MATAYO 8

1Olwoola, Yesu niyamala ohwiha ohutula hu lugulu, esidiyiha sy'abandu sihoongo muno syeecha syamuloonda. 2Abweene awo, omusaacha wali alwaala esikuhu yeecha yi Yesu yali, yaasigama mu moni wae, yaamala yaamuboolera ati; “Omwaami, nooba nodaha, onyala wamonia!” 3Yesu yakolola omuhono kwae, yamudiiraho, naboola ati; “Ndaha, mani wona.” Esiha syeene esyo, esikuhu syamwaamuluhaho. 4Yesu niyamala atyo yemawo yamuhuutira naboola ati, sino, otasibooleraho omuundu yeesi ohutusaho cha weyekese eyiri omulaamisi, ahwehalirise; omale owaane esiyaanwa syekesa abandu siti owonere koti lu Musa yalagira mu malako. 5Olwoola, Yesu niyengira e Kaperanaumu omusikaari muhunuufu owe Roomu yeecha yabukanana nae, yaamusaba obuhoonyi ati; 6“Omwaami, ndi nende omuhalabani wange engo omulwae muno, saanyala kata nende ohukeenda hulwobuchuuni bungi.” 7Yesu yamukobolamo ati; “Njicha ohwiicha muwonie.” 8Nae omusikaari oyo yaamuboolera ati; “A-a, Omwaami ebyo haba, ese sihoyerwa ewe kata ohwiicha ohwingira mu nyumba yange, ohumalaho, lomaloma busa emboosi yong'ene ni omuhalabani wange awona. 9Olwohuba syesi ndiho nende abaatuka, handi syesi ndi nende Abasirikari baanduka. Nindagira mulala endi, ‘Cha,’ ni achia busa; handi nindagira owundi endi, ‘Yicha,’ niyeecha busa; handi nindagira omupakasi wange endi; ‘Hola sino,’ nasihola busa.” 10Yesu niyawulira atyo yawuka muno, yaboolera abali nibamuloondaho ati; “Mbaboolera obwadyeeri endi, sisiiri ohubonaho efukiirira koti yino hu muundu yeesi mu Yisirayiri. 11Ndaha mumanye muti abandu bangi bacha ohutula ebukwe nende emumbo baliire alala Obwaami bwo Mukulu nende Yibbulaimu, Yisaka nende Yakobbo. 12Nae abo abahatangire ohuba mu Bwaami bwo Mukulu bacha ohusukunwa erwaanyi mu sirima, yibahalirire nibesia ameeno.” 13Mani Yesu yemawo yaboolera omusikaari oyo ati, “Koti lwooli nende efukiirira otyo, kaluha engo byodaha ebyo bicha ohuhuholerwa.” Nae esiha syeene esyo omuhosi w'omusikaari oyo yaonerao. 14Yesu yacha ewa Peetero yakaana masalang'ene Peetero niyeyaliise olwohuba yali nalwaala omusuuja. 15Nae Yesu niyamudiira hu muhono, omusuuja kwamuleha yachaaka ohubahalaabanira. 16Obwiire nibweera, bamuleetera abandu bangi abaliho emisaambwa. Yesu yaberusaho emisaambwa echo nga yehoonyera busa emboosi yong'ene, mani yawonia abalwaye boosi. 17Yahola atyo ohwoseresa si munabbi Yisaaya yaboola ati, “Yatutusaho amadehere keefwe, handi yakiinga endwaae cheefwe.” 18Olwoola, Yesu niyabona esidiyiha sy'abandu simwebodohaanie, yahada abeeki bae bambuhe engereha w'enyaanja. 19Nae Omweekesi wa Malako wundi yeecha yali yamuboolera ati; “Omweekesa, njia ohuhulondaanga buli yochiira.” 20Nae Yesu yamukobolamo ati; “Amabbwe kali nende ameena kakamenyamo, handi amayoni kosi kaaba nende ebiswi byako, nae Omwaana w'Omuundu saali nende kata yageeng'a omutwe.” 21Mulala hu beeki bae yaamuboolera ati; “Omwaami, leha mberi njie siihe Laata.” 22Nae Yesu yamukobolamo ati; “Ewe noonde. Leha abafu basiihe abafu basyaabwe.” 23Yesu yengira mu lyaato yasyaabala alala nende abeeki bae. 24Abweene awo, esifuusye syamaani syeecha syeyisa enyaanja, amafwinda kasiingira kahubba elyaato lyadaha ohwibira. Nae Yesu yali niyeyaliise endoolo. 25Abeki nibabona batyo, bacha yali, bamusimusa ni bamuboolera bati, “Omwaami; Tuwonie! Hufwa!” 26Nae Yesu yababoolera ati, “Lwasiina mutya?” Nga muli nende efukiirira ndiidi! Yesu yasingira yahabuhira esifuusye nende enyaanja, mani byoosi byamala byayenjerera chi! 27Mani buli muundu yawuka, beteeba bati; “Nae wuno muundu w'engeri siina, kata esifuusye nende enyaanja byosi bimuwulira!” 28Mani Yesu niyoola hu sikobero sy'e Gadaraneese, abandu babiri abaliho emisaambwa, beecha babukaanana nae nibatulira mu ng'uungu chibasihaangamo abandu. Ab'emisaambwa abo bali abaalaba muno, mani abulao omuundu wadahaanga ohubitira yibali. 29Nibamubona, bachaaka ohwayulira akulu bati, “ Mwaana wa Nasae, otukoonyaho siina? Wichire ano ohutuboneresa ebiha nibitoola?” 30Awo waliwo omukaanda muhoongo okw'embiichi nikwaaya. 31Mani emisaambwa chasaba Yesu chiti; “Nodaha ohutwirusa, mani tusiindihe mu mbiichi chino.” 32Mani Yesu yaboola ati; “Muche.” Mani chacha cheengira mu mukaanda kw'embiichi okwo. Omukaanda okwo kwoosi kwewulula embiro kwehubba mu nyaanja, kwebira kwaafwa. 33Abaayi b'embiichi echo nibabona batyo, beeruha bacha mu siko baboolera abandu byoosi ebyali byeholere hu bandu bemisaambwa. 34Sino syakera abandu bo mu siko esyo beecha ohubonana nende Yesu, bamwekongooya atule mu situundu syaabwe esyo.

will be added

X\