ABAFILIPI 1

1Ebbarwa yitula eyiri Paulo nende Timoteo, abahalaabani ba Kristo Yesu. Niyichiira aboolerefu ba Nasae abali mu bulala nende Kristo Yesu, alala nende abemeresi b'emikaanda ch'abafukiiriri alala nende abahoonyi baabwe. 2Lehe Nasae Seefwe, alala nende Omwaami Yesu Kristo, bababe ehabi nende emireembe. 3Buli lumbabaasaho, ndeebasa Nasae hulw'eng'we; 4handi buli siha simbekongooyera, ndekongooya nende esangaalo, 5olwohuba mwahoonya ohuhalaabanira Emboosi Ndai, ohuchaakira elalira hu ludaalo lwataangira ohwoola bulaanu. 6Sakira manyire nende obwomiifu endi, Nasae wachaaka omulimo mulai mweng'we, achia ohwemeeda nakwo ohwoola lwaalikumaliirisira hu ludaalo lwa Kristo Yesu. 7Buli siha muli mu mwooyo kwaange! Mani sakira silayi mbabaaseho endyo. Olwohuba eng'we mweesi mwakabanira alala naange mu habi yi Nasae yambeeresa, niindi mu mboyero bulaanu, handi nende nindali omulehuule ohulwanirira Emboosi Ndai nende ohuyomiisira elalira. 8Nasae niye omujulisi wange omanyire ati ndi ohuboola obwadyeeri endi, ohubaasa humbabaasaho, hubaasa hwa Yesu Kristo hweene. 9Ndekongooya endi, ohudahana hweeng'we hwemeede ohuhula-hulana, alala nende ohumanya buli siindu nende ohutegeera bulai, 10hu munyale ohumanya ohukabuhania esiindu siba nisihiramo obulayi mu byoosi. Awo mucha ohumenya nimubulaho ekoondo lyoosi, nende ohunenyesebwa hwoosi hu ludaalo lwa Kristo. 11Obulamu bweeng'we boosi bucha ohwaama ebyaamo by'esaambo ndayi bi Kristo mweene aleeta mani byaaberesa Nasae oluyaali nende efuma. 12Basyaange, ese ndaha mumanye muti, esiindu syandeholehaho, syahoonya muno ohusalaania Emboosi Ndai. 13Esyatulamo syali siti, abaliindi b'edooho boosi, alala nende abandu bandi boosi banyala ohumanya bati ndi mu mboye hulwohuhalaabanira Kristo; 14handi ohumenya hwange mu mboye hwabeeresa abasyange bahira obuungi abafukiiririra Omwaami amaani kohwemeeda ohuyaala Emboosi ya Nasae nende ekono ly'akulu ataali ohutya hwoosi. 15Mubwadyeeri bweene abandu bandi bali ohuyalaanga Kristo ohweema hu hali-hali nende obusoolo nae abandi beekesa nende embaasa ndayi. 16Abandi bano bahola batyo mu hudaha, olwohuba bamanyire bati bandeeta ano ohujulira Emboosi Ndai. 17Nae abandi bala bayaala Kristo ohweema hu siwonya ataali obwadyeeri, handi abeene badaha ohweniinia akulu busa; babaasa bati banyala ohundeetera ebidinyu nisisiiri mu mboye. 18Nae mbula emboosi yindi yoosi ohutusaho sangaala busa, olwohuba mu ngeri yoosi baba beekesa busa Kristo, kata ebichiiririrwa byaabwe byahaba nibiri ebihyaamu oba ebikololofu. Handi ese njia ohwemeeda ohusangaala, 19olwohuba manyire endi, ohweema huhwekongooya hweeng'we, nende obuhoonyi butula eyiri Mwooyo Mwolerefu wa Kristo, bacha ohumboolola ohutula mu mboye. 20Esiindu sihira ohwekoomba nende ohusuubira muno nisyo siti, haba siinjia huhaywa ohwoseresa omulimo kwaange, nae endi ebiha byoosi kata bulaanu buti, njia ohuba nende esinani siingi esiteeta oluyaali lwa Kristo mu mubiri kwaange, kata andahabaao omulamu oba niifwa. 21Nae eyiri ese, ohuba omulamu olwo nilwo oluyaali lwa Kristo, handi ohufwa nihwo ohunyoola amagoba. 22Nae nindemeeda ohuba omulamu mu mubiri, awo mba njia ohwemeeda ohuhola omulimo mulai kundi; bulaanu ese ngoterwe esiindu sihoyeere ohudoola. 23Ebibaaso bibiri bino bingabuhaaniemo akati-kaati; ndaha muno ohuleha obulamu buno njie mbe nende Kristo, esyo nisyo esihiramo obulayi; 24Nae hulw'obulayi bweeng'we, silayi ndoonge niindi omulamu. 25Manyire sino bulai bweene mani sakira nyomiisa endi njia ohudoonga niindi omulamu. Njia ohuba nang'we mweesi ohubameedamo obujulisi endi mudoong'e nimuhula-hulana nende esangaalo mu fukiirira. 26Mani sakira, ninjia ohuba nang'we handi mucha ohuba nende esangaalo liingi mu bulala bweeng'we mu Kristo. 27Esihirira elalira nisyo mbwe, esaambo cheeng'we chihoyeere chibe koti Emboosi Ndai ya Kristo yidaha, kata nimba niinjichire ohubabona, oba nimbulira-buwulira ebibadiiraho. Mube abomiifu muno nende esichiiririrwa silala, handi mulwaanire alala nende embaasa ndala eyitula mu Mboosi Ndai. 28Mutatichaanga abasuku beeng'we, nae buli siha mubecheenge nende esinani, olwohuba esyo nisyo esicha ohubeekesa siti bacha ohuhirwa, nae eng'we ning'we abacha ohuhira, olwohuba Nasae niye ochia ohukera muhire. 29Olwohuba Nasae yamala ohubabeeresa ehabi ati, ataali ohufukiirira mu Kristo hwong'ene, nae nende ohumusaandira hwosi. 30Olwohuba ohulwaana hu muli nahwo bulaanu, nihwo nasilala nende humwambona ninwaana mu biha byabita, handi humuwulira muti sisiiri ninahwo.

will be added

X\