ABAFILIPI 3

1Nimaliirisa basyaange, mwehoyere mu Mwaami. Ohubandiikira ebiindu bifwanana nende koti bindabaandiikiraho hale, haba sibinjuuna, nae hoyeere hole endyo hulwobulai bweeng'we. 2Mweliinde embwa, mweliinde abaholi b'ebibi, mweliinde abo abadonyadonya emibiri. 3Olwohuba efwe niifwe ohuhebwa hwadyeeri, abenamira Nasae mu mwooyo, handi abeninisirya mu Kristo Yesu, handi abatesikaho omubiri kata nabudiidi. 4Kata nende ese mweene andahaba niindi nende esifune sy'ohwesika omubiri kwosi. Omuundu wundi yeesi naliwo obaasa ati, niye oli nende esifune esy'ohwesikaho omubiri kwosi, ese niise oli nende esihiraho esyo muno: 5ese owahebwa hu ludaalo lwa chitaanu-na-chidatu, omuundu otula hu bandu Bayisirayiri, ow'oluyia lwa Bbenjamini, Omuyibbulaniya webulwa nende Abebbulaniiya; ohweema hu malako ka Musa bikadaha, Omufalisaayo wawu, 6ohweema hu huchuunirwa ediini omwiiti w'abafukiiriri, ohweema hu bulungifu bweema hu malako ka Musa, otaaliho nende esibi syoosi. 7Nae kata katyo, engaanga yoosi yindali nindanyoola, ndeecha ndayibala koti ohufwiirwa hwereere hulwa Kristo. 8Mubwadyeeri bweene mbala buli siindu syoosi koti ohufwiirwa hwereere hulw'obulayi bubitiirifu obuli muhumanya Kristo Yesu Omwaami wange. Hulwomweene oyo, ndabita mu buchuuni bw'ohufwiirwa ebiindu byoosi, mani ndabibala ohuba koti obunyaka buhaya, hu nyemeo nyale ohugagayala mu Kristo 9mani njakaanibwe nimulimo, nitanyoolere obuluungifu obwaange omweene, obweema hu malako ka Musa, nae obwo obubitira mufukiirira mu Kristo, obuluungifu butula eyiri Nasae, handi obweema hufukiirira; 10hu nyale ohumumanya nende ohumanya amaani kohusyuuha hwae handi hu nyale ohukabana hu husaandisibwa hwae, fwaanane nae mu hufwa hwae, 11endi nibinyaliha, syesi nyale ohunyoola ohusyuuha ohutula mu bafu. 12Sisiri mbwe ndamala ohunyoola esisuubirwa sino, oba oti ndamala ohuba otaalihooho esibi syoosi; nae ndi ohwedinya ninjiiririra nyale ohusinyoola omweene, olwohuba Kristo yamala ohuhola ohuba owae mweene. 13Basyaange, haba siindi ohusiyira endi omweene niise owenyalira ohusinyoola; nae esiindu silala syong'ene siindi ohuholaanga siri mbwe, ndi ohwibiriranga ebyo byoosi ebiri enyuma wange, nende ohwedinyaanga ohuchia mu moni endi njole eyiri esyo esiri emutwe wange, 14Ndi ohwedinyirisaanga ninjia mu moni eyiri esisuubirwa hu nyale ohunyoola esisiimo siri Mukulu esya Nasae esibitira mu Kristo Yesu. 15Lehe efwe abali abahuluundu hube nende embaasa yino; nae nikali aliwo mu siindu syoosi syooba nobaasiramo bundi, Nasae mweene niye ochia ohuhubwihulirao syosi esiba nisiri esihoyera hu siindu esyo syosi. 16Ohutusaho, lehe efwe hwomiirire hu bwadyeeri bu hwamala ohunyoola. 17Basyaange, mweyonge hu hundekeraaniaho, mani mubalihe bulai abo abali ohumenya koti eng'we muli, koti lumuli nende esyohuboneraho mweefwe. 18Olwohuba abandu bangi muno, ba buli siha ndi ohubalomalomaangaho yimuli, handi bandi bulaanu ohubalomalomaho yimuli nende amasika maangi, bamenya nibali koti abasuku b'omusalabba kwa Kristo. 19Ohumaliiriha hwaabwe hucha ohuba ohusihirira, nasaye waabwe ni olusooso, nae handi beninisirya busa mu soni chaabwe, nende ebibaaso byaabwe nibyaandira hu biindu by'ohusyaalo. 20Nae efwe, obwiihalo bwefwe fweesi, buli Mukulu, mani ebweene eyo niyo yihulilindira Omuwonia, Omwaami Yesu Kristo, 21ochia ohukaluuhania emibiri cheefwe chitaalimo echamu, chibe koti omubiri kwae kw'oluyaali, niyehoonyera amaani akamunyaliranga endaalo chino, ohutechaanga ebiindu byoosi aasi wae omweene.

will be added

X\