OHUBWIIHULIRWA HWA YOWAANA 1

1Esitabo sino sirimo ebiindu byaandiikwa ebidiira hu biindu bicha obubao bi Yesu Kristo yabwiihula. Nasae niye owamuberesa ohubwiihulirwao huno, hu yemewo anyale ohweekesa abahalaabani bae ebiindu bicha obubao bwaangu muno. Mani Kristo yeecha yatuma malaika wae ohuchia eyiri Yowaana omuhalaabani wae, amwekese abimanye. 2Mani Yowaana yakaniaya ebiindu byoosi biyali nabweene. Mani yino niyo enomanoma yae yidiira hu mboosi chitula eyiri Nasae, nende obwadyeeri bwabwiihulwa nende Yesu Kristo. 3Ewe osoma esitabo sino wehoye, handi mwesi mwehoye eng'we abatekeeresa emboosi y'obunabbi yino, mani mwafunihira esyo esiba nisyaandiikwa mu sitabo sino! Olwohuba esiha syasuda aambi, si biindu bino byoosi bicha ohuholehaniraho. 4Ohutula eyiri Yowaana, ohuchiira abafukiiriri bali mu biko bitaanu-na-bibiri ebiri mu situundu sy'esyaalo sya Asiiya. Esisa nende emireembe bitula eyiri Nasae, oyo oliwo, oyo owaliwo, handi oyo ochia ohwiicha, nende ebitula eyiri myooyo bataanu-na-babiri abali mu moni w'esisaala syae sy'obutuki. 5Handi esisa nende emireembe bitula eyiri Yesu Kristo, omujulisi mwesikwa mweene, owataangira ohusyuuhisibwa ohutula mu hufwa, handi omutuki w'abatuki bo hu syaalo, bibe nang'we. Yesu Kristo yatuheera, handi ohweema hu hufwa hwae hw'ohweyaanayo, yatuboolola ohututusa hu bibi by'efwe. 6Handi Yesu Kristo yatuhola ohuba obutuki bw'abalaamisi, ohuhalaabanira Nasae wae handi Laatang'ene. Yesu Kristo anyoole oluyaali alala nende obunyala endaalo choosi! Amiina. 7Boneho, mbawo yechera hu maleesi! Buli muundu yeesi achia ohumubona, noteereho nende abamufumita beene. Abandu boosi abali hu syaalo bacha ohulira. Mani nilwo lu sichia ohuba! Amiina. 8Omwaami Nasae w'Obunyala bwoosi, oliwo, owaliwo, handi ochia ohwiicha aboola ati, “Niise otangira (alpha), handi omaliirihayo (omega)” 9Niise Yowaana, mwaana weeng'we, handi koti omuloondi wa Yesu, ndi owaasy'eng'we mu hwesimiirisa hutekanyiisa ohweema hu husaanda hwichiraanga ab'obwaami bwae. Ndayirwa ndateebwa hu sisiinga sya Patimo, olwohuba ndayaala Emboosi ya Nasae nende obwadyeeri bu Yesu yabwiihula. 10Mani hu ludaalo lw'Omwaami, Mwooyo yaniina, mani ndawulira ekono lyubba koti ely'eturumbeta nilyayula muno, nililomalomera emukoongo wange. 11Lyaboola liti, “Yandiika ebiindu byoobona, mani otume esitabo esyo sichiire abafukiiriri bali mu biko bitaanu-na-bibiri bino: Buwefeeso, Simirina, Perigamumu, Siyatiira, Saradiisi, Filadeefia, nende Laodesia.” 12Ndakaluuhana ohubona owali naalomaloma naange, mani ndabona ebiteeni by'amataara, eby'esaabbu bitaanu-na-bibiri. 13Handi mu byeene ebyo, mwalimo esyali nisifwaana koti omuundu, nafwaalire eganjuula lyereera lyoola hu makulu, nende olusibiro lw'esaabbu nilumwebodohaanie esirifu syae. 14Efwiiri lyae lyali elya rachaari koti epaamba, oba koti enyaange, handi emoni chae chali nichimyesuha-myesuha koti omuliro. 15Amakulu kae kali nikamesa-mesana koti omugasa kwachuungwa handi bakuubba, handi ekono lyae niliduma koti amaachi kali ohwebbwomoola nikaakuha ohutula akulu hu makina. 16Yali nadiirire ening'ning'i chitaanu-na-chibiri mu muhono kwae muluungi, nende olugaanga lwooki, olw'obwooki hu maande choombi, olwatula mu munwa kwae. Obweeni bwae bwali obumesa-mesana koti elyuuba ly'esideete akati. 17Nindamubona, ndakwa mu makulu kae koti omuundu ofwiire. Yandaaho omuhono kwae muluungi, mani yaboola ati, “Otatya daawe! Niise otangira handi omaliirihayo. 18Niise oli omulamu! Ndali ndafwa, nae bulaanu ndi omulamu w'endaalo choosi. Ndi nende obunyala hu hufwa nende hu syaalo sy'abafu. 19Mani yandiika ebiindu biobona, ebiindu biriwo bulaanu, nende ebiindu bicha ohuholehana luunyuma. 20Sino nisyo esyaama sy'ening'ining'i chitaanu-na-chibiri ch'obona mu muhono kwaange muluungi, nende esy'ebiteeni by'esaabbu bitaanu-na-bibiri by'amataara: Ening'ining'i chitaanu-na-chibiri chino, nibo bamalaika b'abafukiiriri bali mu biko bikabuhaane bitaanu-na-bibiri, handi ebiteeni by'amataara bitaanu-na-bibiri, nibyo abafukiiriri bali mu biko bikabuhaane bitaanu-na-bibiri.

will be added

X\