MATAYO 25

1“Sakira Obwaami bwo Mukulu bulifwaananisibwa nende abahaana ehumi, abakiinga amataara kaabwe, bacha ohubukaanira omweeya musaacha. 2Bataanu, baba abasiru, nae bataanu baba abakesi. 3Abahaana bataanu basiru bakiinga amataara kaabwe, nae sibakiinga amafuta daawe. 4Nae abahaana bataanu bakesi, bakiinga echupa cha amafuta alala nende amataara kaabwe. 5Nae, koti lu mweya yahiinda ohwoola, boosi beecha bakuunuha, endoolo chamala chabayira. 6Mani musiro akati, esihu syechiira nibaboola bati, ‘Bone, omweeya nguno yolere! Mutule mumubukanire!’ 7Abweene awo, abahaana abo boosi basiingira mani bawambia amataara kaabwe. 8Nae abahaana basiru beecha baboolera abakesi bati, ‘Eng'we mutubeeho hu mafuta keeng'we, mbano amatara keefwe kadaha ohusiima.’ 9Nae abahaana bakesi bakobolamo bati, ‘Wichuhira amafuta kahuli nako kahaya ohutumala, efwe naang'we. Silayi muche eyiri abakusa, abeene mwekulire.’ 10Nae nibali bachiire ohukula amafuta, omweeya musaacha yeecha yoola, mani abali nibamalire ohwetekeha, beengira nae musidyaalo sy'obweeya; bamala bekalawo omulyaango. 11Nae lunyuma abahaana bandi bala beecha bakobola mani baboola bati, ‘Omwaami twiikulireo.’ 12Nae yakobolamo ati, ‘Mbaboolera obwadyeeri endi, haba simbamanyire.’ 13Sakira eng'we mwetekehe, olwohuba simumanyire oludaalo kata nende ebiha. 14“Obwaami bwo Mukulu buchia ohufwaananisibwa nende omwenengo wundi owali achia olukeendo eyale, mani yalaanga abahalaabani bae, yabalehera obuyiinda bwae babuliinde; 15yabeeresa omuundu mulala etalanta chitaanu, owundi etalanta chibiri, nae handi omuundu wundi etalanta ndala ohweema hu maani ka buli muundu. Nae omwenengo oyo naamala achia hulukeendo lwae. 16Omuundu yibaba etalanta chitaanu, yacha bwaangu yachurusiramo, mani yeecha yanyoola etalanta chitaanu chiindi. 17Omuundu yibaberesa etalanta chibiri, yesi yeecha yafuna etalanta chibiri chiindi, 18nae omuundu yibaberesa etalanta ndala yacha yayaba eliina muloba yaasiihamo obuyiinda bw'omwenengo wae. 19Mani lunyuma, ebiha bileeyi nibibitireo, omwenengo w'abahosi abo yakobola, yachaaka ohubaliirira emyaandu chae chiyali nabaleheere. 20Mani omuundu yibaberesa etalanta chitaanu yeecha yatusayo etalanta chitaanu chiindi naboola ati, ‘Omwaami, wamberesa etalanta chitaanu, mbano ndanyola chitaanu chiindi.’ 21Omweenengo wae yakobolamo naboola ati, ‘Webale muno, omuhalaabani mulai handi omwesikwa; weekese obwesikwa bwao mu biindu bidiidi, njia ohuhubeeresa ebiindi bihira hoo; yingira mu sangaalo ly'Omwaami wao.’ 22Nae omuundu yibaberesa etalanta chibiri naboola ati, ‘Omwaami, wamberesa etalanta chibiri, mbano funire chibiri chiindi.’ 23Omweenengo wae yamukobolamo naboola ati, ‘Webale muno, omuhalaabani mulai handi omwesikwa; weekese obwesikwa mu biindu bidiidi, njia ohuhubeeresa ebiindi bihira hoo; yingira, mu sangaalo ly'Omwaami wao.’ 24Nae omuundu yibaberesa etalanta ndala yesi naboola ati, ‘Omwaami, manyire endi oli omuundu mwomeranu. Okesa yotataakire esiindu syoosi, handi wabuusa yotabakaale. 