ABAFILIPI 2

1Obulamu bweeng'we mu Kristo bubameedamo amaani, handi ohudaha hwae hubagumia emyooyo. Muli silala nende Mwooyo. Mwooyo yabaambaania alala, mani muli nende ohudiirira abaasyeng'we esisa alala nende ohubaleheramo. 2Bulaanu mbekweeda musangaasire elalira nimuba nende ebibaaso bifwaanana, nende ohudahana hufwaanana, mani mubecheenge silala mu myooyo cheeng'we nende mu bibaaso byeeng'we. 3Mutaholaanga esiindu syoosi nimulwanira oluyaali, oba nimudaha ohwelolya hutaalimo obuhoonyi, nae mubecheenge abaloonga mu moni w'abaasyeng'we, nimubayira koti abali nende oluyaali ohubahira. 4Handi buli muundu hweeng'we abaseenge hu siwaasye aba nadaha ataali ohubasaanga busa hu simweene aba nadaha. 5Ebibaaso byeeng'we bihoyeere ohubechaanga koti bi Kristo yali nabyo: 6kata nende niyali naali silala nende Nasae, haba siyakesaho ohwehoonyera amaani ako ohudoong'a niyaakana nende Nasae. 7Ohutusaho, omweene yemalaho ebiindu byoosi, mani yehola koti omuhalaabani. Yebulwa koti omuundu mani yeecha yafwaana koti omuundu. 8Yali omuloonga, mani yakendera mubuwulisi. Ohwolera elalira mu hufwa ohufwa hwae hu musalabba. 9Mani sakira Nasae yamuniinia akulu muno, handi yaamubeeresa eliita ly'oluyaali lihira ameeta koosi. 10Mani sakira ohweema hu luyaali lw'eliita lya Yesu, ebiloonge byoosi ebiri Mukulu nende hu syaalo, nende aasi w'esyaalo, bicha ohusigama aasi bibeerese eliita lya Yesu oluyaali. 11handi enimi choosi chicha ohutuumbula chiti, Yesu Kristo niye Omwaami, nichiberesa Nasae Laatang'ene oluyaali. 12Sakira, basyaange baheerwa, koti lu mwambuliraanga, buli siha niindi nang'we, mani bulaanu muhoyeere ohumbulira ohuhirao, lutaali aambi nang'we. Mwemeede ohuhalaabanira obuwonia bweeng'we mu hutya nende mu luteengo. 13Olwohuba Nasae niye oli ohubaholeramo ebiha byoosi naakera nimufukiirira handi nimunyala ohuhola byadaha. 14Holeenge buli siindu syoosi ataali ohwekanyiisa oba ohuyingana, 15hu munyale ohuba nimutaaliho esiindu syoosi sibabanenya, nae mube abalungifu koti abaana ba Nasae ababulaho esibi, abamenya mu syaalo sy'abandu badondobanu handi abaholi b'ebibi. Mani muhoyeere ohubaaduhamo, koti ening'ining'i chihosa mu syaalo, 16nimwomiriire hu Mboosi y'obulamu. Nimuhola mutyo mba njia ohuba nende esifune esy'ohubehoyeramo hu ludaalo lwa Kristo, olwohuba sichia ohweekesa siti amaani kange koosi alala nende omulimo kwaange, haba sibyali ebyebihaya. 17Kata amabaanga kange kahaba nikachuhibwa aasi hu siyaanwa syeefukiirira yeng'we eyiri Nasae. Nisiba sityo, ndi omusangaafu ohukabana esangaalo lyaange nang'we mweesi. 18Mu ngeri nasilala, mwesi muhoyeere ohukabana esangaalo lyeng'we alala naange. 19Nihuli ohudaha hw'Omwaami, suubira endi njia ohubatumira bwaangu Timoteo, hu nyale ohugumisibwa nende emboosi echibadiiraho. 20Awumao omuundu wundi ohutusaho oyo yeng'ene obachuunirwa koti ese. 21Abadong'ereyo boosi bafwa hu biindu byaabwe byong'ene, ataali ohubaasa hu bidiira hu Kristo Yesu. 22Handi mwesi mumanyiire elalira koti lu Timoteo yekesera elalira ati anyala omulimo okwo bulai, handi koti omwaana nende laatang'ene, hwahalaabanira alala ohweekesa Emboosi Ndai. 23Suubira ohumutuma yimuli ndaafwa ndamanya koti lunja ohuba. 24Handi suubira mu Mwaami endi ese mweene njia ohwiicha eyo bwaangu. 25Handi mbaasire endi sihoyera ohubatumira omwaana weng'we Epafurodiitu yesi owamala ohuhalaabana. Tuma yimuli omwaana weefwe wuno Epafurodiitu owamala ohuhalaabana naahola koti wamwaanda weng'we ohuhoonyera. 26Yekomba muno ohubabona mweesi, handi yachunisibwa muno mu mwooyo ohuwulira ati mwamanya nalwaala. 27Mubwadyeeri bweene yali omulwaaye muno yoola aambi ohufwa. Nae Nasae yeecha yaamukwiira esisa, handi syesi yangwiira esisa, hu nyale ohutaba nende esibeera siingi muno. 28Sakira ndi omwetekefu ohumutuma yimuli, hu nyale ohusangaala nimumubweene handi, hu sibeera syaange siwe. 29Sakira mumwakaanire nende esangaalo liingi koti abakaanira omwaana weng'we mweene mu Mwaami. Handi mwiseenge oluyaali mu bandu bafwaana batyo, 30olwohuba yawaayo obulamu bwae yaona ohufwa hulwohuhalaabanira Kristo, hwaanyale ohumbeeresa obuhoonyi bu eng'we mutanyala ohumbeeresa.

will be added

X\