MATAYO 27

1Nibwahya mumaherebeende, abahuluundu ba Balaamisi boosi, nende Abemeresi babandu beehala bawuliirisania engira y'ohwiita Yesu; 2mani bamuboya bacha bamudiisa Pilaato owali Gafana. 3Nae Yuda omuhobi, niyabona ati bamalire ohuheengera Yesu omusango kw'ohufwa, yefunaka mani yakobosera abahuluundu b'Abalaamisi nende Abemirisi ba bandu, eseende ch'efeesa, ebituundu amahumi kadatu, naboola ati, 4“Holere esibi muhulya olukwe amabaanga kataaliho omusango.” Nabo baboola bati, “Ebyo nibyo siina hw'efwe? Ebyo byao omweene.” 5Mani Yuda nasukuna aasi ebituundu by'efeesa mu nyumba ya Nasae, mani yawaawo yacha yemika. 6Nae abahuluundu b'Abalaamisi, babukula ebituundu by'efeesa, baboola bati, “Sisihoyerwa ohuta eseende chino musibiihiro olwohuba seende ch'amabaanga nicho.” 7Beecha bawuliirisania, mani baachikulamo eloba hu muloongi w'endamu, elyohusihangamo Abateende. 8Sakira eloba elyo balilaanga eloba ly'amabaanga nolwaleero. 9Mani, bi munabbi Yeremiya yaboola byolerera biti, “Mani babukula ebituundu by'efeesa amahumi kadatu, obukusi bu baana Bayisirayiri bandi bamutaaho, 10mani bachehonyera ohukula eloba ly'omuloongi w'endamu koti Nasae luyandagira.” 11Abweene awo, Yesu yeema mu moni wa Gafana; nae Gafana yaamuteeba ati, “Niiwe omutuki w'Abayudaaya?” Yesu yamukobolamo ati, “Omweene niiwe owahaboola otyo.” 12Nae Abalaamisi bahuluundu nende Abemeresi babandu nibali bamwaayirisa, siyabakobolamo esiindu syoosi. 13Mani Pilaato yamuboolera ati, “Ewe haba sowulira koti bahwayirisa mu biindu biingi bino?” 14Nae Yesu siyakobolamo emboosi yoosi kata hu musango mulala; sino syawukia Gafana muno. 15Hu buli sidyaalo sya Paasaka, yali esaambo ya Gafana ohubalehuliraanga omuboye mulala, yi bandu baba nibasabire. 16Mani mu biha ebyo, bali n'omuboye w'esaambo mbi muno olaangwa Bbarabba. 17Mani nibaba nibebuusire, Pilaato yabateeba ati, “Mudaha mbalehuulire wiina mweene? Bbarabba, kose Yesu olaangwa Kristo?” 18Olwohuba yali amanyire ati embaliha yaabwe niyo eyakera bamudiisa Yesu. 19Handi Pilaato niyali yehaale hu sisala sy'ohuheengeraho emisango, omuhasi wae yeecha yaamutumira emboosi ati, “Otaholaho esiindu syoosi hu muundu otaliho obubi oyo, olwohuba mbeere nende obunyaahani bungi nimulootaho musiro sy'olwaleero.” 20Nae Abalaamisi bahuluundu nende Abemeresi ba bandu bawooya esidiyiha sy'abandu basabe Pilaato abalehulire Bbarabba, nae Yesu anyaasibwe. 21Gafana yababoolera ati, “Wiina mweene hu bano bombi yimudaha mbalehuulire?” Mani bakobolamo bati, “Bbarabba.” 22Pilaato yabateeba ati, “Nae Yesu olaangwa Kristo, muhole endye?” Boosi baboola bati, “Leha ahomererwe.” 23Nae Pilaato nabateeba ati, “Aholere sibi siina?” Nae bemeeda ohuwaasira akulu ni baboola bati, “Leha ahomererwe.” 24Mani Pilaato niyabona ati sibimuhoonya ohuchiiririra nende ebiteebo, olwohuba abandu bali bemeeda busa ohusasakala, yabukula amaachi, yesaaba amahono, abandu boosi ni babona naboola ati, “Mbulaho omusango kwoosi hu Makulu k'omuundu wuno; abeene mubone esy'ohuhola.” 25Nae abandu boosi bakobolamo bati, “Leha amabaanga kae kabe hw'efwe nende hu baana beefwe!” 26Mani Pilaato yamala yabalehulira Bbarabba. Nae nibamala ohunaala Yesu ehoba, yabadiisa Yesu bache bahomerere. 27Mani Abasirikari ba Gafana bayira Yesu mu dooho lya Pilaato elilaangibwa 'Praetorium' mani eye lyoosi lyeecha lyamwebodohania. 28Mani bamufwaalula engubo chae, bamufwaasa ekaanju ly'omudoba kwa ranjaayi. 29Mani nibasiinga engata y'amawa nibamufwaasa hu mutwe koti esitweetwe, mani nibamudiisa omukwajo mu muhono kwae muluungi. Mani nibasigama mu moni wae, nibamuhoomolera nibaboola bati “Yindira, ewe omutuki w'Abayudaaya!” 30Mani bamufuchaho amate, handi baabukula ekada bamuhuya hu mutwe. 31Nibamala ohumuhoomolera batyo, beecha bamufwaalulamo ekaanju, bamufwaasa engubo chae cheene, mani bamutusa erwaanyi bache bamuhomerere. 