MATAYO 4

1Olwoola, Mwooyo Mwolerefu yemirira Yesu yamuyira musiparara Sitaani ohumuhemerayo. 2Yesu niyamala endaalo amahumi kane natalia, enjala yachaaka ohumuluma muno. 3Sitaani yeecha yaali yaamuboolera ati, “Nikali mbwe niiwe Omwaana wa Nasae, kaluhania amakina kano kehole ebyohulya olye.” 4Yesu nae yamukaluhamo ati, “Syandiikwa siti, omuundu haba saanyala hubaao hulw'ebyohulya byong'ene nae hulwa buli mboosi yitula eyiri Nasae.” 5Handi Sitaani yemawo yayira Yesu mu siko syolerefu yamwemesa akulu hu nyumba ya Nasae 6yaamuboolera ati, “Nikali mbwe niiwe Omwaana wa Nasae, yakuha okwe aasi, olwohuba syandiikwa siti, ‘Nasae alihutumira bamalaika bae beeche bahubukaanire, bahudiire mu mahono kaabwe ohaye ohwegumulaho hu makina.’ ” 7Yesu nae yamukaluhamo ati, “Otahemaanga Nasae Omwaami wao.” 8Handi Sitaani yeecha yayira Yesu hu lugulu luleeyi muno yaamweekesa obwaami bwo husyaalo bwoosi nende oluyaali lwabwo. Sitaani yaboolera Yesu ati; 9“Njia ohuhubeeresa obwaami buno bwoosi, nosigama wanyinamira.” 10Awo bulaanu Yesu yamukaluhamo ati, “Ewe Sitaani, nduleho che era! Ohuba syandiikwa siti yinamiraanga Nasae Omwaami wao, handi niye yooba ohalaabanireenge yeng'ene.” 11Awo bulaanu Sitaani yemawo yaatula hu Yesu, ni bamalaika beemao beecha baabeeresa Yesu obuhoonyi buyali nadaha. 12Yesu niyawulira ati bamalire ohuboya Yowaana, yasingira yacha e Galilaaya; 13Yecha yaatula e Nasareti yacha yaamenya e Kaperanaumu esiko siri hugenya ly'enyaanja ye Galilaaya musyaalo sye Sebbulooni nende Nafutaali. 14Sino syaholehana hu mboosi ya Nasae yi nabbi Yisaaya yalomaloma yolerere mbwe, 15“esyaalo sye Sebbulooni nende esyaalo sye Nafutaali, ebiri hungira yilangwa Eyohunyaanja ey'engereha y'omwaalo kwa Yorudaani, e Galilaaya esyaalo sy'Abateende. 16Abo abakenderanga mu siirima leero babweene obulafu bungi. Nae abo abamenyaanga musyaalo sy'esirima sy'ohufwa obulafu bubahosere.” 17Ohutula mu biha ebyo, Yesu yachaaka ohuyaala naboola ati, “Mwefunake ebibi byeeng'we olwohuba Obwaami bwo Mukulu buli aambi.” 18Olwoola, Yesu niyali nakeenda husikobero sy'enyaanja ye Galilaaya, yabona Simooni olaangwa Peetero, nende Andereya mwaanang'ina nibali ohuteka eng'eni munyaanja nende enjero olwohuba bali abanaabi. Yesu niyaboolaho yababoolera ati, 19“Mwiiche munoonde. Njia ohubahola mube abanaaba abandu.” 20Bosi, esiha syeene esyo baleha awo enjero chaabwe bamuloonda. 21Yesu niyemeedayo ohukeenda, handi yeecha yabona abasyaani bandi babiri abomunda ndala, Yakobbo nende Yowaana abaana ba Sebbedaayo. Bali bali nende saabwe Sebbedaayo nibehaale mulyaato nibongaanga enjero chiabwe, ni Yesu abalaanga bosi. 22Abweene awo, bosi baleha elyaato lyaabwe nende saabwe, baloonda Yesu. 23Yesu yemawo yakenda mu Galilaaya mwoosi nayaala Emboosi Ndai ech'Obwaami bwa Nasae mu mayumba ak'Abayudaaya ak'ohusabiraangamo akalangwanga kati 'Sinagoogi' naonia endwaae choosi alala nende obuchuuni bwa buli embya bwoosi. 24Efuma yae yasasaana yaaswania esyaalo syoosi esya Siiria. Byakera abandu bamuleteraanga abalwae babuli mbya, abali nende obuchuuni obutaali nasilala obwali nibubachuuna, abemisambwa, abendulume, nende abadataala; bano boosi-boosi Yesu yabawonianga. 25Ebidiyiha bya abandu bangi ohutula e Galilaaya, e Dekapooli, e Yerusaalemu, e Buyudaaya nende ohutula mungoongo che engereha w'omwaalo kwa Yorudaani, byoosi byamulondaanga.

will be added

X\