MATAYO 22

1Yesu handi yalomaloma nabo mu ngaado naboola ati, 2“Obwaami bwo Mukulu bufwaanana nende omutuki watekehera omwaana wae musyaani esidyaalo sy'obweeya. 3Yatuma abahalabani bae bache baboolere abakeni balaange beeche hu sidyaalo sy'obweeya, nae bahaya ohwiicha. 4Handi yeecha yatuma abahalabani bandi naboola ati, ‘Muboolere abakeni balaange abo muti, Mbao malire ohutekeha buli siindu syoosi esidahibwa hu sidyaalo. Njitire elawu change alala nende emoosi nginu, mwiche hu sidyaalo sy'obweeya.’ 5Nae, abakeni balaange abo sibadeebayo haba, buli otula yechiira busa mu mirimo chae; mulala yacha mu ndalo yae, owundi yacha mu huchurusa, 6nae abadong'ereyo nabo bakwa hu bahalabani bae, baabatoocha, bamala baabeeta. 7Omutuki oyo yanyoolera muno; mani yatuma abasirikari bae ohuchia ohwiita abatemo abo, alala nende ohusaamba esiko syaabwe. 8Mani yaboolera abahalabani bae, ati, ‘Mbao malire ohutekeha esidyaalo sy'obweeya, nae koti abakeni balaangwa hu sidyaalo lubeekese bati sibahoyera ohusibaaho, 9mani muche mu masang'angira, mulaange abandu boosi bamubonayo, beeche hu sidyaalo sy'obweeya.’ 10Mani abahalabani abo bacha hu ngira, babuusa abandu boosi babanyolayo, ababi nende abalayi nasilala; mani esibaanja syamala syechula abakeni ddu. 11“Nae omutuki niyengira mu sibaanja ohubona abakeni, yabona omuundu wundi otefwaalire engubo cho hu sidyaalo. 12Mani yaamuteeba ati, ‘Wasyaange, wingire otye muno notaali nende engubo cho hu sidyaalo sy'obweeya?’ Nae omuundu oyo yateng'eng'ala, yabulera busa. 13Omutuki oyo yemawo yaboolera abahalabani bae ati, ‘Mumuboye amahono nende amakulu, mani mumusukune erwaanyi mu sirima. Eyo niyo yanalirira niyeesia ameeno.’ 14Yesu yemawo yaamaliirisa ati, 'Abalaangwa bangi, nae abadolwamo badiidi.'” 15Olwoola, Abafalisaayo bacha behoba ohuteka Yesu bamudiire munomanoma yae. 16Mani batuma abeeki baabwe alala nende abaloondi ba Herode bandi bache eyiri Yesu, nibaboola bati, “Omweekesa, humanyire huti oli omuundu w'obwadyeeri. Wekesaanga engira ya Nasae mu bwadyeeri bweene, notadeeba hu bibaandu babaasa, olwohuba sodebaanga oluyaali lw'abandu daawe. 17Bulaanu tuboolere ebibaaso byao? Siba esilai mu malako keefwe, ohutooya omusolo kwa Kaisaali, kose haba?” 18Yesu nae yali amanyire hale esichiririrwa syaabwe sibi esyo, mani yababoolera ati, “Abebachirisi eng'we, lwasiina mu ndeka omuteego? 19Mani munjekeseho ebbeesa li mutoyeraanga omusolo.” Bamuleetera ebbeesa ly'emwaamwa, 20mani yabateeba ati, “Huno, huliho esifwaanani sya naanu, nende eliita lya naanu?” 21Bamukobolamo bati, “Bya Kaisaali.” Mani Yesu yababoolera ati, “Mukalusire Kaisaali, ebya Kaisaali, nae Nasae, ebya Nasae.” 22Nae nibawulira batyo, bawuka muno, bamuleha mani bawaao. 23Ludaalo lweene olwo, Abasadukaayo batafukiirira mu husyuha hw'abafwa, beecha eyiri Yesu, 24bamuteeba esiteebo nibaboola bati, “Omweekesa, Musa yaboola ati, ‘Omuundu naafwa, nataalehereho omwaana, mwaanang'ina akerama omuhasi mufwiire oyo, yamala yebulira mwaanang'ina wafwa, abaana.’ 25Olwoola, yaliwo abasyaani bataanu-na-babiri ab'enyumba ndala. Omuhulundu waabwe, yeecha yadeehya omuhasi wae mani yafwa natebuuleho nae omwaana. Koti luyali nataalehereho omwaana, yalehera mwaanang'ina omuhasi wae oyo. 26Sino syosi syeholeha handi hu mwaanang'ina wohubiri, handi hu wohudatu, ohwolera elalira hu wo hutaanu-na-habiri. 27Lunyuma, omuhasi oyo yesi yeecha yafwa. 28Bulaanu, hu ludaalo lusembayo lu bafwa balisyuhiraho, omuhasi oyo achia ohuba omuhasi naanu? olwohuba boosi bali bamudehyaho?” 29Nae Yesu yabakobolamo ati, “Awo mudoondobaane muno! Olwohuba mukoterwe kata ebyandiiko byolerefu, alala nende amaani ka Nasae. 30Olwohuba mu husyuha hw'abafu, muwumamo ohudeehya kata ohudeeha, nae abandu bacha ohuba koti bamalaika Mukulu. 31Nae, ebidiira hu husyuha mu bafu, eng'we musisiiri ohusomaho bi Nasae yababoola naalomaloma ati, 32‘Neese Nasae wa Yibbulaimu, handi Nasae wa Yisaka handi Nasae wa Yakobbo’? Amahulundu keene mbwe, siindi Nasae wa abafu, nae ndi Nasae wa abalamu.” 33Nae esidiyiha sy'abandu nisyawulira sityo, syawuka muno enjekesa yae. 34Nae Abafalisaayo nibawulira bati Yesu amalire ohuteng'eng'asa Abasadukaayo, bebuusa alala, 35mani mulala hu Bafalisaayo owali omweekesa w'amalako yachooma Yesu nende esiteebo sy'esiteki ati, 36“Omweekesa, lako siina elihira amalako kandi koosi obuhuluundu?” 37Nae Yesu yakobolamo ati, “Dahaanga Nasae Omwaami wao nende omwooyo kwao kwoosi, nende obulamu bwao bwoosi, nende amakesi kao koosi. 38Lino nilyo elako ly'amberi handi elihira akandi koosi obuhuluundu. 39Handi ely'ohubiri elifwaanana nalyo, nilyo, dahaanga owaasyo, koti luwedaha omweene. 40Amalako ka Musa koosi, nende enjekesa y'abanabbi yoosi, yeema hu Malako kabiri kano.” 41Bulaanu Abafalisaayo nibali be busire alala, Yesu yabateeba esiteebo naboola ati, 42“Mubaasa mutye hu Kristo? Mwaana wa naanu?” Bamukobolamo bati, “Mwaana wa Daudi.” 43Yesu yabateeba ati, “Lwasiina Daudi niyemereerwe nende Mwooyo Mwolerefu, yamulaanga ati, Omwaami, naboola ati, 44‘Omwaami yaboolera Omwaami wange ati, yihala hu muhono kwaange muluungi ohwoola lundahahole abasuku bao babe esiteeni sy'ohulaambisaho amakulu kao’? 45Mani Daudi niyamulaanga ati, Omwaami, sinyaliha sitye handi Kristo ohuba omwaana wa Daudi?” 46Nae abulao omuundu wundi, kata mulala owanyala ohukobola mu Yesu, handi ohutula ludaalo olwo, abulao omuundu waba nende amaani ak'ohumuteebaho esiteebo siindi.

will be added

X\