MATAYO 26

1Olwoola, Yesu niyamala ohulomaloma ebiindu bino byoosi, yabolera abeeki bae ati, 2“Mumanyire muti endaalo chibiri nichiwa, esidyaalo sya Paasaka sichia ohwoola, mani Omwaana W'omuundu achia ohudiiswa mu mahono k'abandu bacha ohumuhomerera hu musalabba.” 3Mani Abalaamisi bahuluundu nende abemirisi ba bandu beecha bahung'anira mu lwaanyi lwa Omulaamisi muhuluundu olaangwa Kayaafa, 4mani bahola olukwe lwohudiira Yesu bamwiite mu ngiso. 5Nae beecha baboola bati, “Hutahola sino hu ludaalo luhuluundu, olwohuba abandu banyala ohukwaamo eesisi” 6Yesu niyali e Bbetani mu nyumba ya Simooni, owali yalwaalaho obulwaae bwa makere, 7omuhasi wundi yeecha eyiri Yesu naali nende echupa ya mafuta kesing'aari handi ak'ebbeyi y'akulu, mani yakamuchuha hu mutwe. Yesu yali niyehaale naalya. 8Nae abeeki bae nibabona batyo, haba sibawulira bulai, baboola bati, “Ohunyaasa amafuta mutyo hwaasi? 9Olwohuba amafuta kano bahakakusiremo ebbeyi yaakulu muno, mani eseende chitulamo baachikabira abamanani.” 10Nae Yesu koti luyali namanyire bino yababoolera ati, “Omuhasi wuno mumufwambya siina? Olwohuba yaholeere esiindu silayi muno. 11Buli siha muli nende abamanani, nae simuchia ohuba naange ebiha byoosi. 12Olwohuba omuhasi wuno yanjuhireho amafuta kano natekeha omubiri kwaange ohuchia ohusiihwa. 13Mbaboolera obwadyeeri endi, buli abundu woosi, mu syaalo syoosi, yibaneekesenge Emboosi Endayi yino, esiindu siyaholeere sino, bacha ohusilomalomaangaho ohumwichulisa.” 14Olwoola, mulala hu beeki ehumi-na-babiri, olaangwa Yuda Yisikarioti yacha eyiri Abalaamisi bahuluundu, 15mani yabateeba ati, “Munamberesa siina ni mbadiisa Yesu?” Nae bamubalira eseende chefeesa ebituundu amahumi kadatu bamubeeresa. 16Ohutula ebiha ebyo, Yuda yachaaka ohukiiya engira yaanyala ohuliira mu Yesu olukwe. 17Bulaanu, hu ludaalo lutaangira lw'esidyaalo sy'emigaati chobusye obutaali bubbaahe, abeeki ba Yesu beecha yali bamuteeba bati, “Odaha huhutekehere ena owohuliira esidyaalo sya Paasaka?” 18Nae yababoolera ati, “Muche mu siko, ow'omuundu wundi mu muboolere muti, ‘Omweekesa aboola ati, ebiha byaange mbawo byoolere; njia ohuliira esidyaalo sya Paasaka alala nende abeeki bange mu nyumba yao.’ ” 19Mani abeeki bahola koti lu Yesu yababoolera, bacha batekeha esidyaalo sya Paasaka. 20Nibwoola engoloobe, Yesu yehala alala nende abeeki ehumi-na-babiri, bachaaka ohulya. 21Mani nibali balya, Yesu yaboola ati, “Mbaboolera obwadyeeri endi mulala hw'eng'we achia ohudyaamo olukwe.” 22Abeki bawuka muno, bachaaka ohumuteeba syamulala-mulala bati, “Omwaami, oli ohuboola ese, kose?” 23Yesu yakobolamo ati, “Oyo otoonga naange mu saani ndala niye ochia ohundyaamo olukwe. 24Mani Omwaana w'Omuundu achia ohufwa koti lu byandiiko byolerefu bimuboolaho, nae chakaanire oyo ochia ohulya mu mwaana w'Omuundu olukwe! Byahahirire omuundu oyo obuteebulwa!” 25Abweene awo Yuda omuhobi yalomalomera akulu ati, “Omweekesa, oli ohuboola ese, kose?” Nae Yesu yamuboolera ati, “Mbao omweene oboolere.” 26Bulaanu nibali basiilya, Yesu yabukula omugaati, yaakusabira ehabi, yaakumekula-mekula mani yaakuberesa abeeki bae naboola ati, “Mubukule mulye, kuno nikwo omubiri kwaange.” 27Handi yabukula esikoombe, mani niyamala ohwebasa, yasiberesa abeeki bae naboola ati, “Mubukule, mung'we husino mweesi; 28olwohuba kano niko amabaanga kange aka elakano akacha ohwidiha hulwa bandu bangi ohuleherwamo ebibi. 