MATAYO 19

1Nae Yesu niyamala ohulomaloma emboosi echo, yatula e Galilaaya yaacha mu situundu sye Buyudaaya, engereha w'omwaalo kwa Yorudaani; 2mani esidiyiha sy'abandu syeecha syamulondaho, yamala yabawonisirya ebweene eyo. 3Nae Abafalisaayo beecha yali bamuhema nibamuteeba bati, “Mani elako lifukiirira omuundu ohwirusa omuhasi wae hulwa esifune syoosi?” 4Yesu yakobolamo ati, “Musisiiri ohusomaho muti ohutula mu huchaaka, Nasae yaloonga omusaacha nende omuhasi, 5mani yaboola ati, ‘Hulw'esifune sino, omusaacha achia ohulehaanga simwaana nende ng'ina, yeyambanie nende omuhasi wae, mani bombi behole omubiri mulala’? 6Mani bulaanu sibasisiiri babiri, nae omubiri mulala. Sakira esyo si Nasae yawambania alala, omuundu yeesi atasikabuhanianga.” 7Nae Abafalisaayo bamuteeba bati, “ Lwasiina Musa yatusa elako ati, omusaacha aberesenge omuhasi ebbarwa y'ohulobana, hwaamale amwirusire elalira?” 8Yesu yabakobolamo ati, “Musa yabafukiirira ohwirusa abahasi beeng'we, ohweema hu lw'obwaangalafu bw'emyooyo cheeng'we, nae sisyaba sityo ohutula mu huchaaka. 9Handi mbaboolera endi, oyo yeesi owirusa omuhasi wae, ataali hu lw'obucheke,” mani yadehya owundi, aba aholere obucheke, 10Abeki bae beecha baboola bati, “Ebiindu nibiba bityo akati-kaati w'omusaacha nende omuhasi wae, mani mbawo obutadeehya biba bihira.” 11Nae Yesu yababoolera ati, “Abandu boosi sibanyala bafukiirira enjekesa yino, ohumalaho abo ba Nasae aba yekulirewo. 12Olwohuba, biriwo ebiindu bitaali nasilala ebikera omuundu yahaya ohudeehya. Abandu bandi sibanyala hudeehya olwohuba beebulwa batyo; abandi baladwa busa, mani sibanyala hudeehya; nae abandi sibanyala hudeehya olwohuba befwiirisa obulamu bw'ohudeehya, olw'ohuhalaabanira Obwaami bwo Mukulu. Mulehe oyo onyala ohufukiirira, afukiirire.” 13Mani beecha baleeta abaana bayere eyiri Yesu abateeho emihono handi abasabire. Nae abeeki bae beecha boolobya abandu; 14nae Yesu yababoola ati, “Mulehe abaana beeche yindi, handi mu tabakayira; olwohuba abafwana koti bano, nibo abeene Bwaami bwo Mukulu.” 15Yesu yabeesaho amahono, mani yamala yawaawo. 16Abweene awo, omusyaani wundi yeecha eyiri Yesu namuteeba ati, “Omweekesa, silayi siina sihoyeere ohuhola, hu fune Obulamu Butaakama?” 17Yesu yakobolamo ati, “Lwasiina wundeeba hu biindu bilai? Aliwo omuundu mulala yeng'ene omulai. Nae nooba nodaha ohwingira mu Bulamu, linda Amalako ka Nasae.” 18Yateeba Yesu ati, “Malako siina?” Nae Yesu yakobolamo ati, “Otetaanga; Otayiranaanga; Otebaanga; Otabachaanga; 19beresaanga latao nende mao oluyaali; handi, dahaanga owaasyo koti omweene luwedaha.” 20Omusyaani oyo yaboolera Yesu ati, “Amalako kano koosi, ngalondaanga ohutula mu buyere bwaange; nae siina handi siimba mochoha?” 21Yesu yaamuboolera ati, “Nodaha ohuba omuundu mwolerefu, cha okusemo ebiindu byooli nabyo, mani eseende chitulamo ochikabire abamanani, mani oba ochia ohufuna obuyiinda Mukulu; mani omale wiche wunonde.” 22Nae omusyaani oyo niyawulira atyo, yatula awo yawaawo niyewunamiire muno, olwohuba yali nende obuyiinda bungi muno. 23Mani Yesu yaboolera abeeki bae ati, “Mbaboolera obwadyeeri endi, sichia ohudinyira muno omuundu muyiinda ohwingira mu Bwaami bwo Mukulu. 24Handi mbaboolera endi, syanguyira engamia ohubita mu moni yesindaani, ohuhira omuundu muyiinda ohwingira mu Bwaami bwa Nasae.” 25Nae abeeki bae nibawulira sino, bawuka muno baboola bati, “Mani wiina onyala ohuwona?” 26Yesu yabatingaala tiiri mu moni, yamala yabakobolamo ati, “Sino sisinyaliha eyiri abandu, nae eyiri Nasae, buli siindu sinyaliha.” 27Abweene awo, Peetero yakobolamo naboola ati, “Bone, efwe hwaleha ebiindu byoosi mani hwa huloonda. Ni siina sihwahanyoole?” 28Yesu yababoolera ati, “Mbaboolera obwadyeeri endi mu syaalo siyaaha, Omwaana w'Omuundu niyahehale hu sisaala syae sy'oluyaali, eng'we abanondaho mwesi mucha ohwihala hu bisaala by'obutuki, ehumi-na-bibiri, muheengere omusango enjia ehumi-na-chibiri cha Yisirayiri. 29Mani buli muundu yeesi owaleha enyumba kata bamwaanang'ina, kata bambochong'ene, kata latang'ene, kata ng'ina, kata abaana, kata eloba, hu lw'eliita lyaange, achia ohunyoola amahabi emia ndala eyeebyo, alala nende Obulamu Butaakama. 30Nae abangi bataangiramo bacha ohuba abahenerehayo, nae abahenerehayo bacha ohuba abatangiramo.

will be added

X\