MATAYO 2

1Yesu niyamala ohwibulirwa mu Bbeteleheemu sya Buyudaaya mu ndaalo ch'Omutuki Herode, abasomi bandi, abeeka muno ebidiira hu ning'ining'ini batula Ebukwe beecha boola mu Yerusaalemu nibatebaanga bati, 2“Omwaana wibuulwe ohuba omutuki w'Abayudaaya ali yena? Hubweene ening'ining'i yae niyitulire Ebukwe, sakira hwiichire ohumwiinamira.” 3Omutuki Herode niyawulira atyo, yeyendeherera muno alala nende abandu bomu Yerusaalemu bosi. 4Herode yeecha yabuusa alala abalaamisi bahuluundu boosi, alala nende abekesa b'amalako boosi, mani yabateeba ati, “Mbwe Kristo achia ohwibulirwa yena?” 5Nabo bamukobolamo bati, “Mu siko sya Bbeteleheemu mu Buyudaaya. Olwohuba nilwo lu nabbi yandiika ati: 6‘Ewe Bbeteleheemu oli mu syaalo sya Yuda, sineewe ohiramo obudiidi mu biko bihunuufu muno mu syaalo sya Yuda daawe; mani sakira mwewe nimwo omucha ohutula omwemeresi ochia ohufuka Yisirayiri, abandu bange.’ ” 7Mani Herode yeecha yalaanga abakeni abo mungiso yemeeda ohubeteebaho ebiha byeene bi ning'ining'i yali niyibaboneheeremo. 8Yamala yabatuma e Bbeteleheemu nababoolera ati, “Muche muteeberese bulai ebidiira hu mwaana oyo, mwiche munjekese, mani syesi njie mwiinamire.” 9Mani nibawulira batyo bachiririra nende olukeendo lwaabwe olwo; mani nibali nibakeenda, beecha handi babona ening'ining'i yira yibali babweene Ebukwe; mani yabemirira ohwoola luyoola yedungeeresa abundu yi mwaana oyo yali. 10Nibabona batyo basangaala behoya muno! 11Nibengira mu nyumba eyo mani babona omwaana nende ng'ina Maria, basigama bamwiinamira. Bemao baaboolola emikaangi chaabwe bamubeeresa ebiyaanwa by'esaabbu, obubbaani nende amafuta kesing'aari siingi. 12Nasae yeecha yabalabulira musilooto obutakaluhira eyiri Herode ohutusaho badiire engira yindi eyibakalusa ewaabwe. 13Mani nibamala ohuwao, Malaika wa Nasae yeecha yabonehera Yosefu musilooto yaamuboolera ati, “Siingira obukule omwaana nende ng'ina mwiruhire e Misiri, mube eyo ohwoola omweene lundahababoolere endaalo ch'ohukoboleramo: Olwohuba manyire endi Herode yeecha ohukiiya omwaana oyo nadaha ohumwiita.” 14Yosefu yabukula omwaana nende ng'ina beruhira e Misiri musiro syeene esyo, 15yibamala baamenya ohwoola lu Herode yafwa. Kano kali katyo, hu mboosi ya Nasae yiyalomalomera mu nabbi yolerere yiti, “Ndahalaange omwaana wange ohutula mu Misiri.” 16Herode niyafumbula ati abasaacha bakesi abo bali bamuheengere amakesi k'ohumweyibaho, yanyoolera muno, yatusa elako ly'ohwiita abaana basyani boosi mu Bbeteleheemu alala nende ebyaalo byoosi bisibirane nasyo, ohuchaakira hu myaka chibiri n'ohwiiha aasi, nga alonderera hu biha bi basaacha bakesi bala bali baboneremo ening'ining'i. 17Mani nilwo lu mboosi chi nabbi Yeremiya yalomaloma lucholererera abweene chiti, 18“Ekono lyawuliiriha mu Raama, ohulira hwesasaakisi liingi, Lakeeri nacherenjesa namasika hulw'abaana bae, nibihaya ohumulemia omwooyo olwohuba abaana bae boosi bali bamuweereho.” 19Herode niyamala ohufwa, malaika wa Nasae yabonehera Yosefu musilooto e Misiri, 20yaamuboolera ati, “Siingira obukule omwaana nende ng'ina mukobole mu syaalo sya Yisirayiri olwohuba abo abali nibakiiya ohwiita omwaana bamalire ohufwa.” 21Yosefu yasingira yabukula omwaana nende ng'ina bakobola mu syaalo sya Yisirayiri. 22Nae Yosefu niyawulira ati Akelausi niye owakaluha hu sisaala sya Herode simwaana ohuba omutuki wa Buyudaaya, yecha yaatya muno ohukaluhayo. Nae Nasae yeecha yaamukerakira musilooto, mani yeseenda yacha embeka che Galilaaya, 23nae niyoola eyo, yamenya mu siko silaangwa siti, Nasareti. Awo nilwo lu bi banabbi balomaloma byolerera biti, “Yahalaangwe Omunasareti.”

will be added

X\