MATAYO 9

1Yesu niyamala ohwingira mu lyaato, yaasyaabala yakaluhayo mu siko sy'ewaabwe syeene. 2Niyoola busa ati, bamuleetera omusaacha wali niyadataala niyeyaliise hubutalihe bwae. Nae Yesu niyabona efukiirira yaabwe, yabolera owali yadataala oyo ati; “mwaana wange, guma omwooyo, ebibi byao bihuleherwemo.” 3Nae Abandiiki ba Amalako beecha baboolanira abeene-na-beene bati, “Omuundu wuno ali ohufwoola Nasae!” 4Nae Yesu koti luyali namanyire ebibaaso byaabwe, yaboola ati; “Lwasiina muli nende ebibaaso bibi mu myooyo cheeng'we?” 5Esiri ena esyaangu, ohuboola oti, “Ebibi byao bihuleherwemo,” kose ohuboola oti, “Siingira okeende?” 6Nae humunyale ohumanya muti Omwaana w'Omuundu ali nende obunyala husyaalo obw'ohuleheramo ebibi, yeecha yaboolera omusaacha wadataala ati; “Siingira, obukule obutalihe bwao ochie engo!” 7Mani yaasingira yacha engo. 8Nae esidiyiha sya bandu esyali awo, nisyabona sityo, syatya, mani syakinia Nasae, owaberesa abandu obunyala buli butyo. 9Yesu niyali atula eyo, yeecha yabona omusaacha olaangwa Matayo niyehaale abundu yibatoosera omusolo, yamuboolera ati, “Noonde.” Matayo yasingira yaamuloonda. 10Handi Yesu niyali anyoola esyengoloobe, abatoosa b'emisolo bangi nende abaholi be bibi, beecha beehala balya nae esyengoloobe alala nende abaloondi bae. 11Nae Abafalisaayo nibabona sino, baboolera abaloondi bae bati; “Lwasiina omweekesa weng'we alya nende abatoosa b'emisolo alala nende abaholi be bibi?” 12Nae niyawulira esyo, yaboola ati, “abandu balamu sinibo abadaha omulerwa, nae abalwaye nibo abamudaha.” 13Muche mani mweeke amahulundu kasino, “Ndaha esisa, nae haba siindaha esabo ly'ebisolo bisambwa.' Olwohuba sindeecha ohulaanga abolerefu, nae abaholi be bibi.” 14Olwoola, abaloondi ba Yowaana beecha eyiri Yesu nibaboola bati; “Hu siina efwe nende Abafalisaayo husiiba, nae abaloondi bao haba sibasiiba?” 15Nae Yesu yababoolera ati, “ Abalaange bo hu sidyaalo sy'obugole, banyala batye ohwelalihira omugole mweene nasisiiri nabo? Nae endaalo chahoole chi mugole yahabatusibweho, mani awo nilwo bosi lubahasiibe. 16Handi abulao omuundu wahanaba esiraka siyaaha hu ngubo ngofu, olwohuba esiraka esyo siba sinehuuna sitanduhe situle hu ngubo, mani esitanduhe syehole esitabaafu ohuhirahoo. 17Handi, efwiini njiaha sibayita musikiingiro syeseero sikofu. Nisiba sityo, esikiingiro sikofu esyo siba sichia ohwaadiha, mani efwiini yiidihe, handi esikiingiro syosi sitanduhe. Nae, efwiini njiaha yihoyeere bayite mu sikiingiro sy'eseero siyaaha, hu byombi binyale ohulindana.” 18Yesu niyali nasilomaloma nabo, omutuki wundi yeecha yaasigama mu moni wa Yesu, namuboolera ati; “Omuhaana wange yahafwa busa esiha sino, nae yicha omwiiseho omuhono kwao, mani yeecha ohulamuha.” 19Mani Yesu yasingira yaamuloondaho alala nende abeeki bae. 20Nae bone, omuhasi wali alwaalire obulwaae bw'ohudaachirira ohumala emyaaka ehumi-na-chibiri yamutulira emukoongo, yadiira hu kemo ly'engubo yae; 21Olwohuba yaboola mu mwooyo kwae ati, “Ninyala kata ohudiiraho busa hu ngubo yae, njia ohuwona.” 22Yesu niyahubba amahemo yamubona mani namuboolera ati; “mwaana wange, guma omwooyo! Efukiirira yao yihuwonisye.” Mani ebiha byeene ebyo ni omuhasi oyo aona. 23Nae mani Yesu niyoola mu nyumba y'omutuki, yabona aboobbi bamalere nende esidiyiha sy'abandu nisiyobere, 24yaboola ati, “Mbwere eyi! Olwohuba omuhaana wuno saafwiire, nae ali ohukona.” Nabo bamucheha busa. 25Nae esidiyiha sy'abandu nisyamala ohutula erwaanyi, Yesu yengira mu nyumba, mani yamudiira omuhono, mani omuhaana wali afwiire yasingira. 26Emboosi eyo yasasaana mu situundu sy'esyaalo esyo syoosi. 27Nae Yesu niyali atula nawaao, abaofu babiri bamuloondaho nibahuumulira akulu bati, “Mwaana wa Daudi, Tukwiire esisa!” 28Nae niyengira mu nyumba, abaofu babiri beecha yali, mani Yesu yababoolera ati, “Mufukiirira muti nyala ohubaonia?” Nabo bamukobolamo bati, “Eee, Omwaami!” 29Mani Yesu yeecha yadiira hu moni chaabwe naboola ati, “Ohweema hu fukiirira yeng'we, hasibaholerwe sityo.” 30Mani emoni chaabwe chalimbula chachaaka ohubona. Mani Yesu yabahuutira ati, “Mutabooleraho omuundu yeesi.” 31Nabo nibatula ao bachaaka ohulaangirira ebidiira hu Yesu mu situundu sy'esyaalo esyo syoosi. 32Abo nibali nibawaao bati, bone, bamuleetera omuundu wakwa esiru oliho omusaambwa. 33Nae niyamala ohwirusa omusaambwa okwo, owakwa esiru oyo yalomaloma, mani esidiyiha sy'abandu syawuka, nisiboola siti; “Esiindu sifwaana siti, sisibechaanga hoo mu Yisirayiri.” 34Nae Abafalisaayo nabo baboola bati; “Wuno yerusa emisaambwa olwamaani k'omwaami w'emisaambwa.” 35Yesu yacha nakeenda mu biko nende mu ngoongo choosi, niyeekesa mu Sinagoogi cha Abayudaaya handi nalangirira Emboosi Ndai y'Obwaami bwa Nasae, handi nawonia endwaae nende amadehere bitaali nasilala. 36Nae niyabona esidiyiha sy'abandu, yabakwiira esisa, olwohuba bali abelalihirifu handi nibataali nende obuhoonyi koti amakoondi kataali nende omwaayi. 37Mani Yesu yaboolera abaloondi bae ati, “Ekesa liingi, nae abakesa nibo abadiidi. 38Sakira musabe Omwaami mweene kesa, atume abahalabani mu kesa lyae.”

will be added

X\