2Nae otakera ebiseenge biri erwaanyi daawe, olwohuba ebyo byamala ohubeeresebwa abakafwiiri, abahabeere ninyala ohuseenakira Esiko Syolerefu hu mbaka y'emyoosi amahumi kane-na-kibiri emilaamba. 3Naange njia ohutuma abajulisi bange babiri, nibafwaalire amagunia, mani bache bayaale emboosi cha Nasae mu ndaalo 1260 echo.” 4Abajulisi babiri abo, nibo emisaala mituli chibiri, handi nende amataara kabiri keemere mu moni w'Omwaami w'esyaalo. 5Mani omuundu yeesi nateemaho ohubaholaho esibi, omuliro kucha ohutulaanga mu minwa chaabwe, mani kucha kusihirisa abasuku baabwe. Mani mu ngira yino, oyo yeesi ochia ohuteemaho ohubaholaho esibi achia ohwiitibwa busa. 6Bali nende obunyala ohwiikala ekulu, efula yihaye ohukwa ebiha byoosi bibacha ohuba nibali ohuyaala emboosi cha Nasae. Handi bali nende obunyala bubuka esulo choosi, obunyala ohuchikaluuhania chaaba amabaanga. Handi bali nende obunyala ohukwiisa hu syaalo buli mbya y'oluumbe lusihirisa esiha syoosi sibaba nibadahiramo ohusihola. 7Mani nibaba nibamalire ohuyaala emboosi chaabwe chino, enani licha ohusyuuha ohutula mu kotero, licha ohuchaaka ohulwaanakana nabo. Achia ohubayiingira, mani amale abeete boosi, 8mani emibiri chaabwe chimale chikone busa mu ngira huluundu ch'omusiko sihuluundu, yi Mwaami waabwe yahomererwa hu musalabba. Eliita ly'obuyiriiri lyesiko esyo nilyo Sodomu, oba Misiri. 9Abandu ohutula mu byaalo byoosi, enjia, enimi, alala nende enjibulo, bacha ohwelolera emibiri chaabwe, hu mbaka y'endaalo chidatu nende esituundu, handi sibachia ohukanya bati chisiihibwe daawe. 10Abandu b'ohusyaalo huno nabo bacha ohusangaalira busa ohufwa hw'abandu babiri bano. Bacha ohwesangaasa, mani bamale bagoobanire ebirabo, olwohuba abanabbi babiri bano, bacha ohuba nibaleeta ohusaanda ohuungi muno hu syaalo huno. 11Luunyuma lw'endaalo chino chidatu nende esituundu ohuwa, omuuya kulimo obulamu kweecha kwatula eyiri Nasae, mani kwaamala kwabeengiramo, mani baamala baasingira beema handi. Mani abo boosi abali nibababweeneho beecha baateenga muno. 12Mani abanabbi babiri bala beecha baawulira ekono hoongo nilitula Mukulu nilibaboolera liti, “Eng'we muniine mwiicha ano!” Mani abasuku baabwe nibali nibasibatingaalire, baniina akulu beengira Mukulu nibali mu sireesi. 13Esiha syeene esyo, musisi njalaba yeecha yaakwaao. Esituundu silala hu bituundu ehumi eby'esiko esyo, syeecha syasihirisibwa, mani abandu 7000 baafwa. Mani abandu badoong'ao beecha bateenga muno, mani baamala baafumia obuhunuufu bwa Nasae wo Mukulu. 14Ohunyaasibwa hw'ohubiri hu weere, nae ohunyaasibwa hw'ohudatu hucha ohuloondaho bwaangu bweene! 15Bulaanu, malaika wa hataanu-na-habiri yesi yeecha yoobba eturumbeta yae, mani amakono mahoongo muno keecha kabaao Mukulu akaboola kati, “Obunyala bw'ohutuka esyaalo syoosi bulaanu buli nende Omwaami weefwe, alala nende Masiiya wae, mani achia ohutuka endaalo choosi pe!” 16Mani bulaanu, abahuluundu bala amahumi kabiri-na-bane abali nibeehala hu bisaala byaabwe by'obutuki mu moni wa Nasae, beecha boosi beehubba aasi nende obweeni, mani baamala beenamira Nasae, 17nibaboola bati, “Omwaami Nasae w'Obunyala bwoosi, oyo oliwo handi owabaao! Huhwebasa muno ohubukula obunyala bwao buhunuufu muno handi wachaaka ohutuka! 18Nae abakafwiiri beecha beechula etima olwohuba esiha sy'etima lyao syosi syoolere, esiha si bafu bacha ohuheengerwa omusango. Esiha syahoola, esyohubeereseramo esisiimo abanabbi abahalaabani bao, handi nende abandu bao boosi, abo boosi obahuberesaanga oluyaali, abahunuufu nende abadiidi sidubaanie. Esiha syahoola esyohusihirisiramo abo abasihirisa esyaalo!” 19Enyuumba ya Nasae eyiri Mukulu yeecha yekulibwao, mani Esanduku ly'Efukiirisania lyaabonehana niririmo. Bulaanu, enjeserye ch'obulafu cheecha chakwao, ohududuma, alala nende ohwaduluhana hw'ehubba, nende musisi, handi nende amakina k'efula masito byeecha byosi byabaao.

will be added

X\