MATAYO 28

1Bulaanu, oludaalo lwa Sabbaato niluweere, mumaherebeende kahyesa oludaalo lutaangira mu juma, Maria w'e Magadala nende Maria wundi, bacha ohubona esiriindwa. 2Abweene awo, esyaalo syateengereha muno, olwohuba malaika wa Nasae yeha ohutula Mukulu, mani yeecha yaasindikisa ekina, yaalitusa hu mulyaango kw'esiriindwa yaliihalaho. 3Efwaani yae yali koti olumesu, handi engubo chae chali endafu koti amakina k'efula. 4abaliindi nibamubona, batya muno, bateengereha, mani baba koti abafwiire. 5Nae malaika yaboolera abahasi abo ati, “Mutatya daawe; olwohuba manyire endi muli ohukoonya Yesu yibahomerera. 6Haba saali ano; amalire ohusyuuha koti luyaboola. Mwiiche mubone yi yali yeyaliise. 7Mani muche bwaangu muboolere abeeki bae muti, amalire ohusyuuha mu bafu, ngula abatangiriremo ohuchia e Galilaaya; eyo niyo yimucha ohumubonera. Mbao malire ohubaboolera.” 8Mani batula maangu muno hu siriindwa obuti nibubadiirire alala nende esangaalo, beeruha bacha baboolera abeeki bae. 9Nae bone, Yesu yeecha yabukanana nabo mani yaboola ati, “Ehabi chibe nang'we!” Mani basuda yali bamudiira hu makulu, bamala bamwiinamira. 10Nae Yesu yababoolera ati, “Mutatya daawe; muche muboolere abaloondi bange bache e Galilaaya, mani eyo niyo yibacha ohumbonera.” 11Mani abahasi abo nibali basichichaanga, bone, Abasirikaari bandi hu bali baliindire esiriindwa, bacha mu siko, baboolera Abalaamisi bahuluundu buli siindu syoosi esyali syeholehe. 12Nae Abalaamisi bahuluundu abo nibamala ohwebuusa alala nende Abemirisi ba bandu, beecha bafukiirisania ohuberesa Abasirikaari abo eseende nyiingi muno, 13mani nibaboolera bati, “Muboolere abandu muti, ‘Abeki bae beechere esiro beeba omubiri kwae efwe nihukona.’ 14Nae Gafana nawulira bino, efwe hucha ohumwomiisa, mani hubone huti eng'we simukwa mu budinyu bwoosi.” 15Abaliindi abo babukula eseende echo, bahola koti lu bababoola; mani ebyo nibyo bi Bayudaaya basiloonderera nolwaleero. 16Abeki ehumi-na-mulala bacha e Galilaaya hu lugulu lu Yesu yali atekehe ohubukananirayo nabo. 17Mani nibamubona, bakwa aasi bamwiinamira; nae abandi bali basisiiri nende ohukana-kana. 18Nae Yesu yeecha yababoolera ati, “Bamalire ohumberesa obunyala bwoosi Mukulu nende hu syaalo. 19Sakira muche muhole abandu b'ebyaalo byoosi babe abeeki bange; mubabatiise mu liita lya Seefwe, nende ery'Omwaana, nende ery'Omwooyo Mwolerefu. 20Mubeekese ohuloonda amalako koosi kandababeeresa, handi mumanye muti, ndi nang'we endaalo choosi ohwoola hu njakamo y'esyaalo.”

will be added

X\