25Sakira obuti bwandiira ndaacha ndaabiiha etalanta yao muloba. Mani bukula ebyao, mbano hukalusiire.’ 26Nae omwenengo wae yamukobolamo ati, ‘Ewe omuhalaabani mubi handi omukata, hane wamanya oti ngesa yitataakire, handi mbuusa yitabakaale? 27Lwasiina siwabukula eseende change wachibiiha yibabiihanga eseende, mani nimba ningoboole, sindahaduhaane ebiindu byaange nibyemeedereho? 28Mani nibiri bityo, mumutuseho etalanta eyo, muberese oyo oli nende etalanta ehumi. 29Olwohuba omuundu yeesi oli nabyo, achia ohumedwaho ebiindi, mani abe nende ebihiraho byadaha. Nae omuundu otaali nende esiindu syoosi-syoosi, kata syali nasyo bacha ohumutusaho.' 30Mani omuhalaabani owuma obuhoonyi oyo, mumusukune erwaanyi mu sirima siingi; yibacha ohulirira nibeesia ameeno.’ 31“Mani Omwaana W'omuundu nalikobola mu luyaali lwae, alala nende bamalaika bae boosi, achia ohwihala hu sisaala syae sy'oluyaali sy'obutuki. 32Enjia choosi chaheeche chebuusira mu moni wae, mani achia ohukabulamo abandu amahabi kabiri, koti lu omwaayi lwakabula amakoondi nende embusi. 33Achia ohuta amakoondi hu muhono kwae muluungi, nae embusi hu muhono mukooda. 34Mani omutuki oyo achia ohuboolera abo abali hu muhono kwae muluungi ati, ‘Eng'we ba Lata yabeeresa ehabi, mwiche mubukaane obwaami bubabatekehera ohutula ohuloongwa hw'esyaalo; 35olwohuba ndali numwa enjala, mwaamba eby'ohulya; ndali numwa obuluwo, mwaamba esy'ohung'wa; ndali omukeni mweng'we, mwambukanira; 36ndali mbula esy'ohwefwaala, mwafwaasa; ndali omulwaae, mweecha mwambona; ndali mu mboye, mweecha mwaangeniya.’ 37Nae abolerefu abo bamukobolamo bati, ‘Omwaami, liina luhwahubona enjala niyihuluma, hwahuliisa, kose nolumwa obuluwo, hwahubeeresa esyohung'wa? 38Handi liina luhwahubona nolwaala, kose nowuma esyohwefwaala hwahufwaasa? 39Handi liina luhwahubona nolwaala, kose nooli mu mboye hwahukeniya?’ 40Nae Omutuki oyo achia ohubakobolamo ati, ‘Mbaboolera obwadyeeri endi, lumwahola esyo eyiri oyo ohiramo obudiidi hu bandu bange, mwaholera ese.’ 41Mani achia ohuboolera abo abali hu muhono kwae mukooda ati, ‘Mbweere eyi, eng'we abalaamwa! Mwingire mu muliro kutasima okwatekeherwa Sitaani nende bamalaika bae; 42olwohuba enjala yali yinuma, mwahaya ohumberesa esy'ohulya, obuluwo bwali buunuma, mwahaya ohumberesa esy'ohung'wa, 43ndali omukeni, mwahaya ohunjakaanira; ndali mbula esy'ohwefwaala, mwahaya ohufwaasa; ndali omulwaae, handi ndali mu mboye, mwahaya ohungeniya.’ 44Mani abo bosi bacha ohukobolamo bati, ‘Omwaami, liina luhwahubona enjala niyihuluma, kose obuluwo nibuhuluma, kose nooli omukeni, kose nowuma esy'ohwefwaala kose nolwaala kose nooli mu mboye, mani hwahaya ohuhuhoonya?’ 45Nae achia ohubakobolamo ati, ‘Mbaboolera obwadyeeri endi, koti lumutahola esyo eyiri mulala ohiramo obudiidi hu bandu bange bano, haba simwasiholera.’ 46Mani bacha ohutula awo, beengire musinyaaso esitaakama, nae aboolerefu bahache mu Bulamu butaakama.”

will be added

X\