32Nibali nibatula erwaanyi, babukaanana nende omusaacha otula e Sireeni olaangwa Simooni. Mani beecha bamuyiika ohwedwiiha omusalabba kwa Yesu. 33Nae niboola abundu alaangwa ati, Gologoosa (amahulundu kasyo mbwe, Esifwo sy'ebiyaanga), 34baabeeresa Yesu efwiini yibasasiremo ekaha; nae niyayihombaho, yahaya ohuying'wa. 35Nae nibamala ohumuhomerera, bakabana engubo chae nibachubbira eha; 36mani beecha beehala awo ohumuliinda. 37Nae akulu w'omutwe kwae nibataao omusango kumufwambya nikusoma kuti, “Wuno niye Yesu, Omutuki w'Abayudaaya.” 38Abweene awo baba bahomererewo abeebi babiri alala nende Yesu, mulala hu muhono muluungi nae owundi hu muhono mukooda. 39Mani abandu bali nibabitiraangao bayuuya busa emitwe 40nibaboola bati, “Ewe owali onyala ohulikula enyumba ya Nasae handi wayombahira mu ndaalo chidatu, wewonie omweene! Nooli Omwaana wa Nasae, bulaanu yiha otule hu musalabba.” 41Mungeri nasilala eyo niyo yi Balaamisi bahuluundu, nende Abekesa bamalako alala nende Abemeresi babandu, bamuhoomolera, nibaboola bati, 42“Oyo yawonia abandi, nae omweene haba saanyala hweonia. Oyo niye Omutuki w'Abayisirayiri; leha yeehe hu Musalabba mani huhumufukiiriremo. 43Yesika mu Nasae, leha bulaanu Nasae amuwonie naaba namudaha; olwohuba yaboola ati, ‘Nise Omwaana wa Nasae.’ ” 44Handi abeebi baba bahomereerwe alala nae bosi bamuhoomolera mu ngeri nasilala eyo. 45Bulaanu ohutula esaa chisaasaba, esirima syadiira esyaalo syoosi ohwoola esaa chitaanu-na-chine. 46Mani aambi w'esaa chitaanu-na-chine, Yesu yalira nende ekono ly'akulu ati, “Eli, Eli, lema sabach-thani?” Amahulundu keene mbwe, “Nasae wange, Nasae wange, lwasiina wunjwang'ire?” 47Nae abandi hu bandu bali beemere awo nibawulira esyo, baboola bati, “Omuundu wuno nga mbawo ali ohulaanga Elija.” 48Mulala hu bandu abo, yeruha bwaangu yabukula esyaangu, yaasiiniha mu fwiini yahaliha, yaasita hu kada, mani yaamubeeresa ang'we. 49Nae abandi baboola bati, “Muliinde huboneho Elija naneeche yamuwonia.” 50Nae Yesu yalira handi mu kono ly'akulu, mani yakwisa omwooyo. 51Nae bone, engubo yomu nyumba ya Nasae, yataanduhamo akati, ohutula akulu ohwolera elalira aasi; mani esyaalo syeecha syateengereha, enyaanda chaadihana; 52ebiriindwa byosi byekuha, handi emibiri ch'abandu ba Nasae bangi abali bafwa balamuha, 53nae nibatula mu ng'ani Yesu naamalire ohusyuuha mu bafu, bacha mu siko syolerefu, mani babonehera abandu bandi. 54Nae omusirikaari muhunuufu alala nende abo bayali nabo nibaliindire Yesu, nibabona ohutengereha hw'esyaalo, nende ebyo byoosi ebyeholeha, beecha batya muno baboola bati, “Mubwadyeeri bweene, wuno abere Omwaana wa Nasae!” 55Awo wosi waliwo abahasi bangi, nibeemere nibewunjiraanga eyale. Bano nibo abali baloondere hu Yesu ohutula e Galilaaya nibamuhalaabaniraanga; 56mwabo mwalimo Maria otula e Magadala, nende Maria ng'ina Yakobbo nende Yosefu, nende ng'ina baana ba Sebbedaayo. 57Mani obwire nibweera, omusaacha muyiinda otula Arimaseya olaangwa Yosefu yeecha yoola; wuno yesi yali omweeki wa Yesu. 58yacha eyiri Pilaato yaamusaba omubiri kwa Yesu. Mani Pilaato yalagira ati, bamubeerese omubiri kwa Yesu. 59Yosefu yabukula omubiri, yaakuboya mu suuka lafu, 60yamala yaakuta mu ng'ani yae njiaha, yibali babaachire mu lwaanda; mani yaasindikisa okukina kuhoongo yakwikalira hu ng'ani, yamala yawaawo. 61Maria we Magadala, nende Maria wundi, bali baliwo nibehaale aasi nibewunjire esiriindwa. 62Nibuhyere, oludaalo luloonda Olw'ohwetekehera, Abalaamisi bahuluundu nende Abafalisaayo bebuusira eyiri Pilaato, 63mani baboola bati, “Omwaami, efwe hwichulisa koti omubacha oyo yaboola nasisiiri omulamu ati, ‘Oluunyuma lw'endaalo chidatu, njia ohusyuuha handi.’ 64Sakira lagira baliinde esiriindwa bulai ohwoola hu ludaalo lwohudatu, ataali awo, abeeki bae banyala ohuchia bamwiibamo, mani bamala baboolera abandu bati, ‘ Asyuhiire mu bafu,’ mani obubacha busemberehayo bucha ohuba obubi muno ohuhiraho obwataangira.” 65Pilaato yababoolera ati, “Eng'we muli nende Abasirikaari baliinde; muche mubone muti esiriindwa basiriinda bulai muno koti lu munyala.” 66Mani bacha baaomera bulai ekina lyali hu siriindwa, bataao omusirikaari, babona bati buli siindu siri bulai bweene.

will be added

X\