MATAYO 23

1Olwoola, Yesu yaboolera esidiyiha sy'abandu, alala nende abeeki bae ati, 2“Abeekesa b'amalako nende Abafalisaayo, nibo abali mu sifwo sya Musa sy'ohweekesa amalako, 3sakira muhoyeere ohuhola alala nende ohuwulira byoosi-byoosi bi bababoolera, nae mutaholaanga koti lu bahola, olwohuba sibahola bibeekesa. 4Baboya emikuku misito kitanyaliha bakidwiiha hu mabeka k'abandu bandi, nae abeene sibakesaho kata ohugeeng'a olwala lw'omuhono kwaabwe hu mukuku musito okwo ohubahoonya. 5Buli siindu sibahola, bachiiririraanga mbwe abandu bababone. Mani muboneho koti lubabambaliya emisiingiri ch'ebyandiiko byolerefu, bacheboya mu bweeni, nende hu maambala; handi bahola amakemo kamaganduula kaabwe kaba amaleeyi, handi amatakalafu. 6Badaha muno obwihalo bw'oluyaali nibali hu sidyaalo, kata mu Sinagoogi; 7handi badaha ohubereswa oluyaali luhoongo mu siito, nende abandu ohubafumia bati, Abekesa! Abekesa! 8Nae eng'we simuhoyeerwe ohulaangwa muti, ‘Omweekesa,’ olwohuba muli nende omweekesa mulala yeng'ene, niye Kristo, nae eng'we mweesi muli abebulaane. 9Handi mu talangaanga omuundu yeesi hu syaalo huno muti, ‘Lata’ olwohuba muli nende Seeng'we mulala yeng'ene, oli Mukulu. 10Handi batabalangaanga bati, ‘Abaami’ olwohuba muli nende Omwaami mulala yeng'ene, niye Kristo. 11Omuundu ohiramo oluyaali mw'eng'we, ahoyere ohuba omuhalabani w'eng'we. 12Omuundu yeesi, oweniinia omweene, achia ohwiiswa aasi, nae omuundu yeesi oweyisa aasi, achia ohuniiniswa. 13“Chibakaanire eng'we, Abafalisaayo alala nende Abandiiki b'Amalako, abebachirisi eng'we! Olwohuba mwikalira abandu omulyaango kucha mu Bwaami bwo Mukulu, nae eng'we beene simwingiramo daawe, handi haba simufukiirira abo abadaha ohwingiramo beengira. 14Chibanyolere eng'we, Abeekesa b'Amalako nende Abafalisaayo, abebachirisi eng'we! Mung'uula abahasi bafwiire enyumba chaabwe, ni mumala mwekaadirisa nende ohulaama hu leeyi muno! Sakira muchia ohufuna esinyaaso shiramo obuhoongo. 15Chibakaanire eng'we, Abekesa b'Amalako nende Abafalisaayo, abebachirisi eng'we! Mukendaana hu syaalo, ni mwambuhana enyaanja, ohwoola lu muchuusa kata omuundu mulala busa, yengira mu diini yeng'we; mani ni mwahamala ohumuchuusa, mukera omuundu oyo yehola omubi w'ohuchia mu muliro kutasima, amahabi kabiri ohuhiraho eng'we beene! 16“Chibakaanire eng'we, abemeresi baofu! Mweekesa muti, ‘Omuundu niyechubira enyumba ya Nasae, ohwechuba ohwo sihuhola siindu syoosi, nae niyechubira esaabbu y'omunyuumba ya Nasae, ohwechuba ohwo humudiiraho.’ 17Abasiru batabona eng'we! Siina esihira esiindi oluyaali, esaabbu, kose enyumba ya Nasae, eyikera esaabbu eyo yaba enjolerefu? 18Handi mweekesa muti, ‘Omuundu yeesi niyechubira alutaari, ohwechuba ohwo sihuhola siindu syoosi; nae niyechubira ebiyaanwa biri hu alutaari, ohwechuba ohwo humudiiraho.’ 19Eng'we nga mwaofulira elalira! Siina esihira esiindi oluyaali, esiyaanwa kose alutaari, eyikera esiyaanwa esyo syaaba esyolerefu? 