OHUBWIIHULIRWA HWA YOWAANA 10

1Handi ndeecha ndaabona malaika muhunuufu muno wundi niyeeha natula Mukulu. Yali nabwihiibwe mu sireesi, handi yali nende oluyiingi nilumwebodohaanie omutwe kwae. Obweeni bwae bwali nibufwaanana nende elyuuba, handi amakulu kae kali nikafwaanana nende amakutu k'omuliro. 2Yali naali nende olupapula ludiidi mu muhono kwae nilufumbuluulwe. Yeecha yaseena ohukulu hwae hu luungi, hu nyaanja, nae ohukulu hwae hu kooda yaseena hu loba, 3mani yaamala yahuumula mu kono hoongo elyafwaana koti ohuhuumula hw'edalang'i. Niyamala ohuhuumula atyo, ohwaduluhana koti ohw'ehubba hwecha hwahuumula nihumukobolamo amahabi kataanu-na-kabiri. 4Nibalomaloma busa bati, syesi ndali nindetekeehe niindi aambi ohuchaaka ohwandiika. Nae ndeecha ndaawulira ekono nililomaloma nilitula Mukulu niliboola liti, “Biiha mu syaama bi hwaduluhana amahabi kataanu-na-kabiri kano bikaboolere. Otabyandiika daawe!” 5Mani bulaanu, malaika oyo yindali nimbweene niyeemere hu nyaanja nende hu loba, yeecha yaasingisa omuhono kwae muluungi nakulingiisye Mukulu 6mani naamala niyechubira mu liita lya Nasae, olibaao omulamu endaalo choosi pe, owaloonga Ekulu nende esyaalo, handi nende enyaanja, nende buli siindu syoosi sibirimo. Malaika oyo yemao yaboola ati haba saacha hubaao ohweng'oyaania haandi! 7Nae malaika wa hataanu-na-habiri niyeecha yaahubba eturumbeta yae, awo niwo yi Nasae achia ohwoseresera endekeha yae y'esyaama eyo, koti luyekulirao abanabbi, abahalaabani bae. 8Mani handi ekono lira lindali nimalire ohuwuliraho nililomaloma nilitulira Mukulu, lyeecha handi lyanomanomera niliboola liti, “Ewe mani cha obukule olupapula lufumbulule luli mu muhono kwa malaika yeemere hu nyaanja nende hu syaalo.” 9Ndeemao ndaachia eyiri malaika mani ndaamusaba endi yambereese olupapula ludiidi olwo. Nae yamboolera ati, “Mani lubukule mani omale olulye. Lucha ohukaluhaana lube olululu mu nda yao, nae mu munwa kwao, lucha ohuba olunyunyuula koti obuuhi.” 10Ese ndeecha ndaabukula olupapula ludiidi olwo ndaalutusa mu muhono kwae, mani ndaamala ndaalulya, mani lwaaba olunyunyuula koti obuuhi mu munwa kwaange. Nae luunyuma lw'ohulumira lwaakwa mu nda, lweecha lwakaluuhana lwaaba olululu mu nda yange. 11Mani ndeecha ndaboolerwa endi, “Handi ehabi liindi, ohoyeere ohuchia handi wayaala emboosi cha Nasae, eyiri ebyaalo biingi, obwibulaane bungi, enimi nyiingi, handi nende eyiri abatuki bangi.”

will be added

X\