MATAYO 3

1Mundaalo echo, Yowaana Omubatiisi yeecha yachaaka ohuyalira musiparara sye Buyudaaya naboola ati; 2“Mwefunake, olwohuba Obwaami bwo Mukulu buli aambi.” 3Wuno niye yi nabbi Yisaaya yalomalomaho ati; “Ekono lihuumulira musiparara liti, Mutereese engira ya Nasae, mukololose emihoosi chae.” 4Ebifwaalo bya Yowaana byalichingi eby'obwooya bw'engamia nende oluhoba lw'eseero mu sibuno. Ebyohulya byae byalichingi esike nende obuuhi bw'omusiino. 5Abandu beyihaanga yiyalichingi nibatula Yerusaalemu, Buyudaaya nende mu bituundu byohumwaalo kwa Yorudaani. 6Bechanga nibefunaka ebibi byaabwe nababatiisira mu mwaalo kwa Yorudaani. 7Nae Yowaana niyabona Abafalisaayo bangi nende Abasadukaayo bosi nibeyiihe ohwiicha yali mbwe ababatiise, yabateeba ati, “Eng'we abaana b'endemo, wiina obabereese amakesi kano akohweyonia etima lya Nasae eliri aambi ohwiicha?” 8Mani muhoyeere muhole ebiholwa byeekesa biti mumalire ohwefunakira elalira ebibi byeeng'we. 9Handi mutaba nimubaasa busa muti munyala ohunyoola obweyikamo nimuboola muti muli abechuhulu ba Yibbulaimu. Mbaboolera obwadyeeri endi, Nasae anyala ohubukula amakina kano yakaholamo abechuhulu ba Yibbulaimu. 10Kata buti embaachi yimalire ohutekehwa: ohutemera emisaala hu misi bweene, nabuli musaala kwoosi okutachia ohwaama ebyaamo bilai kucha ohutemwa kusukunwe mu muliro. 11“Ese mbabatiisa mu maachi ohweekesa mbwe mu malire ohwefunaka ebibi by'eng'we; nae yiriyo oyo owunoondaho ochia ohubabatiisa nende Mwooyo Mwolerefu alala nende omuliro. Oyo ahirira elalira ese oluyaali, mani sihoyera kata budiidi ohumukiingira ebiraato byae.” 12Ali nende oluderu mu mahono kae. Achia ohusereechera elalira emere yoosi. Achia ohuteera emere ndayi mu syaaki, nae omuhuchi kwoosi achia ohukubuusa, amale akusambe mu muliro kutasima. 13Mu biha byeene ebyo, Yesu yatula e Galilaaya yacha hu mwaalo kwa Yorudaani eyiri Yowaana amubatiise. 14Yowaana yakesaho ohuhaya naboola ati, “Niiwe ohoyere ohumbatiisa nae handi niiwe owiichire yindi?” 15Nae Yesu yamala yaamukaluhamo ati, “Ewe leha bibe bityo busa. Olwohuba nilwo lwefwe huba fwembi hucha ohwoseresa abweene ohudaha hwa Nasae.” 16Yesu niyamala ohubatiiswa ati, yatula mu maachi. Esiha syeene esyo ekulu lyekuha yabona Mwooyo Mwolerefu nafwaana nende eguugu, yeha yamweemaho. 17Handi esiha syeene esyo, ekono lyawuliirihana nilitula Mukulu niliboola liti; “Wuno niye Omwaana omukoosi wange, owusangaasa muno.”

will be added

X\