MATAYO 21

1Nae Yesu nende abeeki bae nibali aambi ohwingira mu siko sye Yerusaalemu, boola e Bbetifaage aambi nende olugulu lwa Olibeti. Mani Yesu yatuma abeeki babiri, 2nababoolera ati, “Muche mu siko esibali mu moni, mani mucha ohwakaanayo epunda yibaboyere niyiri nende omwaana kwayo. Muchiboolole, mani muchindeetere. 3Nae omuundu wundi nababoolera esiindu syoosi, mumuboolera muti, ‘Omwaami niye ochidaha,’ mani achia ohuchibalehera.” 4Sino syeholeha ohwoseresa abweene bi omunabbi yalomaloma naboola ati; 5“Muboolere omuhaana wa Siyooni muti, boneho, omutuki wao mbawo yeecha yooli, Muloonga muno, handi yehaale hu punda, Hu mwaana kw'epunda, epunda ndoto.” 6Mani, abeeki abo bacha bahola koti lu Yesu yabatuma; 7baleeta epunda eyo, nende omwaana kwayo, bachaalaho engubo chaabwe, mani Yesu yehalaho. 8Esidiyiha sy'abandu sihoongo nasyo syaala engubo chaabwe hu ngira, nae abandi bawakula amasaga k'emisaala nibakaala hu ngira. 9Esidiyiha sy'abandu esyali simwimisiremo, nende esyali simuloondaho, byachaaka ohuhuumula biti, “Hosaana! Omwaana wa Daudi! Wehabi oyo owiicha mu liita ly'Omwaami! Hosaana akulu mu kulu eyo!” 10Mani Yesu niyengira mu Yerusaalemu abandu bomu siko omwo boosi basanguluha, edooho lyoosi lyaduma buduma, nibateeba bati, “Wuno ni wiina?” 11Esidiyiha nasyo syakobolamo siti, “Wuno niye Yesu Omunabbi ohutula e Nasareti mu Galilaaya.” 12Yesu yengira mu nyumba ya Nasae, mani yachaaka ohwiruhaniamo abali bakuliramo nende abali bakusiramo ebiindu, yafumamya emeesa cha abafunjisa eseende nende ebisaala by'abakusa amaburuku. 13Yesu yeecha yababoolera ati, “Syandiikwa siti, ‘Enyuumba yange yinalangangwa enyumba ya amalaamo.’ Nae eng'we mu yikaluhanie ohuba eng'ungu ya abanyaka.” 14Mani abaofu nende abalema bamala beecha yali mu nyumba omwo, yabawonia. 15Nae abahuluundu ba Balaamisi, nende Abekesa ba Malako, nibabona ebyaamayia bi Yesu yali aholere, alala nende abaana bali bahuumulira mu nyumba ya malaamo omwo bati, “Hosaana! Omwaana wa Daudi!” etima lyeecha lyabadiira muno. 16Mani beecha bateeba Yesu bati, “Oli ohuwulira bi baana bano baboola?” Nae Yesu yabakobolamo ati, “Eee. Nae eng'we musisiiri ohusomaho esyandiiko siboola siti, ‘Ni mu minwa chabayere nende abaana badoto banuuna, nimwo omutula efuma ya Nasae ndayi mubwichufu’?” 17Yesu yamala yabaleha awo, yaatula mu siko esyo yacha e Bbetani yi yeyalisa. 18Echuli ni buhyere, Yesu yakobola mu siko esyo, yawulira enjala ni yimuluma. 19Ni yabona omusaala kw'enduli hundulo w'engira, yaasuda yoola mu sisina, nae yahaya ohunyoolaho esyaamo syoosi, ohumalaho amasaafu kong'ene nikadidya. Mani yaboolera omusaala okwo ati, “Solyaamaho ebyaamo byoosi, ehabi liindi!” Mani omusaala okwo, kwomerao. 20Abeki nibabona sino, bawuka muno bateeba bati, “Lwasiina, omusaala kw'enduli kwoomere bwaangu kutyo?” 21Nae Yesu yabakobolamo ati, “Mbaboolera obwadyeeri endi, nimuba nende efukiirira, handi mwahaya ohuba nende ohukana-kana, muba mucha ohunyala ohuhola si ese holere hu musaala kw'enduli, nae kata nimuboolera olugulu luno muti, ‘Siingira ano mani wesukune mu nyaanja,’ nibiba busa koti lumuba muboolere. 22Handi nimuba nende efukiirira, muba mucha ohunyoola byoosi-byoosi bimuba nimusabire.” 