20Sakira omuundu niyechubira alutaari, aaba yechubiire alutaari nende buli siindu syoosi esiyiriho; 21handi omuundu niyechubira enyumba ya Nasae, aba yechubiire enyumba ya Nasae, nende Nasae yesi oyirimo; 22handi mani omuundu wechubira ekulu, oyo aba yechubiire esisaala sy'obutuki sya Nasae nende Nasae mweene osihalaho. 23“Nae chibakaanire eng'we, Abekesa b'Amalako nende Abafalisaayo; eng'we abebachirisi! Olwohuba mubeeresa Nasae silala sy'ehumi esy'ebiindu bidiidi-diidi koti ebitunguru, ebisaari alala nende ebiindu biindi biwunya esiing'aari, nae simudeebayo hu biindu bihoongo bi Malako keekesa koti, ohuba nende obwadyeeri, esisa, nende efukiirira; muhoyeere ohwoseresa ebiindu bino ataali ohulekeresa ebiindi ebyo. 24Eng'we abemirisi batabona, mu diinya amaachi muhaye ohung'wa obuduhulu bwoosi, nae eno muli koti abandu bamira obukala ebiindu bihoongo! 25“Chibakaanire eng'we, Abekesa b'Amalako nende Abafalisaayo; abebachirisi eng'we! Eng'we aboosa hu Mukulu w'ebikoombe nende ow'esaani, nae mu kati wabyo, mwechula eby'obwiibi nende okuliira. 26Abafalisaayo batabona eng'we! Mutaangire mberi mwoose mukati w'esikoombe nende ow'esaani, hu bulaanu erwaanyi yosi yimale yibe endafu. 27“Chibakaanire eng'we, Abekesa b'Amalako nende Abafalisaayo; abebachirisi eng'we! Mbao mufwaana nende ebiriindwa ebibahirwe eraangi ya rachaari, ebiboneha bulai bweene hu Mukulu, nae mu kati mwichulemo amakumba ak'abafwa, nende engakaayi chaahwo. 28Nasilala, mwesi mucha ohufwaana abolerefu hu Mukulu, nae mu myooyo cheeng'we bweene, mwichulemo obwebachirisi nende obubi. 29“Chibakaanire eng'we, Abekesa b'Amalako nende Abafalisaayo; abebachirisi eng'we! Olwohuba neng'we abombaha ebiriindwa bya banabbi, handi mutereesa bilai byeene ebiriindwa by'abolerefu, 30nimuboola muti, ‘Huba nihwaliwo mu ndaalo cha bakuuka beefwe, haba sihwahabeere silala nabo muhwiidisa amabaanga k'abanabbi.’ 31Mbao hane eng'we beene mwetumbulaanga muti muli abechuhulu baabo abeeta abanabbi. 32Sakira bulaanu eng'we muchiiririre busa nende ohuhola bi bakuuka beeng'we bi bachaakisa hale. 33Eng'we enjuha, handi abaana be ndemo! Munaone mutye ohuheengerwa omusango okw'ohuchia mu muliro kutasima? 34Sakira njia ohubatumira abanabbi, nende abandu bakesi muno, nende abekesa b'amalako, abandi hwaabo mucha ohubeeta nimubahomerera hu musalabba, handi abandi mucha ohubanaala ehoba mu Sinagoogi cheeng'we, nimubayiima ohubasaandia ohutula mu siko silala ohwoola mu siindi. 35Awo niwo mani, amabaanga k'abolerefu boosi akediswa hu syaalo, kahabeemeho ohutulira elalira hu mabaanga ka Abbeli ohwoola hu mabaanga ka Sakariya omwaana wa Bbarakia, yimweteera akati-kaati w'esifwo syolerefu nende alutaari. 36Mbaboolera obwadyeeri endi, esinyaaso sino syoosi sichia ohwiicha hu luse luno! 37“Aaa bae! Eng'we aba Yerusaalemu, abeeta abanabbi, handi abahuya amakina abandu babatumiirwe! Ndahakesaho amahabi maangi muno ohubabuusa alala mbabwiihe koti lu ngoho yibwiha obumwiinyu bwayo mu mbaya chayo, nae mwahaya ohufukiirira. 38Boneho enyumba ya Nasae eyo koti luyicha ohwebwaabwa, yidong'e koti ekuunda! 39Mani mbaboolera endi, haba simuchia ohumbonaho handi, ohwoola lu mwahaboole muti, ‘Akiniswe oyo owiicha mu liita ly' Omwaami.’ ”

will be added

X\