29Mbaboolera endi siinjia hung'wa handi hu syaamo sy'efwiini ohwoola hu ludaalo lundahang'weereho efwiini njiaha alala nang'we mu Obwaami bwa Lata.” 30Mani nibamala ohweemba olweembo lw'ohufumia Nasae, batula bacha hu lugulu lwa Olibeti. 31Abweene awo, Yesu yababoolera ati, “Mweesi mucha ohwiruha mundehe syeng'ene esiro sya leero, olwohuba syandiikwa siti, ‘Njia ohuhubba omwaayi, mani amakoondi k'omusidwooli kasalaane.’ 32Nae nimalire ohusyuuha, njia ohubataangiriramo ohuchia e Galilaaya.” 33Peetero yalomalomera alafu namuboolera ati, “Kata nende abandi boosi bahulehe, ese haba siinjia huhuleha daawe.” 34Yesu yamuboolera ati, “Huboolera obwadyeeri endi, esiro sy'olwaleero sino, engoho niyisisiiri ohuholyooha, onaba wundekaanire amahabi kadatu.” 35Peetero nae yamuboolera ati, “Kata nihuli ohufwa naawe, haba siinjia ohuhwekaana.” Mani nilwo nasilala lu beeki bandi bosi baboola. 36Mani Yesu yamala yacha nende abeeki bae mu sifwo silaangwa siti, Getesemaane, yaboolera abeeki bae ati, “Eng'we mudong'e ano, njieho aala ndekongooye.” 37Niyamala atyo, yabukula Peetero nende abaana ba Sebbedaayo babiri yacha nabo. Engisa yeecha yamudiira muno, yaba nende ohwelalihira hungi. 38Mani yababoolera ati, “Engisa enyiingi yindi hu mwooyo, kata yinyala ohunjita-bwiita. Eng'we mudong'e ano mani muliinde ni naange.” 39Mani niyasudaho budiidi mu moni ati, yenama, yageng'a aasi obweeni yekongooya naboola ati, “Lata, nisinyaliha, esikoombe syohusaandisibwa sino sihaye ohunjolaho; nae sitaba koti lu ese ndaha, ohutusaho sibe koti lu ewe odaha.” 40Nae yakaluha eyiri abeeki bae yabanyoola nibakona mani yaboolera Peetero ati, “Simunyala ohumokaho naange kata esaa ndala yong'ene? 41Muliinde, mani mwekongooye hu muhaye ohukwa muhuhemwa. Omwooyo kweenya nae omubiri nikwo omukata.” 42Handi ehabi lyohubiri yasingira yacha ohwekongooya naboola ati, “Lata, esikoombe sino, nisitachia ohundulaho nitasing'weere, leha syodaha siholebwe.” 43Yakobola handi yanyoola nibakona olwohuba emoni chaabwe chali chisidoye, chichuule endoolo. 44Mani yeecha yabaleha awo, handi yacha ohwekongooya ehabi lyohudatu naboola emboosi nasilala echo. 45Yakobola eyiri abeeki bae mani yaboola ati, “Eng'we musikonere nimwewuluhira busa? Bone! Ebiha mbano byahoola eby'ohuliiramo Omwaana W'omuundu olukwe, bamudiise mu mahono kaababi. 46Musiingire huweeo; omuhobi nguno amalire ohwoola.” 47Yali asilomalomaanga atyo, Yuda, mulala hu beeki ehumi-na-babiri niyoola. Yaba ali nende esidiyiha sy'abandu nibakiingire engaanga nende endabuhi nibatula eyiri Abalaamisi bahuluundu nende abemirisi b'Abayudaaya. 48Bulaanu omuhobi oyo yali amalire ohuwuliirisania nende esidiyiha esyo ohubabeeresa ahalolero mbwe, “Oyo yindaakwe musirifu niye yimwenya, mumukweho mumudire.” 49Yuda niyoola yachooma Yesu naboola ati, “Omweekesa, emireembe kibe naawe!” Mani yamukwa musirifu. 50Yesu yamukobolamo ati, “Wasyaange, siina esihuleteere?” Mani beecha bakwa hu Yesu bamudiira. 51Nae bone, mulala hu abo abali nende Yesu, yachoolayo olugaanga yaatemaho ohutwi hw'omuhalabani w'Omulaamisi muhuluundu. 52Nae Yesu yaamuboolera ati, “Kalusa olugaanga lwao musilaalo syalwo, olwohuba abo boosi abehonyera olugaanga, balifwa olugaanga. 