23Yesu yengira mu nyumba y'amalaamo, nae niyaba niyeekesa, abahuluundu ba Balaamisi, alala nende abahuluundu ba Abayudaaya beecha yali bamuteeba bati, “Bunyala siina bwoli nabwo ohuhola ebiindu bino? Nae wiina owahuberesa obunyala obwo?” 24Yesu yabakobolamo ati, “Syesi njicha ohubatebaho esiindu silala, nae ni musifunyamo, syesi njia ohubaboolera yindatusa obunyala buhola ebiindu bino. 25Obunyala bwa Yowaana bwohubatiisa abandu, bwatula yena? Bwatula eyiri Nasae, kose eyiri abandu?” Nae abeene-na-beene bachaaka ohuteebana bati, “Huboole hutye? Nihuboola huti, ‘Bwatula eyiri Nasae,’ aba achia ohututeeba ati, ‘Nae hu siina simwamufukiirira?’ 26Nae ni huboola huti, ‘Bwatula mu bandu’ hutya bi bandu banyala ohutuhola, olwohuba abandu boosi bomiisa bati, Yowaana yaba omunabbi wadyeeri.” 27Mani nibamukobolamo bati, “Hukoterwe.” Nae yesi yababoolera ati, “Syeesi siinjia hubaboolera yindatusa obunyala bwohuhola ebiindu bino. 28“Bulaanu nang'we mubaasa mutye? Omuundu wundi yaba nende abaana bae basyani babiri; yacha yaboolera omusyaani muhuluundu ati, ‘Mwaana wange, cha olime mu ndalo yange olwaleero.’ 29Nae yamukobolamo ati, ‘Siinjia hucha.’ Nae lunyuma, yeecha yebaasa, mani yamala yacha. 30Lunyuma, Saabwe yacha eyiri omwaana wundi, yamuboolera yesi ache ahole nasilala atyo. Oyo nae, yamukobolamo ati, ‘Omwaami njia ohuchia,’ nae yamala yahaya ohuchia. 31Bulaanu hu babiri abo, wiina owahola si Saabwe yenya?” Bamukobolamo bati, “Omwaana muhuluundu.” Yesu yababoolera ati, mbaboolera obwadyeeri endi, Abasolosa b'omusolo nende abahasi bacheke, bacha ohubataangirira ohwingira mu Bwaami bwa Nasae. 32Olwohuba, Yowaana yeecha yimuli ohubeekesa engira y'obwadyeeri, nae mwahaya ohumufukiirira; nae abatoosa bomusolo nende abahasi bacheke bamufukiirira. Handi kata ni mwabona mutyo, simwefunaka mwamufukiirira. 33Yesu yaboola ati, “Mutekeerese olukaado lundi. Yaliwo omwenengo wundi owataaka endaalo y'emisabbiibu, mani yayisitiraho olukaka ohuyebodoohania, yayabamo esiina syohuhunyiramo efwiini, yamala yombaha omunara. Mani yaapangisa endaalo eyo abalimi bandi, nae omweene amala asamula mu syaalo sy'eyale. 34Endaalo chohunoka efwiini nichoola, yatuma abahalabani bae eyiri abalimi abo bamubeerese omukabo kwae. 35Nae abalimi nabo, bakwa hu bahalabani bae abo bahuya mulala, beeta owundi, handi balasa owundi amakina. 36Nae handi, omweene ndalo oyo yeecha yatuma abahalabani bandi bangi ohuhiraho abatangira, nae abalimi babahola nasilala batyo. 37Lunyuma lwa byoosi, yeecha yatuma Omwaana wae mweene naboola ati, ‘Luno leero bacha ohutya Omwaana wange bamube oluyaali.’ 38Nae nibabona Omwaana wae, bafukiirisania abeene-na-beene bati, ‘Wuno niye omusiha wae; leha mani humwiite, mani huyire omwaandu kwae.’ 39Mani beecha ba mukwaaho, ba musukuna erwaanyi w'endaalo y'efwiini, bamala ba mwiita. 40Bulaanu, omweene ndalo niyahakobole, yahaholere abalimi abo siina?” 41Bamuboolera bati, “Syadyeeri, achia ohwiita bubi abalimi babi abo, amale apangise abalimi bandi endaalo yae, abacha ohumuberesa omukabo kwae kw'efwiini, ebiha by'ohufuna nibyoolere.” 42Yesu yabateeba ati, “Musisiiri ohusomaho ebyandiiko byolerefu muti; ‘Omusiruunga ku bombahi balekeeresa nikwo okweholere omuhuluundu mu muse; kuno mulimo kw'Omwaami nikwo; handi kutubonehera bulai muno!’ 43Sakira mbaboolera endi, bacha ohubang'uula obwaami bwa Nasae babubeerese abandu bandi, abaama ebyaamo bilai.” 44 45Abahuluundu ba Balaamisi, nende Abafalisaayo lubawulira engaado Yesu chiyakaada echo, bamanya busa bati nibo bayali alomalomaho. 46Nae nibakesaho ohumudiira, beecha batya esidiyiha syali syafukiirira siti, Yesu yali omunabbi wa Nasae.

will be added

X\