MATAYO 6

1“Nimuholaanga esiindu silai, mweliindeenge obuteniinia mu moni wa bandu, nimweekesa ebilai bimuba nimuholere. Olwohuba nimuhola mutyo, haba simuba mucha ohunyoola omukabo kwoosi ohutula eyiri Seeng'we oli Mukulu. 2“Mani noberesaanga omuundu muwati esiindu syoosi, otefumianga muno eyiri bandu nobaboolera byooba nooholere, koti lu Bebachirisi baholaanga mu Sinagoogi, nibeyemeresa hu ngira nibadaha abandu bababone hu babafumie. Mbaboolera obwadyeeri endi, abo bamala ohunyoola omukabo kwaabwe kwoosi. 3Nae eng'we nimuhonyaanga omuwati esiindu syoosi, omwiicha wao mweene, atamanyaangaho syooba nooholere, 4hu bulaanu, obuhoonyi bwao obwo, bunyale ohudoong'a obwo musyaama. Mani hu Nasae wao, obona ebiholebwa musyaama, omweene niye olihubeeresa omukabo kwao. 5“Mani nooba niwekongooya eyiri Nasae, otafwananaanga nende Abebachirisi! Abo nibo abaheera ohweyemeeresa mu Sinagoogi nibekongooya, abandu bababone. Handi kata bacha nibeyemeresa hungira hu buli muundu oba naabita, abone ati nibo abamanya ohwekongooya. Mbaboolera obwadyeeri endi, abo bamala ohunyoola omukabo kwaabwe kwoosi. 6Nae ewe nooba niwekongooya, yingiraanga weyikalira mu nyumba yao, hwomale wekongooye Nasae Lataao otabonehana. Mani, Nasae Lataao oyo, obona ebyehola musyaama, niye oba achia ohuhubeeresa omukabo kwao. 7“Mani nooba niwekongooya, otehoonyeraanga emboosi nyiingi muno koti lu Bebachirisi baholaanga; olwohuba babaasa bati, Nasae nilwo lwaba achia ohubawulira ohweema hu hwekongooya hwaabwe huleei ohwo. 8Sakira eng'we nang'we, mutafwaanana nabo, olwohuba Seeng'we oli Mukulu amanyire bimudaha kata nimusisiiri ohumusaba. 9Mani yino niyo embya yimuhoyeere ohwekongooyeramo: Seefwe oli Mukulu; eliita lyao lifumisibwe. 10Obwaami bwao bwiiche; byodaha biholebwe musyaalo, koti lu biholwa Mukulu. 11Tuberese olwaleero, ebyohulya byeefwe byabuli ludaalo; 12Tuleheremo ebibi byeefwe, koti lu huleheramo abo abatuholera obubi. 13Otatuyira muhuhemwa, nae tuwonie mu bubi.” 14Olwohuba, nimuleheramo ababahola bubi, nilwo lu Seeng'we oli Mukulu yesi achia ohubaleheramo. 15Nae nimutaleheraangamo abo ababahola bubi, Seeng'we oli Mukulu yesi haba saachia hubaleheramo ebibi byeeng'we. 16“Nae nimuba nimusiiba, mutabiyiirisaanga koti Abebachirisi lubahola. Bahuunia obweeni bwaabwe hu bandu bamanye bati bali ohusiiba. Mbaboolera obwadyeeri endi mungeri eyo, bamala ohufuna omukabo kwaabwe kwoosi. 17Nae eng'we nimuba nimusiiba, mwebaheenge amafuta mu mutwe, handi mwetereseenge mu bweeni mwosi, 18abandu bahaye ohumanya bati muli ohusiiba; mani Nasae weng'we obona ebyehola musyaama niye ochia ohubabeeresa omukabo kweeng'we. 19“Mutabiiha obuyiinda bweeng'we mu syaalo muno, yi masiriri nende emberebeende binyaasa binyala ohunyaasa, handi nende abanyaka banyala ohwingirira babiiba. 20Nae, obuyiinda bweeng'we, mu bubiihe Mukulu yi masiriri nende emberebeende, bitanyala hunyaasa, kata nende abanyaka yibatahanyala ohwingira beeba. 21Olwohuba, yi buyiinda bwao yibuba, niyo yosi yi mwooyo kwao kuba. 22“Emoni niyo etaara lyo mubiri. Sakira emoni yao niyiba enamu, omubiri kwao kwoosi kuba mu bulafu. 23Nae emoni yao niyitaali enamu, omubiri kwao kwoosi kuba mu sirima. Mani obulafu bw'omubiri kwao, nibwehola esiirima, esiirima esyo ngasiba sinaabe esibitiirifu! 24“Abulao omuundu onyala ohuhalaabanira abakali babiri. Aba achia ohuheera mulala nae asyule owundi, oba awulire mulala nae alekerese owundi. Haba sonyala ohuhalaabanira Nasae handi esiha syeene esyo wahalaabanira obuyiinda.” 25“Sakira mbaboolera sino endi, mutelalihiriraanga hu by'ohulya oba eby'ohung'wa, kata bimweenya mu bulamu bweeng'we oba engeri y'ohwefwaalamo. Obulamu bw'omuundu nende ebyohulya, oba omubiri kw'omuundu nende ebyohwefwaala, siina esihira esiindi? 26Mubonereho hu mayoni, haba sikataaka kata kakesa kabuunga mu byaki, ohutusaho Nasae Seeng'we, niye okaliisa kanyala obubaao! Nae eng'we, simuhirira elalira amayoni? 27Nae naanu hw'eng'we onyala ohwemeedaho obuyindifu hooho, hulw'ohwelalihira hwae ohwo? 28Lwasiina mwelalihira muno hu ngeri y'ohwefwaalamo? Mubonereho hu bimuli by'omusiino: Sibyenabira ngubo. 29Nae mbaboolera endi, kata Solomooni mu buyiinda bwae bwoosi siyanyala ohwefwaala yaanyirira bilai yaboneha koti ebimuli bino. 30Mani nimubona muti eyo niyo engeri yi Nasae afwaliramo ebimuli bibaao busa olwaleero, ni buhya byooma, bisambwa mu muliro, mubaasa muti Nasae oyo saanyala hubafwaasa ohuhiraho ebimuli, eng'we ab'efukiirira ndiidi? 31Sakira mulehe ohwelalihira ni mubaasa muti; ‘Hunaalye siina?’ Oba ‘Hunang'we siina?’ Oba muti, ‘Hunefwaale siina?’ 32Olwohuba, ebyo nibyo ebiindu bi bakafwiiri babaasaho buli siha, nae eng'we, Seeng'we oli Mukulu amanyire ati bino byoosi mubidaha. 33Nae mutaangire ohukoonya Obwaami bwa Nasae alala nende obwolerefu bwae; mani ebiindu bino byoosi muba mwahabiduhane. 34“Sakira mulehe ohwelalihira ebinaakweo muchuli; olwohuba, buli ludaalo luli nende ebidinyu byalwo ebilumala.

will be added

X\