53Mubaasa muti sinyala ohwekongooya Laata yamberesa obuhoonyi, ni abweene awo atuma eye lya bamalaika emikaanda kihira ehumi-na-kibiri? 54Nae nibyahabeere bityo, ebyandiiko byolerefu ebiboola biti, bino bihoyeere ohuholebwa, byaholereere bitye?” 55Esiha esyo, Yesu yalomaloma nende esidiyiha esyo naboola ati, “Mwiichire nende engaanga alala nende endabuhi ohundiira, koti abechera omwiibi? Buli ludaalo mbechaanga ninjekesa mu nyumba ya Nasae nae husiina simundiraanga. 56Nae bino byoosi biholebwe hu bi banabbi bandiika byolerere abweene.” Mani abeeki boosi beecha beeruha baleha Yesu yeng'ene. 57Abo abali badiirire Yesu beecha bamuyira ewa Kayaafa omulaamisi muhuluundu, yi beekesa bamalako nende abemirisi babandu bali bebusiire. 58Nae Peetero yamulondaho enyuma ohwoola mulwaanyi lw'omulaamisi muhuluundu oyo. Yengira mulwaanyi yehala aasi nende abaliindi nadaha ohubona koti lu buli siindu sinaabe. 59Bulaanu Omulaamisi Muhuluundu nende ab'esiina boosi bakesaho ohukonyeresa obuloli bw'obubacha obudiira hu Yesu obunyala ohukera bamwiita; 60nae haba sibanyoolaho esiindu syoosi. Kata katyo mbwe abandu bangi bakesaho ohulomaloma ebyobubacha hu Yesu. Lunyuma abandu babiri bamala beema, 61baboola bati, “Omuundu wuno yaboola ati, ‘Nyala ohulikula enyumba ya Nasae yino, handi ndayombahira mu ndaalo chidatu.’ ” 62Mani Omuhulundu w'Abalaamisi, yasingira yateeba Yesu ati, “Obulaho nende esyohukobolamo kata silala? Siina syeene si bano bahufwaambya?” 63Yesu nae yabuleera-buwuleera. Mani Omuhulundu w'Abalaamisi, yakobolamo naboola ati, “Mu liita lya Nasae Mulamu, ndaha wechube: Tuboolere nooli Kristo Omwaana wa Nasae.” 64Yesu nae Yamuboolera ati, “Niiwe oboolere otyo. Nae mbaboolera endi, ohutula olwaleero, mucha ohubona Omwaana w'Omuundu niyehaale hu muhono muluungi kwoyo oli n'obunyala bwoosi, handi niyeechera hu maleesi ko Mukulu.” 65Mani Omuhulundu w'Abalaamisi, yataandula engubo chae naboola ati, “Ngandi enomanoma yino y'ohufwoola Nasae. Husiina handi hukoonya obuloli bundi? Mbao abeene mwewuliirire emboosi chae embi echo. 66Nae eng'we muheengao mutye?” Bakobolamo bati, “Ahoyera ohufwa.” 67Mani abweene awo bachaaka ohumufuuchaho amate mu moni alala nende ohumuhuya; nae abandi bamupaama nibaboola bati, 68“Ewe Kristo, tutumbulire, Wiina mweene ohuhuyire?” 69Esiha esyo, Peetero yali yehaale erwaanyi mu lwaanyi, nae omuhaana mulala hu bahalaabani b'Omulaamisi Muhuluundu yeecha yali yamuboolera ati, “Ewe wesi obeere nende Yesu Omugalilaaya.” 70Nae Peetero yekaana muno mu moni wa bandu boosi ati, “Ese ngoterwe byooli ohuboola ebyo.” 71Niyamala yasingira yaachia musiruwa. Omuhaana wundi yamubona awo, yaboolera abali beemere awo ati “Omusaacha wuno yesi abere nende Yesu Omunasareeti.” 72Peetero handi yekaana niyechuba ati, “Omuundu oyo, ese haba simumanyire.” 73Ebiha bidiidi nibyabitao, abali nibeemere awo, beecha eyiri Peetero bamuboolera bati, “Mubwadyeeri bweene, ewe oli mulala hu bandu bae, olwohuba engeri yolomalomeramo yihubuula.” 74Handi Peetero yachaaka ohwekaana niyechuba ati, “Omusaacha oyo ese mukoterwe.” Abweene awo, edaaywa niyiholyooha. 75Mani Peetero yechulisa bi Yesu yaboola ati, “Edaaywa niyisisiiri ohuholyooha, onaabe wundekaanire amahabi kadatu.” Mani yaatula erwaanyi yaalira muno.

will be added

X\