MATAYO 20

1“Obulamu bwo Mukulu bufwaanana nende omwenengo, owawuuna echuli ohukoonya abandu bamuholera mu ndalo yae y'emisabbiibu. 2Niyamala ohuwuliirisania nabo omuheemba kw'edinaari ndala hu ludaalo, yabatuma mu ndalo bache bamuholere. 3Handi niyacha erwaanyi esaa chidatu che chuli, yabona abandu bandi nibeemere busa mu siito; 4mani yababoolera ati, 'Eng'we mwesi muche mu ndalo yange, njia ohubabeeresa omuheemba okubahoyera.' Mani bosi beemao bacha. 5Handi niyali nakeenda erwaanyi esaa chisaasaba, nende esaa chitaanu-na-chine, yahola esiindu nasilala. 6Handi aambi w'esawa ehumi-na-ndala, yatula yacha yabukaana abandu bandi bosi nibeemere busa; mani yababoolera ati, ‘Lwasiina, eng'we mweema busa ano oludaalo olulaamba nimutaholaho esiindu syoosi?’ 7Bamukobolamo bati, ‘Olwohuba awumao omuundu yeesi otubeereseho omulimo.’ Nae yababoolera ati, ‘Mani mwesi muche mu ndalo yange.’ 8Mani engoloobe niyoola, omweene ndalo y'emisabbiibu yaboolera omuhubbirisa w'abahosi bae ati, ‘Laanga abahosi boosi, obakabe omuheemba kwaabwe; ohuchaakira hu bamaliirihe, omaliriihe nende abatangire.’ 9Mani abachaaka ohuhola aambi w'esaa ehumi-na-ndala nibeecha, buli muundu yafuna edinaari ndala-ndala. 10Nae abatangira ohuhola nibeecha, babaasa bati bacha ohufuna echihiraho awo; mani bosi bafuna edinaari ndala-ndala busa. 11Nae nibabukula omuheemba kwaabwe okwo bekanyiisa muno eyiri omwenengo, 12nibaboola bati, ‘Boneho, abamaliriihe bano, baholere esaa ndala yong'ene, nae ewe obakabire nasilala nende efwe, abafunihane nende omulimo kw'oludaalo lwoosi mu mubasu kwakiire awo.’ 13Nae yakobola mu mulala hw'abo ati, ‘ Omwiicha, siindi hubahola esibi daawe; haba sihufukiirisaanie naawe ohuholera edinaari ndala? 14Bukula ebyao mani oweeo; ese omweene heengereo ohuberesa omaliriiheyo wuno omuheemba kwaakana nende kuhubereese. 15Ese mbula obunyala bw'ohwehunyera ebiindu byaange koti lumba nindaha? Kose oli ohumbalana hulw'obukabi bwaange?’ 16Mani abahenerehayo bacha ohuba abatangira, nae abatangira bacha ohuba abahenerehayo.” 17Mani Yesu niyali naachia e Yerusaalemu, yayira abeeki bae ehumi-na-babiri endulo, mani nibali hu lukeendo, yababoolera ati, 18“Mbao hucha e Yerusaalemu; mani Omwaana w'Omuundu achia ohudiiswa mu mahono ka bahuluundu ba Babalaamisi nende Abekesa ba Amalako, mani bamuheengere omusango kw'ohufwa, 19handi bamale bamudiise Abateende, bamudulire alala nende ohumuhuya ehoba, mani bamale bamuhomerere hu musalabba, nae hu ludaalo lw'ohudatu achia ohusyuuha.” 20Abweene awo, ng'ina baana ba Sebbedaayo yeecha eyiri Yesu naali nende abaana bae babiri, mani yaasigama, mu moni wae ohumusaba esiindu silala syong'ene. 21Yesu yamuteeba ati, “Odaha siina?” Yamukobolamo ati, “Wechube oti, abaana bange bano bacha ohwihala, mulala hu muhono kwao muluungi, nae owundi hu muhono omukooda mu Bwaami bwao.” 22Nae Yesu yakobolamo ati, “Mbao okoterwe syosaba. Munyala ohung'wa hu sikoombe si njia ohung'wa?” Nae ba mukobolamo bati, “Hunyala.” 23Yesu yababoolera ati, “Mucha ohung'wa hu sikoombe syaange, nae eby'ohwihala hu muhono kwaange muluungi oba hu mukooda, mbula obunyala bubeeresa, nae bwabo ba Lata yatekehera.” 24Mani abeeki ehumi bala nibawulira esyo, etima lyabadiira muno hulwa abasyaani b'enda ndala abo. 25Nae Yesu yabalaanga ohwiicha yali, mani yababoolera ati, “Mumanyire muti abatuki babandu bali mu syaalo muno baheera ohuhalaabanirwa busa, handi abo ababa nende obunyala, batukira busa obwaalaba. 26Nae mw'eng'we haba sisihoyeere ohuba sityo; ohumalaho, 27buli odaha ohuba omwemeresi, ahoyere abe omuhalaabani w'abaasye; 28koti lu Mwaana w'Omuundu ateecha ohuhalaabanirwa nae ohuhalaabanira abandu, nende ohuwaayo obulamu bwae koti omutuulu kw'ohununula abangi.” 29Mani nibali nibatula mu Yeriko, esidiyiha sihoongo sy'abandu syeecha syamuloonda. 30Nae bone, abawofu babiri bali nibehaale hu ndulo w'engira, nibawulira bati Yesu niye owali niyeecha ohubita, bachaaka ohwekongooya mu kono ly'akulu bati, “Mwaana wa Daudi! Tukwiireho esisa!” 31Nae esidiyiha sy'abandu syeecha syabahabuhira, nisiibaboolera ohuwuleera; nae abaofu bano bameeda busa ohwekongooyera akulu muno nibaboola bati, “Mwaana wa Daudi, Tukwiireho esisa!” 32Mani Yesu yeecha yeema, mani yabalaanga, nababoolera ati, “Eng'we mudaha mbaholere siina syeene?” 33Mani bamukobolamo nibamuboola bati, “Omwaami, efwe hudaha otulimbuse emoni fwesi huboneho!” 34Mani Yesu yeecha yabakwiira esisa, mani yabadiira hu moni chaabwe; mani abweene awo, abasaacha abo beecha bachaakiraniramo ohubona, mani baasingira baloonda Yesu.

will be added

X\